އަންނަ ބޮޑު އީދުދުވަހުގެ ހަވީރަކީ މާލޭގައި ހިނގައިފައި އުޅޭ ވަގުތެއްކަމުގައި މާލޭ ސިޓީ ކައުންސިލުން ހަމަޖައްސައިފިއެވެ.
މާލޭ ސިޓީ ކައުންސިލްގެ މޭޔަރ ޑރ. މުހައްމަދު މުއިއްޒު ވިދާޅުވީ އަންނަ އަޟްހާ އީދުދުވެހު ހަވީރު 16:00 އިން ރޭގަނޑު 20:00 މާލޭގައި ހިނގާފައި އުޅޭ ވަގުތެއްގެ ގޮތުގައި ކަނޑައަޅާފައިވާކަމަށެވެ. މި ގަޑީގައި ވެހިކަލް ދުއްވުން މަނާ ނަމަވެސް ސަލާމަތީ ހިދުމަތްތަކުގެ އުޅަނދުފަހަރާއި އެމަޖެންސީގައި ކޮންމެހެން ދުއްވަންޖެހޭ ވެހިކަލްތައް ދުއްވުމުގެ ހުއްދަ އޮންނާނެކަމަށެވެ.
މޭރަރ މުއިއްޒު ވިދާޅުވީ ކައުންސިލްގެ ނިންމުން މިހާރު ފުލުހުންނާއި މަޝްވަރާކޮށްފައިވާކަމަށެވެ. އަދި އީދދު ދުވަހުގެ ހަވީރު ހިނގާފައި އުޅޭ ވަގުތެއްގެ ގޮތުގައި ކަނޑައެޅީ ރައްޔިތުންގެ ހިޔާލު ހޯދުމަށްފަހުކަމަށްވެސް މުއިއްޒު ވިދާޅުވިއެވެ.
މުއިއްޒު ވިދާޅުވީ ރައްޔިތުންގެ ލަފަޔަށް އެދުމުން ގިނަދުވަސްތަކެއް ލޮކްޑައުންގައި ތިބުމަށްފަހު ލުއި ލިބުމުން ގިނަ ރައްޔިތުން އާއިލާތަކާއި އެކު ނުކުމެ ހިތްހަމަޖެހޭ ވަގުތުކޮޅެއް ހޭދަކޮށްލަން ބޭނުންވާކަމަށް ބުނެފައިވާކަމަށެވެ.
ކޯވިޑާއި ގުޅިގެން އަޅާފައިވާ ފިޔަވަޅުތަކަށް ލުއި ދިނުމުން ގިނަ ބަޔަކު އަންނަނީ މި ބަންދާއި ދިމާކޮށް އަތޮޅުތަކަށް ދަތުކުރަމުންނެވެ. އިއްޔެއާއި މިއަދުވެސް ގިނަ އަދަދެއްގެ ބަޔަކު ވަނީ މާލެއިން ބޭރަށް ފުރާފައެވެ.
މި އަހަރުގެ ބޮޑު އީދުދުވަހަކީ އަންނަ އަންގާރަ ދުވަހެވެ. ބޮޑު އިދާއި މިނިވަންދުވަސް ހިމެނޭ ގޮތަށް މިމަހުގެ ބާކީ މިއޮތް 15 ދުވަހަކީ ބަންދުދުވަސްތަކެއްގެ ގޮތުގައި ސަރުކާރުން ވަނީ ކަނޑައަޅުއްވާފައެވެ.