ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް އުފުލާފައިވާ މަނީލޯންޑަރިންގެ ދައުވާއާއި، ރިޝްވަތު ޤަބޫލުކުރުމުގެ ކުށުގެ މައްސަލާގައި، އެމަނިކުފާނާ ދެކޮޅަށް، އެންމެ އަރިސް ބޭފުޅުން ހިމެނިވަޑައިގަންނަވާހެން 86 ހެއްކެއް ދައުލަތުން ހުށައަޅައިފިއެވެ.
މަނީލޯންޑަރިންގެ ކުށް ސާބިތުވެ، މިހާރުވެސް ފަސް އަހަރު ދުވަހުގެ ޖަލު ހުކުމެއް ތަންފީޒްކުރައްވަމުން ގެންދަވާ ރައީސް ޔާމީންގެ މައްޗަށް މަނީލޯންޑަރިންގެ އިތުރު ދައުވާއަކާއި، ރިޝްވަތު ޤަބޫލުކުރުމުގެ ކުށުގެ ދައުވާއެއް އުފުލާފައިވަނީ ރިސޯޓެއްގެ ގޮތުގައި ރ.ފުއްގިރި ތަރައްގީކުރަން ކުއްޔަށް ދޫކުރުމުގެ މުއާމަލާތުގައި މަގާމުގެ ނުފޫޒު ބޭނުން ކުރައްވައި 1.1 މިލިއަން ޑޮލަރު ހޯދައި ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމެންޓް ޕްރައިވެޓް ލިމިޓެޑް ބޭނުންކޮށް އެ ފައިސާ ލޯންޑަކުރުމަށް ފަށަލަކޮށްފައިވާ މައްސަލައިގައެވެ. މިއަދުވަނީ އެ މައްސަލައިގެ އިބްތިދާޢީ އަޑުއެހުމެއްބާއްވައި ދެފަރާތަށްވެސް ހެކި ހުށައެޅުމުގެ ފުރުޞަތު ދީފައެވެ.
މިއަދު އޮތް ޝަރީޢަތުގެ އަޑުއެހުމުގައި ރައީސް ޔާމީންގެ މައްޗަށް އުފުލާފައިވާ ދެ ދައުވާ ސާބިތުކުރުމަށް ދައުލަތުން ވަނީ 86 ހެއްކެއް ހުށައަޅާފައެވެ. އެގޮތުން ހުށައަޅާ ޝަފައީ ހެކިންގެ ތެރޭގައި ކުރީގެ ނައިބު ރައީސް އަހުމަދު އަދީބު އަބްދުލްޣަފޫރާއި، އެމްއެމްޕީއާރްސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތާއި، ރައީސް ޔާމީންގެ އަރިސް ބޭފުޅެއްކަމަށްވާ އެމްޑީއޭގެ ލީޑަރު އަދި ރައްޔިތުންގެ މަޖިލީހުގެ ދ.މީދޫ ދާއިރާގެ މެންބަރު އަހުމަދު ސިޔާމް މުހައްމަދާއި، އެމްޑީއޭގެ ޑެޕިއުޓީ ލީޑަރު އަދި ކެނދިކުޅުދޫ ދާއިރާގެ ކުރީގެ މެމްބަރު އަލީ މައުރޫފް ހިމެނިވަޑައިގަންނަވައެވެ. ރައީސް ޔާމީން މިހާރު ހުކުމް ތަންފީޒްކުރައްވަމުން ގެންދަވާ ވޮޑުމުލާ މައްސަލަ ސާބިތުކުރުމަށްވެސް އަދީބާއި ޒިޔަތަކީ ދައުލަތުން ހުށައެޅި މުހިންމު ހެކިންތަކެކެވެ.
މީގެ އިތުރުން ދައުލަތުން ހުށައެޅި އިތުރު ހެކިންގެ ތެރޭގައި ލ.ދަނބިދޫ އަފްޒާ އަހުމަދު އާމިރާއި، މއ.ސާނީވިލާ މުހައްމަދު ޝިފާއުއާއި، ރ.އިނގުރައިދޫ ބުލްބުލާގޭ މުހައްމަދު ހުސެއިންފުޅާއި، ހ.ވެހެލި އަހުމަދު ޝާއިގުއާއި، މއ.ޕޮމްޕިއާ އަހުމަދު ރަޝީދުއާއި، ހ.ލެވެންލީ އަހުމަދު ޝާކިރުގެ އިތުރުން ތަހުގީގުގައި ބައިވެރިވި ބައެއް ފުލުހުންވެސް ހިމެނެއެވެ.
