މިނިވަން ނޫހުގެ ނޫސްވެރިޔާ އަހުމަދު ރިޟްވާން ޢަބްދުﷲ ވީނުވީއެއް ނޭނގޭ ގޮތަށް ގެއްލުވާލަން ހިންގި އަމަލު ދައްކުވައިދޭ ރީއެނެކްޓްމެންޓް ވީޑިއޯއެއް މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހްޤީގުކުރާ ކޮމިޝަނުން މިއަދު އާންމުކޮށްފިއެވެ. ކޮމިޝަނުން އާންމުކުރި މިވީޑިއޯގައިވެސް ރިޟްވާންގެ މައްސަލައާ ގުޅޭ މައުލޫމާތު ހިއްސާކޮށް ދިނުމަށްވަނީ އެދިފައެވެ.
މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަޙުޤީގުކުރާ ކޮމިޝަނުން ޢާންމުކުރި ހަތަރު މިނެއްޓެއްހާ ދިގުމިނުގެ ވީޑިއޯއިން ފެނިގެންދަނީ 7 އޮގަސްޓް 2014 ވީ ބުރާސްފަތި ދުވަހުގެ ރޭ ރިޟްވާން ގަދަކަމުން ކާރަކަށް އަރުވައިގެން ގެންދިޔަ ހާދިސާ ދައްކުވައިދޭ ވީޑިއޯއެކެވެ. އަދި މި ވީޑިއޯގައި ރިޟުވާނު ގަދަކަމުން ކާރަށް އަރުވަން އުޅުމުގެ ތެރޭގައި މަގުމައްޗަށް ވެއްޓިފައި އޮއްވާ ފެނުނު ވަޅީގެ މަޢުލޫމާތު ހޯދުމަށްކުރާ މަސައްކަތްތަކާއި ކާރުގެ ދޮރެއް ނުލެއްޕިހުރި މަންޒަރުގެ އިތުރުން ކާރުގެ ކުލަވެސް ދައްކުވައިދީފައެވެއެވެ. އަދި ޖުމްލަ ގޮތެއްގައި މާލެއިން ހުޅުމާލެއަށް ދަތުކޮށް ރިޟްވާން ދިރިއުޅެމުންދިޔަ 21 ނަންބަރު ފްލެޓް ސަރަޙައްދަށް ދިޔަ މަންޒަރުތަކާއި ރަހީނުކޮށްގެން ގެންދިޔަ މަންޒަރު ދައްކުވައިދީފައެވެ.
މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަޙުޤީގުކުރާ ކޮމިޝަނުން ވިދާޅުވީ މި ހާދިސާއާގުޅޭ މައުލޫމާތު އެނގޭ ފަރާތްތައް އާންމުންގެ ތެރޭގައި އަދިވެސް ތިބެދާނެ ކަމަށް ގަބޫލުކުރެވޭކަމަށެވެ. ރިޟްވާންގެ މައްސަލައާއި ގުޅިގެން ޝަރީއަތަށް ސާބިތުކުރެވޭވަރުގެ މައުލޫމާތު ފޯރުކޮށްދޭ ފަރާތަކަށް ފަސްލައްކަ ރުފިޔާ ދިނުމަށްވެސް ކޮމިޝަނުންވަނީ ހުށައަޅާފައެވެ. އަދި ރިޟްވާންގެ މައްސަލައާއި ގުޅިގެން އެފަދަ މައުލޫމާތެއް އެނގޭ ފަރާތެއްވާނަމަ ލަސްނުކޮށް އެމައުލޫމާތެއް ހިއްސާ ކުރުމަށް ކޮމިޝަނުން ވަނީ އެދިފައެވެ.
މީގެ އިތުރުން މި ވީޑިއޯއާއެކު ކޮމިޝަނުން ކުރާ މަސައްކަތްތަކަށް އެއްބާރުލުން ދިނުމަށާއި، ރިޟްވާންއާ ގުޅޭ އެއްވެސް މައުލޫމާތެއް އެނގިފައިވާ ފަރާތެއްވާނަމަ އެކަން ކޮމިޝަނަށް އަންގައިދިނުމަށް ރިޟްވާންގެ ދައްތަ ފާޠިމަތު ޝެހެނާޒްގެ އިލްތިމާސްގެ މެސެޖެއްވެސްވަނީ ޙިއްސާކޮށްފައެވެ.
