ބަންގްލަދޭޝް އާއި އޮސްޓްރޭލިއާގެ މެދުގައި ކުޅުނު ފަސްވަނަ ޓީ 20 މެޗްގައި އޮސްޓްރޭލިއާއަށް މިހާތަނަށް ހޯދުނު އެންމެ ދަށް ނަތީޖާއާއެކު ބަންގްލަދޭޝް އަތުން ބަލިވެއްޖެއެވެ. މިމެޗް ބަންގްލަދޭޝް ކާމިޔާބުކުރީ 60 ލަނޑުންނެވެ.
އޮސްޓްރޭލިއާ އާއި ބަންގްލަދޭޝްގެ މެދުގައި ކުޅުނު ފަސްވަނަ ޓީ 20 ކްރިކެޓް މެޗްގައި އެންމެ ފުރަތަމަ ކުޅެން އަރާ 20 އޯވަރުގެ ތެރޭގައި 8 ކުޅުންތެރިން ނުބައިވެގެން ބަންގްލަދޭޝްއަށް ހެދުނީ 122 ލަނޑެވެ. އެންމެ ރަނގަޅަށް ކުޅެފައިވަނީ 23 ލަނޑު ހެދި ބަންގްލަދޭޝްގެ މުހަންމަދު ނައީމްއެވެ.
ޖަވާބުގައި ކުޅެން އަރާ 13.4 އޯވަރުގެ ތެރޭގައި އޮސްޓްރޭލިއާގެ ހުރިހާ ކުޅުންތެރިން ނުބައިވެގެން ހެދުނީ 62 ލަނޑެވެ. މިއީ 144 އަހަރުގެ ތެރޭގައި އޮސްޓްރޭލިއާގެ އެންމެ ކުރު އިނިންގްސްއެވެ. އޮސްޓްރޭލިއާ ޓީމަށް ހަތަރު ލަނޑަށް ވުރެ ގިނައިން ހެދުނީ މިމެޗްގައި ކެޕްޓަންކަން ކުރަމުންދިޔަ މެތިއު ވޭޑް އާއި ބެން މެކްޑަރމޮޓްއަށް އެކަންޏެވެ. ވޭޑްއަށް މިމެޗްގައި ހެދުނީ 22 ލަނޑެވެ.
ބަންގްލަދޭޝްގެ ޝަކީބް އަލް ހަސަން ވަނީ 9 ލަނޑަށް 4 ވިކެޓް ނަގާފައެވެ. މިއާއެކު އޭނާ ވެފައިވަނީ ޓީ 20 ގައި 100 ވިކެޓްގެ އިތުރުން 1000 ލަނޑު ހެދި ފުރަތަމަ ކުޅުން ތެރިޔާއަށެވެ. މިކާމިޔާބީއާއެކު މިދެޓީމްގެ މެދުގައި ކުޅުނު ޓީ 20 ސީރީޒް މިވަނީ 4 މެޗް އެއް މެޗުން ބަނަގްލަދޭޝް ކާމިޔާބުކޮށްފައެވެ. މިސީރީޒްގެ ކުރިން ޓީ 20 މެޗަކުން ބަންގްލަދޭޝްއަށް އޮސްޓްރޭލިއާ ބަލިކުރެވިފައެއް ނުވެއެވެ. މިސީރީޒްގައި އޮސްޓްރޭލިއާގެ ކެޕްޓަން އާރޮން ފިންޗް އާއި ބެޓްސްމަނުން ކަމަށްވާ ޑޭވިޑް ވަރނަރ، ސްޓީވް ސްމިތު އަދި ގްލެން މެކްސްވެލް ކުޅޭފައެއް ނުވެއެވެ.