ރައީސް ޔާމީނާއި ދެކޮޅަށް ދައުލަތުން ހުށައެޅި ކިތާބީ ހެކިތަކުގެ ތެރޭގައި ބެންކް ސްޓޭޓްމެންޓްތަކާއި، އޭރު ޓޫރިޒަމް މިނިސްޓްރީ އާއި އެމްއެމްޕީއާރްސީ އާއި ދެމެދު ކުރެވުނު މުއާމަލާތްތައް ހިމެނެއެވެ.
މި މައްސަލާގައި ރައީސް ޔާމީންގެ ފަރާތުންވެސް ވަނީ ޝަފަވީ ހެއްކާއި ކިތާބީ ހެކި ހުށައަޅާފައެވެ. އެގޮތުން ފަސް ޝަފަވީ ހެއްކާއި، ތިރީސް ކިތާބީ ހެކި ރައީސް ޔާމީންގެ ފަރާތްޕުޅުން ހުށައެޅުއްވިއެވެ. މިގޮތުން ރައީސް ޔާމީންގެ ފަރާތްޕުޅުން ވަނީ ޑޮލަރު ގަތުމަށް ކޮށްފައިވަނީ ޞައްޙަ މުޢާމަލާތެއްކަމަށް ވިދާޅުވެ، ދިފާޢީ ހެކިންގެ ގޮތުގައި ސިޔާމް ޑޮލަރު ގަތުމަށް ފައިސާ ހަވާލުކުރިކަމަށް ބުނާ ޢަބްދުﷲ ރަޝީދާއި، އެ މުއާމަލާތުގެ ހެކިވެރިންގެ ގޮތުގައި ތިބިކަމަށް ބުނާ މާލެ ސިޓީގެ މިހާރުގެ ޑެޕިއުޓީ މޭޔަރު އަޙްމަދު ނަރީޝްއާއި، ގއ.ކޮލަމާފުށި ޝުޢާއުﷲ ސަޢީދުއާއި، އަޙްމަދު ސިޔާމް މުޙައްމަދާއި، ކްރިކް ރިޒާގެ ނަން ހުށައަޅުއްވާފައެވެ. މި މައްސަލައިގައި ކްރިކް ރިޒާގެ މައްޗަށްވެސް ވަނީ މަނީ ލޯންޑަރިންގެ ކުށުގެ ދައުވާ އާއި ރިޝްވަތު ދިނުމުގައި މެދުވެރިއަކަށް ވުމުގެ ކުށުގެ ދައުވާ އުފުލާފައެވެ. ރައީސް ޔަމީންގެ ދިފާޢީ ވަކީލު ވިދާޅުވީ ކްރިކް ރިޒާގެ ނަން ހުށައެޅުއްވީ، ދައުލަތުން ބުނާ ފަދަ އެއްވެސް މުއާމަލާތެއް ރައީސް ޔާމީނާއެކު ނުހިނގާކަން ސާބިތުކޮށްދިނުމަށްކަމަށެވެ.
މިއަދު އޮތް ޝަރީޢަތުގެ އަޑުއެހުން ފަށަމުން ރައީސް ޔާމީންގެ ދިފާޢީ ވަކީލު އަދި އެމަނިކުފާނުގެ ވެރިކަމުގެ ފުރަތަމަ ނާއިބު ރައީސް ޑރ.މުހައްމަދު ޖަމީލު އަޙްމަދު ވަނީ އޭސީސީން 2017 ވަނަ އަހަރު އެމްއެމްޕީއާރުސީއާ ގުޅޭގޮތުން ހިންގި ބޮޑު ތަހުގީގުގެ ރިޕޯޓްގައި ހިމެނޭ ލިޔެކިޔުންތައް ނުލިބޭކަމުގެ ކަންބޮޑުވުން ފާޅުކޮށްފައެވެ. އެ ރިޕޯޓު ޝަރީއަތް މެދުވެރިކޮށް ހޯދަން އެދި ރައީސް ޔާމީންގެ ފަރާތްޕުޅުން ޖޫން 30 ގައި ކޯޓަށް ސިޓީއެއް ފޮނުވާފައިވާކަމަށާއި، ނަމަވެސް މިހާތަނަށްވެސް އެދިފައިވާ ލިޔުން ނުލިބޭ ކަމަށް ވިދާޅުވިއެވެ. ދައުލަތުން ދޭން ޖެހޭ ލިޔުންތަކެއް ނުލިބެނީސް ދައުވާއިން ދިފާއު ނުވެވޭނެ ކަމަށްވެސް ރައީސް ޔާމީންގެ ދިފާޢީ ވަކީލުން ވިދާޅުވިއެވެ.
