"އަހުލު" : އޯގާތެރި ސަރުކާރެއްގެ މުހިއްމު ޕްރޮގްރާމެއް

އަހުލު ޕްރޮގްރާމަކީ މިނިސްޓްރީ އޮފް ޖެންޑަރ ފެމިލީ އެންޑް ސޯޝަލް ސަރވިސްއިން ކޯވިޑްގެ ޙާލަތުގައި ދިރިއުޅުމަށް އައި ބަދަލުތަކުގެ ސަބަބުން ރަށަށް ދިޔުމަށް ބޭނުންވާ މީހުންނަށް ރަށަށް ދިރިއުޅުން ބަދަލުކުރުމަށް ފަހިކޮށްދެމުން އަންނަ ފުރުސަތެކެވެ. މިގޮތުން މިހާތަނަށް 29 ޢާއިލާއަކުން 104 މީހަކު އެހީއަށް ވަނީ އެދިފައެވެ. އަދި އޭގެ ތެރެއިން 25 ޢާއިލާއެއް މިހާރު ރަށަށް ފޮނުވާފައެވެ.

ޖެންޑަރ މިނިސްޓްރީން ޢާއްމުކުރައްވާފައިވާ ތަފާސްހިސާބަށް ބަލާއިރު ރަށަށް ބަދަލުވެފައިވާ ޢާއިލާތުގެ ތެރެއިން 15 ޢާއިލާއަކަށް މިހާތަނަށް 3 މަސްދުވަހުގެ މާލީ އެހީ އަދި 7 ޢާއިލާއަކަށް 6 މަހުގެ މާލީ އެހީތެރިކަން ވަނީ ފޯރުކޮށްދީފައެވެ. 6 މަސްދުވަހުގެ މާލީ އެހީ ފޯރުކޮށްދީފައިވާ 7 ޢާއިލާއަށް މިހާތަނަށް ލޯނުގެ ގޮތުގައި 20 ހާސް ރުފިޔާ ވަނީ ދޫކޮށްފައެވެ. އަދި އެހީއަށް އެދިފައިވާ ފަރާތްތަކުގެ ތެރެއިން 11 ޢާއިލާއަކަށް މިއެހީ ފޯރުކޮށް ދިނުމުގެ މަސައްކަތް ޖެންޑަރ މިނިސްޓްރީން އަންނަނީ ކުރައްވަމުންނެވެ.

ކޯވިޑްގެ ޙާލަތުގައި ވަޒީފާ ގެއްލުމާއި ވަޒީފާއަށް ނޭދެވޭ އަސަރުކުރުމާއި ގުޅިގެން ދިރިއުޅުމުގެ ޚަރަދު ބެލެހެއްޓުމުގައި ދަތިތަކެއް ކުރިމަތިވުމުގެ ސަބަބުން މާލެއިން ރަށްރަށަށް ބަދަލުވާން އެދޭ ފަރާތްތަކަށް އަމާޒުކޮށްގެން ކުރިއަށްގެންދާ މި ޕްރޮގްރާމަކީ ސަރުކާރުގެ ސްޓްރެޓީޖިކް އެކްޝަން ޕްލޭންގެ އޯގާތެރި ސަރުކާރު ސިޔާސަތުގެ ދަށުން އިޖުތިމާއީ ރައްކާތެރިކަމާއި ގަދަރުވެރި އާއިލާ އެއް ބިނާ ކުރުމުގެ އިތުރުން ޖަޒީރާ ދިރިއުޅުމާއި، ލާމަރުކަޒީ އުސޫލުން އިދާރީ ދާއިރާތައް ހިންގުންމާއި ގުޅުވައިގެން ހިންގުމަށް ހަމަޖެހިފައިވާ ޕްރޮގްރާމެކެވެ.

ކޯވިޑްގެ ސަބަބުން ސަރުކާރުގެ ޚަރަދުކުރުމުގެ ސިޔާސަތުތަކަށް ގެނެވުނު އިސްލާޙުތަކާއެކު އަހުލު ޕްރޮގްރާމަށް ވަނީ 25 މިލިއަން ރުފިޔާގެ ބަޖެޓެއް ކަނޑައަޅާފައެވެ. 2020 ވަނަ އަހަރުން ފެށިގެން ކުރިއަށްގެންދާ މިޕްރޮގްރާމަށް ކަނޑައަޅާފައިވާ ބަޖެޓުގެ ތެރެއިން 10 މިލިއަން ރުފިޔާ ހަމަޖެހިފައިވަނީ މިއަހަރު ރަށްރަށަށް ބަދަލުކުރުމަށް ހަމަޖެހިފައިވާ 500 ޢާއިލާއަށް ލޯނުގެ އެހީ ދިނުމަށްކަމަށް ސަރުކާރުން ވިދާޅުވެއެވެ.

