އާދީއްތަ ދުވަހުން ފެށިގެން އޮފީސްތައް ހުޅުވައިގެން މަސައްކަތްކުރާނީ، ޢަމަލުކުރާނީ ޚާއްސަ އުސޫލަކަށް!
އަންނަ އާދިއްތަ ދުވަހުން ފެށިގެން ސަރުކާރުގެ އޮފީސްތައް ހުޅުވައިގެން މަސައްކަތްކުރަން ނިންމައި އެކަމުގައި ޢަމަލުކުރަންޖެހޭ އުސޫލުތަކާއި މިންގަނޑުތައް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މިއަދު ހަމަޖައްސަވައިފިއެވެ. ސަރުކާރުގެ އޮފީސްތަކަށްވަނީ މިއުސޫލުތަކުގެ ތެރެއިން އެތަންތަން ހިންގުމަށް އަންގަވާފައެވެ.
ރާއްޖޭގައި ކޯވިޑް-19ގެ ޙާލަތު ގޯސްވެގެން ދިއުމާގުޅިގެން ވަނީ ސަރުކާރުގެ އޮފީސްތައް ހުޅުވައިގެން މަސައްކަތް ނުކުރުމަށް ނިންމާފައެވެ. އެންމެ ފަހުން އެމުއްދަތު އިތުރުކޮށްފައި މިވަނީ މި މަހުގެ 3 ވަނަ ދުވަހާ ހަމަޔަށެވެ. އަދި މިމަހުގެ ހަތަރެއްވާ އާދިއްތަ ދުވަހަކީ ސަރުކާރުގެ އޮފީސްތައް ހުޅުވައިގެން މަސައްކަތް ނުކުރާން ނިންމާފާއޮތް އޮތުން ނިމުމަކަށް އައިސް އޮފީސްތައް ހުޅުވައިގެން މަސައްކަތް ކުރަން ފަށަން ނިންމާފައި އޮތް ދުވަހެވެ.
އާދިއްތަ ދުވަހުން ފެށިގެން އޮފީސްތައް ޢާންމުކޮށް ހުޅުވައިގެން މަސައްކަތް ކުރަން ރައީސުލްޖުމްހޫރިއްޔާ ނިންމަވާފައި މިވަނީ މިންގަނޑުތަކަކާއި އުސޫލުތަކަކާއެކުއެވެ.
އޭގެތެރޭގައި ކޯވިޑް-19 ކޮންޓްރޯލް ކުރުމަށްޓަކައި މިބަލި ޖެހިފައިވާ މީހުން ތިބިކަމަށް ހެލްތް ޕްރޮޓެކްޝަން އޭޖެންސީ (އެޗް.ޕީ.އޭ)އިން ހާމަކުރައްވާ ރަށްރަށުގައި ހުރި ސަރުކާރުގެ އޮފީސްތަކުން ޚިދުމަތް ދިނުމުގައްޔާއި، މުވައްޒަފުން މަސައްކަތަށް ނެރުމުގައި ޢަމަލުކުރަން ނިންމަވާފައިވާ އުސޫލުގައިވަނީ، ގޭގައި ތިބެގެން ކުރެވޭނެ މަސައްކަތްތައް ގޭގައި ތިބެގެން ކުރާގޮތަށް މުވައްޒަފުންނަށް އެންގެވުމަށެވެ. އަދި މިނިސްޓަރު ނުވަތަ އިދާރާގެ އިސްވެރިޔާ ކަނޑައަޅުއްވާ ގޮތެއްގެ މަތިން، އެއްފަހަރާ ވީހައިވެސް މަދު މުވައްޒަފުން އޮފީހަށް ނެރެގެން މަސައްކަތްކުރެވޭނެ ގޮތަށް މަސައްކަތްތައް ރޭވުމަށް މިއުސޫލުގައި ވެއެވެ. މީގެ އިތުރުން މުވައްޒަފުން ޓީމުތަކަކަށް ބަހައިލައިގެން މަސައްކަތު ހަފުތާގެ އެކި ދުވަހު އެކި ޓީމުތައް މަސައްކަތަށް ނެރެގެން މަސައްކަތް ކުރުވެން ހުރި އިދާރާތަކުން އެގޮތަށް މަސައްކަތްކުރެވޭނެ އިންތިޒާމުތައް ހަމަޖެއްސުމާއި، އިދާރާއިން ދޭ ޚިދުމަތްތަކުގެ ބާވަތަށާއި، ދޭ ޚިދުމަތްތަކުގެ މިންވަރަށާއި، ޚިދުމަތް ދިނުމަށް ލިބިފައިވާ ވަސީލަތްތަކަށާއި، މުވައްޒަފުންގެ އަދަދަށް ބަލައި، އިދާރާއިން ދޭ ޚިދުމަތްތައް މަސައްކަތު ހަފުތާގެ އެކި ދުވަސްތަކަށް ބަހައިލައި، އެކި ދުވަސްތަކުގައި އެކި ޚިދުމަތް ދޭ ގޮތަށް ހަމަޖެއްސުންވެސް މިއުސޫލުގައި ހިމެނެއެވެ.