މިއީ މ.ޝައިނިންގ ސްޓަރ، އަހުމަދު ރިޟްވާން ޢަބްދުﷲ ވީނުވީއެއް ނޭނގޭ ގޮތަށް ގެއްލުވާލާފައިވާ މައްސަލާގައި ރިޔާސީ ކޮމިޝަނުން ތައްޔާރުކޮށްފައިވާ ރީއެނެކްޓްމެންޓް ވީޑިއޯއެއް https://t.co/Q2L9otBNuv
— Commission on Disappearances and Deaths (@DdcomMdv) July 1, 2021
މި ވީޑިއޯގައި ހިމެނޭ ގިނަ މަޢުލޫމާތުތަކަކީ މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަޙުޤީގުކުރާ ކޮމިޝަނުންނާއި ފުލުހުންވެސް ހާމަކޮށްފައިވާ މައުލޫމާތުތަކެކެވެ.
އެގޮތުން ރިޟުވާނު ގެއްލުމަކީ ބަޔަކު ދުރާލާ ރާވައިގެން ހިންގި އަމަލެއްކަން ހާމަކޮށް 2016ވަނަ އަހަރު ފުލުހުން ވިދާޅުވަފައިވަނީ 2014 އޮގަސްޓް ހަތްވަނަ ދުވަހުގެރޭ ދަންވަރު ރިޟުވާނު ހުޅުމާލެއަށް ދިޔަކަން ތަހުގީގަށް އެނގިފައިވާ ކަމަށާއި، އޭގެފަހުން އޭނާ އެއްވެސް ތަނަކުން ފެނިފައި ނުވާކަމަށެވެ. އެހެންނަމަވެސް ހަމަ އެރޭ ހުޅުމާލޭގައި ރިޟުވާނު ދިރިއުޅޭ ފްލެޓް ސަރަހައްދުން މީހެއްގެ ހަޅޭކުގެ އަޑު އިވުނުކަމަށާއި، އެވަގުތު އެތަނުންދިޔަ ކާރެއްގެ ދޮރު ނުލައްޕާ ހުރި ކަމަށާއި، އަދި އެ ކާރުގެ ތެރެއިން މީހަކު އަތްހޫރަމުން ދިޔަކަން ތަޙުޤީގަށް އެނގިފައިވާ ކަމަށެވެ.
އަދި ފުލުހުންނަށް އެ މައުލޫމާތުު ލިބިގެން އެތަނަށް ދިޔައިރު އެ ސަރަހައްދުގައި ކާރު ފެންނަން ނެތްނަމަވެސް އެ ސަރަހައްދުން ބެނެޓް ވަޅިއެއް ފެނިފައިވާކަމަށް ފުލުހުން އޭރުވަނީ ވިދާޅުވެފައެވެ. އަދި އެކާރުން ނެގި ސާމްޕަލްތަކުން ބައެއް ރިޟުވާނުގެ މަންމަގެ ޑީ.އެން.އޭއާއި ދިމާވާކަމަށްވެސް ފުލުހުންވަނީ އޭރު ވިދާޅުވެފައެވެ.
ނޫސްވެރިޔާ އަހުމަދު ރިޟްވާން ގަދަކަމުން އެރުވިކަމަށް ބެލެވޭ ރަތް ކާރަކީ އެ މައްސަލާގައި ޓެރެރިޒަމްގެ ދައުވާ އުފުލި، ހ. ހިލްޓަން އާލިފް ރައޫފްގެ ކާރެއް ކަމަށް މިމައްސަލައިގައި ދައުލަތުން ކޯޓަށް ހުށަހެޅި ހެކިވެރިޔަކުވަނީ ބުނެފައެވެ.
ނަމަވެސް އެމައްސަލައިގަ ހ. ހިލްޓަން، އާލިފް ރައޫފާއި އިތުރު މީހެއްގެ މައްޗަށް ދައުވާކޮށް ދަށު ކޯޓުގައި ޝަރީއަތް ހިންގި ސާބިތުވެފައެއް ނުވެއެވެ.