އިންގްލިޝް ޕްރިމިއަރ ލީގުގެ މެންޗެސްޓަރ ޔުނައިޓެޑަށް ކުޅެމުންދާ ހުނަރުވެރި ފޯވަޑް މާކަސް ރަޝްފަޑްގެ ކޮނޑަށް ލިބިފައިވާ އަނިޔާއާއި ގުޅިގެން މިއަންނަ ހަފްތާގައި އޮޕަޜޭޝަން ކުރަން ނިންމައިފިއެވެ. އަދި މިއޮޕަރޭޝަނުގެ ސަބަބުން ރަޝްފަޑް ތިން މަހެއްހާ ދުވަހު ކުޅުމާއި ދުރުގައި ހުންނަން ޖެހިދާނެކަމަށް ވަނީ ބެލެވިފައެވެ.
ރަޝްފަޑްގެ ކޮނޑަށް އަނިޔާވެފައިވާތާ މިހާރު ދެތިން މަސް ވެއްޖެ ކަމަށާއި މިކަމުގެ ސަބަބުން އޭނާއަށް އެންމެ ރަނގަޅަށް ކުޅެވެމުން ނުދާކަމަށްވަނީ ވެފައެވެ. އަދި އެހެން ކަމުން މިއަނިޔާއިން މުޅިން ސަލާމަތް ވެވެން އޮތީ އޮޕަޜޭޝަނެއް ކޮށްގެންކަމަށް ޑޮކްޓަރުންވަނީ ލަފާދީފައެވެ. ޔުނައިޓެޑުން ބޭނުންވީ އޮޕަޜޭޝަން ނުކޮށް މިކަމުން ރަޝްފަޑް ސަލާމަތް ކުރެވޭނެ ގޮތެް އޮތްތޯ ބަލަމުންނެވެ. ނަމަވެސް މިހާރު އެކްލަބުންވެސް ވަނީ އޮޕަޜޭޝަން ކުރަން އެއްބަސްވެފައެވެ. ރަޝްފަޑްވަނީ މިނިމުނު ސީޒަންގައި 37 މެޗް ޔުނައިޓެޑަށް ކުޅެދީ 11 ލަނޑު ކާމިޔާބުކޮށްދީފައެވެ. އަދި ޔޫރޯ 2020 ގައި ވާދަކުރި އިންގްލަންޑް ޓީމްގައިވެސް އޭނާ ހިމެނުނެވެ. ނަމަވެސް މި ނިމިދިޔަ ސީޒަންގ ފަހު ބައިގައި އަނިޔާގެ ސަބަބުން އެންމެ އެދެވޭ ކުޅުން ރަޝްފަޑްގެ ކިބައިން ފެނިގެން ގޮސްފައެއް ނުވެއެވެ. އަދި ޔޫރޯގައިވެސް އޭނާ ފެނިގެން ގޮސްފައިވަނީ ވަރަށް މަދުންނެވެ.
ޔުނައިޓެޑުން ހާމަކުރިގޮތުގައި ރަޝްފަޑާއި ޔުނައިޓެޑްގެ ކޯޗް އޮލޭ ގުނަރ ސޯލްޝާ އާއި ކްލަބްގެ މެޑިކަލް ސްޓާފުން ކުރި މަޝްވަރާތަކަށްފަހު މިއަންނަ ހަފްތާގައި އޮޕަޜޭޝަން ކުރަން ނިންމާފައިވާކަމަށެވެ. އޮޕަރޭޝަނަށްފަހު ރަޝްފަޑްގެ ރިހެބިލިޓޭޝަންގެ މަސައްކަތް ފެނިގެންދާނެކަމަށްވެސް ޔުނައިޓެޑުން ހާމަކުރެއެވެ.