މައްސަލަ ބައްލަވާ އިސް ޤާޟީ އަހްމަދު ޝަކީލު، އެ ރިޕޯޓު ހޯދަން ޝަރީއަތުން ފުރުސަތު ދިންނަމަވެސް، ދިފާއީ ވަކީލުން އެދުނު ގޮތަށް ހެކި ހުށަހެޅުމުގެ ބައި މަޑުނުޖައްސަން ނިންމެވިއެވެ. ދައުލަތުގެ ފަރާތުން ވަނީ މީގެ ކުރިން ކުރިއަށް ގެންދިޔަ ޝަރީއަތުގައި ރައީސް ޔާމީންގެ ފަރާތްޕުޅުން އެ ލިޔެކިޔުންތަކަށް ޖަވާބުދާރީ ވެފައިވާކަން ފާހަގަކުރައްވާފައެވެ.
މައްސަލަ ބައްލަވާ ޤާޟީ ވިދާޅުވީ، ރައީސް ޔާމީންގެ ފަރާތްޕުޅުން ހޯދުމަށް އެދިލައްވާ ލިޔެކިޔުންތައް ހޯދުމަށް އަމުރެއް ނެރެދެވޭނީ ޖިނާއީ އިޖުރާއަތުގެ ގާނޫނުގައިވާ ގޮތުގެ މަތިން ފޯމު މެދުވެރިކޮށް ހުށަހެޅުމުންކަމަށެވެ. ރައީސް ޔާމީންގެ ފަރާތްޕުޅުން އައިސްފައިވަނީ ގާޟީއަށް އެޑްރެސްކޮށް ލިޔުއްވާފައިވާ ސިޓީއެއް އެކަނިކަމަށާއި، އެކަމާމެދު ފަހުން ގޮތެއް ނިންމަވާނެ ކަމަށް ޤާޟީ ވިދާޅުވިއެވެ. އޭގެ ފަހުން ދިފާއަށް އިތުރު ހެކިން ހުށަހެޅުމުގެ ފުރުސަތު ދެއްވާނެ ކަމަށްވެސް މައްސަލަ ބައްލަވާ ޤާޟީ ވިދާޅުވިއެވެ. އަދި ލިޔެކިޔުންތައް ހޯދުމަށް އޮންނަ އިޖުރާއަތުގެ ތެރެއިން ފޯމް ހުށަހަޅައިގެން ހެކި ހޯދުމަށް ތިން ދުވަސް ޤާޟީ ވަނީ ދެއްވާފައެވެ.
މިއަދު އޮތް އަޑުއެހުމުގައި ޝަރީއަތުގެ ކުރިން ހުށަަހަޅާ ހުށަހެޅުންތައް ހުށަހަޅަން 10 ދުވަހުގެ މުއްދަތެއް ޤާޟީ ވަނީ ދެއްވާފައެވެ. މި މައްސަލާގައި ދެން އަޑުއެހުމެއް އޮންނާނީ މި މަހުގެ 22 ވަނަ ދުވަހުގެ ހެނދުނު ކަމަށްވެސް މިއަދުގެ އަޑުއެހުން ނިންމަވާލައްވަމުން ޤާޟީ ވިދާޅުވިއެވެ.
ރައީސް ޔާމީންގެ މައްޗަށް އުފުލާފައިވާ މަނީލޯންޑަރިންއާއި، ރިޝްވަތު ޤަބޫލުކުރުމުގެ ދައުވާގައި އެންމެ ފަހުން އަޑުއެހުމެއް ބޭއްވީ މިއަހަރުގެ ޖެނުއަރީ މަހުގެ ތެރޭގައެވެ. އެ އަޑުއެހުމުގައި ރައީސް ޔާމީން ވަނީ ދައުވާތަކަށް އިންކާރުކުރައްވާފައެވެ.