ސްޕެނިޝް ލަލީގާގެ އެފް ސީ ބާސެލޯނާއަށް މިސީޒަންގައި ސޮއިކުރި ތަޖްރިބާކާރު ފޯވަޑް ސާޖިއޯ އަގުއެރޯގެ ކުޑަކަޅުވައަށް ލިބުނު އަނިޔާއަކާއި ގުލިގެން 10 ހަފްތާއަށް ކުޅުމާއި ރަުށް ދާން ޖެހިއްޖެއެވެ. މިކަން ހާމަކޮށްފައިވަނީ ބާސާއިން ނެރުނު ބަޔާނެއްގައެވެ.
ބާސާއިން ހާމަކުރިގޮތުގައި ޓެސްޓްތަކުން އާޖެންޓީނާގެ ފޯވަޑްގެ ކުޑައަޅުވަޔަށް އަނިޔާވެފައިވާކަން ހާމަވެފައިވާކަމަށެވެ. އުމުރުން 33 އަހަރުގެ އަގުއެރޯ ބާސާއަށް ސޮއިކޮށްފައިވަނީ އޭނާ އިންގްލިޝް ޕްރިމިއަރ ލީގުގެ ޗެމްޕިއަން މެންޗެސްޓަރ ސިޓީއާއެކު ހަދާފައިވާ އެއްބަސްވުން ހަމަވުމުން ފްރީ ޓްރާންސްފަރ އެއްގައި ދެ އަހަރު ދުވަހުގެ އެއްބަސްވުމެއްގެ ދަށުންނެވެ.
އަގުއެރޯ ސިޓީގައި ހޭދަކުރި 10 އަހަރު ތެރޭގައި އޭނާވަނީ އެކްލަބަށް އެންމެ ގިނަ ލަނޑު ޖަހާދިން ކުޅުންތެރިޔާއަށް ވެގެން ގޮސްފައެވެ. އެގޮތުން 390 މެޗުގައި އޭނާވަނީ 260 ލަނޑު ސިޓީއަށް ކާމިޔާބުކޮށްދީފައެވެ.
އާޖެންޓީނާގެ ކެޕްޓަން ލިއޮނެލް މެސީގެ ގާތް އެކުވެރިއެއް ކަމަށްވާ އަގުއެރޯ އަބަދުވެސް މެސީ އާއި އެއް ކްލަބަކަށް ކުޅެން ބޭނުންކަންވަނީ ހާމަކޮށްފައެވެ. އަދި މިފަހަރު ބާސާއަށް ބަދަލުވުމުގެ ފަހަތުގައިވެސް މެސީ ބާސާގައި މަޑުކުރަން ނިންމި ނިންމުން ހިމެނޭ ކަމަށް ބައެއް ފަރާތްތަކުން ހާމަކުރެއެވެ. ނަމަވެސް އަނެއްކާވެސް އަގުއެރޯގެ އެހުވަފެން މިވަނީ ހަގީގަތަކަށް ވާގޮތް ނުވެފައެވެ. އެއީ މެސީ މިހާރު ބާސާ ދޫކޮށް ދާކަން ޔަގީން ވެފައިވުމުންނެވެ.
ބާސާއަށް ސޮއިކުރިއިރު އަގުއެރޯ ހާމަކުރިގޮތުގައި ބާސާއަކީ ދުނިޔޭގެ އެންމެ މޮޅު ޓީމެވެ. އަދި އޭނާ ބާސާއަށް ގުޅުން މިއީ އޭނާއަށް ކުރިއަށް އެޅުނު ފިޔަވަޅެއްކަމަށް އަގުއެރޯ ބުނެފައިވެއެވެ.