ޙަމަލާބަދަލުކުރުން ހުއްޓައިލުމުގެ އެއްބަސްވުމެއް ޤާއިމުކުރުމަށް މަޝްވަރާކުރާނީ ޓިގުރައިގައި ޙަރަކާތްތެރިވާ ސިފައިންގެ ފައުޖުތައް އެ ސަރަޙައްދުން ދިޔުމުންކަމަށް ޓިގްރައި ޕީޕަލްސް ލިބަރޭޝަން ފުރަންޓު، ޓީޕީއެލްއެފުން ބުނެފިއެވެ.
ފާއިތުވި އަށް މަސް ދުވަހުގެ ތެރޭގައި ޓީޕީއެލްއެފުގެ ބާރުގެ ދަށުގައި އޮތް މުހިންމު ސަރަޙައްދުތައްވަނީ އިތިޔޯޕިޔާގެ ސަރުކާރުގެ ބާރުގެ ދަށަށް ގެނެސްފައެވެ. އެ ގޮތުން އެ ސަރަޙައްދުގެ ވެރިރަށް މެކެލޭވެސްވަނީ ސަރުކާރުގެ ބާރުގެ ދަށަށް ގެންގޮސްފައެވެ. އެއާއެކު އިތިޔޯޕިޔާގެ ފައުޖުތަކާއި ޓީޕީއެލްއެފާ ދެމެދު ބޮޑެތި ކުރިމަތިލުންތަކެއްވަނީ ހިނގައިފައެވެ.
ފާއިތުވި ދުވަސްތަކުގައި ޓީޕީއެލްއެފުންވަނީ އިތިޔޯޕިޔާގެ އަސްކަރިއްޔާއާ ދެކޮޅަށް ވަރުގަދަ ޙަމަލާތައް ދީފައެވެ. އެ ޙަމަލާތަކުގައި މެކެލޭވަނީ ޓީޕީއެލްއެފުގެ ފުރިހަމަ ބާރުގެ ދަށަށް އަނެއްކާވެސް ގެންގޮސްފައެވެ. އެއާއެކު އަށް މަސް ދުވަހަށްފަހު ހަނގުރާމައިގެ މައިދާނަށްވަނީ ބޮޑެތި ބަދަލުތަކެއް އައިސްފައެވެ. އެ ސަރަޙައްދުގައި ޙަރަކާތްތެރިވާ އަސްކަރީ ފައުޖުތައް އެ ސަރަޙައްދުން ފަހަތަށް ޖެއްސުމުން ސަރުކާރުންވަނީ ޙަމަލާބަދަލުކުރުން ހުއްޓައިލުމަށް ހުށަހަޅައިފައެވެ. ނަމަވެސް ޓީޕީއެލްއެފުންވަނީ އެ ހުށަހެޅުން ބަލައިނުގަންނާނެކަމަށް ބުނެފައެވެ.
ޓީޕީއެލްއެފުން ނެރުނު ބަޔާނެއްގައި ބުނީ އެ ޖަމާޢަތުން ސަރުކާރުގެ ހުށަހެޅުން ބަލައިގަންނާނީ ޓިގުރައި ސަރަޙައްދަށް އިތުރު ޙަމަލާތައް ނުދޭނެކަމުގެ ފުރިހަމަ ޔަޤީންކަން ލިބުމުންކަމަށެވެ. އަދި އެފަދަ އެއްބަސްވުމެއް ޤާއިމުކުރުމުގެ ކުރިން ފުރިހަމަވާންޖެހޭ ޝަރުތުތަކެއް ހުރިކަމަށްވެސް ޓީޕީއެލްއެފުން ބުނެއެވެ. އެ ގޮތުން ސަރުކާރުގެ ފައުޖުތަކަށް އެހީތެރިވަމުންދާ އެރުތުރެޔާގެ ފައުޖުތަކާއި އަމްހާރާ ސްޓޭޓުގެ ފައުޖުތައް ޓިގުރައިން ފޭބުމަކީ ޝަރުތެއްކަމަށް ޓީޕީއެލްއެފުން ބުނެއެވެ. އެ ޖަމާޢަތުގެ ޝަރުތުތަކާމެދު ސަރުކާރުން މިހާތަނަށް އެއްވެސް އެއްޗެއް ބުނެފައެއް ނުވެއެވެ.
ފާއިތުވި އަށް މަސް ދުވަހު ސަރުކާރާއި ޓީޕީއެލްއެފުން ބަދަލުކޮށްފައިވާ ޙަމަލާތަކުގައި އެތައް ހާސް މީހުންވަނީ މަރުވެފައެވެ. އަދި 2 މިލިޔަނަށްވުރެ ގިނަ މީހުންގެ ގެދޮރު ގެއްލި 350،000 މީހުންވަނީ ބަނޑުހައިހޫނުކަމާއި ކުރިމަތިލާންޖެހިފައެވެ.