އަމިއްލަ ރަށަށް ބަދަލުވުމުގެ ފުރުސަތު "އަހުލު" ޕްރޮގްރާމާއެކު

މި ޕްރޮގްރާމް މިދިޔަ އަހަރު ރަސްމީކޮށް ފެށުމުގެ ކުރިން 13 ޢާއިލާއަކުން ވަނީ އަމިއްލައަށް ރަށަށް ބަދަލުވެފައެވެ. އެއާއެކު މިކަންކުރުމަށް ރައްޔިތުންނަށް ގިނަ ދަތިތަކެއް ކުރިމަތިވާކަން ވަނީ އެނގިގެން ގޮސްފައެވެ. އޭގެ ސަބަބުން ސަރުކާރުން އިންޓްރެސްޓާއިނުލާ 3 އަހަރު ދުވަހުގެ ތެރޭގައި ދައްކާ ޚަލާސްކުރާގޮތަށް 20 ހާސް ރުފިޔާގެ ލޯން އެހީއާއެކު އެމީހަކު ދިރިއުޅޭނެ ތަނެއް ރަށުގައި ހޯދުމަށް ފަސޭހަވާނެއެވެ. މީގެ ދަށުން މާލީ ގޮތުން ޢާއްމު ޙާލަތަކަށް އަންނަންދެން ކޮންމެ ޢާއިލާއަކަށް 6 މަސްވަންދެން 3000 ރުފިޔާގެ ޢިނާޔަތް ދިނުމަށްވެސް ސަރުކާރުން ވަނީ ނިންމަވާފައެވެ.

ހަމައެއާއެކު އަސާސީ ޚިދުމަތްތައްކަމުގައި ބެލެވޭ ކަރަންޓާއި، ފެން އަދި ނަރުދަމާއަށް ކަނޑައެޅޭ ރޭޓަކުން އެހީގެ ފޯރުކޮށްދިނުމަށްވެސް ވަނީ ނިންމާފައެވެ. އަދި ބަދަލުވާ އާއިލާގައި ހިމެނޭ ފަރާތްތަކަށް ވަޒީފާގެ ފުރުސަތުތައް ފަހިކޮށްދިނުމަށް އެރަށެއްގެ ކަމާ ގުޅޭ އިދާރާތަކާއެކު މަސައްކަތްކޮށް މިޙާލަތުގައި ބަދަލުވާ ކުދިންނަށް ސްކޫލްތަކުން ޖާގަ ހަމަޖެއްސުމުގައިވެސް ސަރުކާރުން ދަނީ އެހީތެރިކަން ފޯރުކޮށްދެމުންނެވެ.

އަހުލު ޕްރޮގްރާމްގެ ދަށުން ރަށަށް ބަދަލުވުމަށް ކުރިއަށްގެންދާ ޕްރޮގްރާމްގައި އެންމެ ފުރަތަމަ މާލެއިން އަތޮޅު ތެރޭގެ ރަށްރަށަށް ބަދަލުވާން ބެނުންވާ ފަރާތްތަކަށް ފުރުސަތު ހުޅުވާލިނަމަވެސް ކުރިއަށް އޮތްތަނުގައި އަތޮޅުތެރޭގެ ރަށްރަށުން އެހެން ރަށަކަށް ބަދަލުވާ ފަރާތްތަކަށް އެފުރުސަތު ހުޅުވާލާނެކަމަށް ސަރުކާރުން ހާމަކުރައްވައެވެ. މިގޮތުން އެހީއަށް އެދި ހުށައެޅުމަށް ޖެންޑަރ މިނިސްޓްރީއިން ދޫކުރާ "ހާލަތު ބަދަލުވުމުގެ ސަބަބުން އަތޮޅުތެރެއަށް ދިރިއުޅުން ބަދަލުކޮށް ވަޒަންވެރިވާން އަމިއްލައަށް އެދޭ ފަރާތްތަކުން އެހީތެރިކަމަށް އެދި ހުށަހަޅާ ފޯމު" އެރަށެއްގެ ކައުންސިލަށް ހުށައެޅުމުގެ ފުރުސަތު ވަނީ ހުޅުވާލާފައެވެ.

އޯގާތެރި ސަރުކާރު ތަސައްވުރު ބައްޓަންކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ސަރުކާރުން ގިނަ މަސައްކަތްތަކެއް ކުރައްވަމުން އަންނައިރު، ދިވެހިރާއްޖޭގައި ދިރިއުޅޭ ކޮންމެ މީހަކީ، ޤަރުބަގަތީއްސުރެ ނެތިދިއުމަށް ދާންދެން އިޖުތިމާޢީ ރައްކާތެރި ނިޒާމުގެ ހިޔާ ދަށުގައި ދެމިހުންނާނޭ މީހެއްކަން ކަށަވަރުކުރުމަކީ ސަރުކާރުގެ އަމާޒެވެ. އަދި ސަރުކާރުން އެކި ގޮތްގޮތުން ފޯރުކޮށްދޭ އެހީތަކުން އެއްކޮޅަށް ބަރުވެފައިވާ އިޤްޠިޞާދުގެ ތިލަފަތް އެއްވަރުކުރުމަކީ މިކަމުގެ އެންމެ ބޮޑު އެއް މަޤްޞަދެވެ.