މީގެ އިތުރުން އާދީއްތަ ދުވަހުން ފެށިގެން ސަރުކާރުގެ އޮފީސްތައް ހުޅުވުމާއެކު، ރަސްމީގަޑީގެ ތެރޭގައި މަސައްކަތް ނިންމުމަށް މުވައްޒަފުންނަށް ބާރުއެޅުމާއި، ނުރަސްމީގަޑީގައި މުވައްޒަފުން މަސައްކަތްކުރަން ނުޖެހޭގޮތަށް އޮފީހުގެ މަސައްކަތްތައް ރޭވުމަކީ ސަރުކާރުގެ ހުރިހާ އިދާރާއަކުން ޢަމަލުކުރަންޖެހޭ އުސޫލެއްގެގޮތުގައި ވަނީ ހަމަޖައްސަވާފައެވެ. ދަންފަޅި އުސޫލުން މަސައްކަތް ކުރާ އިދާރާތައް ފިޔަވައި، ސަރުކާރުގެ އެހެން އިދާރާތަކުން ކޮންމެހެން ކުރަންޖެހޭ މަސައްކަތެއް ކުރުމަށްޓަކައި މެނުވީ މެންދުރުފަހު 2:00ގެ ފަހުން އޮފީސް ހުޅުވައިގެން މަސައްކަތް ނުކުރުމަށްވެސް ވަނީ ކަނޑައަޅުއްވާފައެވެ. އަދި ކޯވިޑް-19 އާ ގުޅިގެން ސަރުކާރުގެ އިދާރާތަކުން އޮންލައިންކޮށް ދޭން ފެށި ޚިދުމަތްތައް އެގޮތަށް ދެމުން ގެންދިއުމަށާއި އޮންލައިންކޮށް ދެވެންހުރި އިތުރު ޚިދުމަތްތަކަކީ ކޮބައިތޯ ބަލައި، އެ ޚިދުމަތްތައް އޮންލައިންކޮށް ދެވޭނެ އިންތިޒާމުތައްވެސް ހަމަޖައްސަމުން ގެންދިޔުމަށް ވަނީ ނިންމަވާފައެވެ. މިއާއެކު ސަރުކާރުގެ އޮފީހަކުން ކޮންމެހެން ކުރަންޖެހޭ މަސައްކަތެއް ކުރުމަށްޓަކައި، ނުރަސްމީގަޑީގައި އިދާރާ ހުޅުވައިފައި ބަހައްޓަންޖެހޭ ހާލަތްތަކުގައިވެސް، އެންމެ ލަސްވެގެން ހަވީރު 4:00ގެ ފަހުން އިދާރާ ހުޅުވައިފައި ނުބެހެއްޓުމަށް ވަނީ ކަނޑައަޅުއްވާފައެވެ.
އޮފީސްތަކުގައި މަސައްކަތްކުރާއިރު ޞިއްޙީ ރައްކައުތެރިކަމަށް ސަމާލުކަން ދިނުމަށާއި މަސައްކަތު މާޙައުލުގެ ސާފުތާހިރުކަމަށާއި އިޖުތިމާޢީ ގައިދުރުކަމަށް އަޅަންޖެހޭ ފިޔަވަޅުތައް އެޅުމަށްވެސް ސަރުކާރުންވަނީ އޮފީސްތަކަށް އަންގަވާފައެވެ. އަދި އެޗްޕީއޭގެ ލަފަޔާއި މަޝްވަރާގެ މަތިން ސިވިލް ސަރވިސް ކޮމިޝަނުން ކަނޑައަޅާ ފިޔަވަޅުތައް ސަރުކާރުގެ އިދާރާތަކުން ތަންފީޒުކުރުމަށާއި، އޮފީހުން ކުރާ ކަރުދާހުގެ ޚަރަދާއި، ޕްރިންޓްކުރުމުގެ ޚަރަދު ކުޑަކުރެވޭނެ ގޮތްތައް ހޯދައިގެން އެގޮތަށް މަސައްކަތްކުރެވޭނެ އުސޫލުތައް ހަދައި، އެ އުސޫލުތައް ތަންފީޒުކުރުމަށާއި، ލިޔެކިއުންތައް ވީވަރަކުން ޑިޖިޓަލައިޒް ކޮށްގެން "ޕޭޕަރލެސް" މަސައްކަތުގެ މާޙައުލެއް އޮފީހުގައި ޤާއިމުކުރުމަށްވެސް ވަނީ އަންގަވާފައެވެ. އަދި ސަރުކާރުގެ ޚަރަދުތައް ކުޑަކުރުމުގެ ގޮތުން، ޚަރަދު ކުޑަކުރުމަށް އެޅެން ހުރި ފިޔަވަޅުތައް އެޅުމަށްވެސް ވަނީ އޮފީސްތަކަށް އަންގަވާފައެވެ.