ޓެރަރިޒަމްގެ ޢަމަލުތައް ހިންގާ މީހުން ހައްޔަރުކުރުމަށް ޤާނޫނަށް އިސްލާހުގެންނަންޖެހޭ - ރައީސް
ޓެރަރިޒަމާއި ހަރުކަށި ފިކުރުގެ ޢަމަލުތައް ހިންގާ މީހުންނާއި ގޭންގު ކުށްތަކަށް އަރައިގަންނަ މީހުންގެ މައްސަލައަށް ފުރިހަމަ ދާއިމީ ޙައްލެއް ގެނެވޭނީ ޓެރެރިޒަމްގެ ޤާނޫނަށް އިސްލާހުތަކެއް ގެނެސްގެންކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އެމަނިކްފާނު ވިދާޅުވީ އެފަދަ ކުށްކުރާ މީހުން ތަހުޤީޤަށް ބަންދުކޮށް ބޭތިއްބުމުގައި، މިހާރުއޮތް ޤާނޫނަށް އިތުރު އިސްލާހުތަކެއްގެންނަން ޖެހޭކަމަށްވެސް ރައީސްވިދާޅުވިއެވެ.
ރައީސް އޮފީހުގައި އޮންލައިންކޮށް ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ދެންނެވި ސުވާލަކަށް ޖަވާބުދެއްވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވިދާޅުވީ، ޓެރަރިޒަމްގެ ޢަމަލުތަކާއި ގޭންގް ކުށްތަށް ތަހުޤީޤު ކުރާ ފަރާތްތަކުގެ ޝަކުވާއަކީ އެފަދަ ކުށްތަކަށް އަރައިގަންނަ މީހުން ތަހްޤީޤަށް ބަންދުކޮށްކޮށް ބޭތިއްބުމުގައި ޤާނޫނަށް ގެންނަންޖެހޭ އިސްލާހުތަކެއް ހުރިހަމުގެ ޝަކުވާކަމަށެވެ. ރައީސް ވިދާޅުވީ ޓެރަރިޒަމްގެ ޢަމަލުތަކާއި ގޭންގު މާރާމާރީއަކީ މިއަދު ކުއްލިއަކަށް ރާއްޖެއަށް ކުރިމަތިވެގެން އުޅޭ ކަމެއް ނޫން ކަމަށާ، އެއީ މި ސަރުކާރު ވެރިކަމަށް އައުމުގެ ކުރިންވެސް އޮތްކަމެއް ކަމަށެވެ. އެހެންކަމުން އެކަންކަން ޙައްލުކުރުމުގެ މަސައްކަތަކީ ބޮޑު އެހާމެ އުނދަގޫ ކަމެއްކަން ރައީސް ފާހަގަކުރެއްވިއެވެ.
ޓެރަރިޒަމްގެ ކުށްތަކާ ގުޅިގެން ރައީސް ވިދާޅުވީ ދިވެހިރާއްޖޭގައި ޓެރަރިޒަމްގެ އަމަލުތައް ހިންގާ މީހުން ދެނެގަނެ އެކަން އެންމެފުރަތަމަ އާންމުކުރީވެސް މިސަރުކާރުން ކަމަށެވެ. އެގޮތުން 19 ސެޕްޓެމްބަރު 2019ގައި ފުރަތަމަ ފަހަރަށް ޓެރަރިސްޓު ޖަމާޢަތްތަކެއް ގޮތުގައި ބެލެވޭ ޖަމާޢަތްތައް ސަރުކާރުން އިޢުލާނުކޮށްފައި ވާކަން ރައީސް ފާހަގަކުރެއްވިއެވެ. އަދި އެއީ ޓެރަރިޒްމްގެ ޤާނޫނުގެ ދަށުން ކުރަންޖެހޭ އެކަމަކު އެހާތަނަށް ނުކޮށްއޮތް ކަމެއްކަން ރައީސް ފާހަގަކުރެއްވިއެވެ.
ރާއްޖޭގައި ޓެރަރިޒަމާއި އެފަދަ ނުރަށްކާތެރި ކުށްތަކަށް އަރައިގަންނަ، ނުރައްކާތެރިހާހެއްހައި މީހުން ތިބިކަން ހާމަކޮށް ކޮމިޝަނަރ އޮފް ޕޮލިސްް ބަޔާނެއް ނެރުއްވާފައި ވާކަން ރައީސް ފާހަގަކުރެއްވިއެވެ. އަދި އެފަދަ ޢަމަލުތަށް ހިންގަފާނެކަމަށް ޝައްކުކުރެވޭ މީހުން ބަންދުކޮށްގެން ތަހްޤީޤީގްކޮށް ޝަރީއަތާ ހިސާބަށް ގެންދިއުމަށް މަސައްކަތްތަކެއް ކުރުމަށް ތަހްޤީޤީ އިދާރާތަކާ މަޝްވަރާ ކޮށްފައިވާނެކަމަށްވެސް ރައީސް ވިދާޅުވިއެވެ.
އެގޮތުން ޓެރަރިޒަމްގެ ޤާނޫނަށް އިސްލާހުތަކެއް ގެންނަން ޖެހޭކަމަށް ތަހްޤީޤީ އިދާރާތަކުން ރައީސަށް ދަންނަވާފައިވާކަން އެމަނިކުފާނުވަނީ ހާމަކުރައްވާފައެވެ. އެހެންކަމުން ޤާނޫނަށް އިސްލާހުގެނައުމަށްޓަކައި 10 އޮކްޓޯބަރު 2019ގައި ރައްޔިތުންގެ މަޖިލީހަށް ބިލެއް ފޮނުއްވައި އިސްލާހުތަކެއް ގެނެވުނު ނަމަވެސް، އެކިއެކި ސަބަބުތަކާ ހެދި، ތަހްޤީޤީ އިދާރާތަކުން ބޭނުންވިފަދަ ހުރިހާ އިސްލާހުތަކެއް މިހާތަނަށް އަދި ގެނެވިފައި ނުވާކަން ރައީސް ފާހަގަކުރެއްވިއެވެ. ރައީސް ވިދާޅުވީ ތަހްޤީޤީ އިދާރާތަކުންދޭ ލަފަޔާ އެއްގޮތަށް ޤާނޫނީ އިމުގެ ތެރެއިން ޓެރަރިޒަމްފަދަ ކުށްތައް ހުއްޓުވުމަށްޓަކައި ޤާނޫނަށް ގެންނަން ޖެހޭބަދުލު ގެނައުމަށް ޤާނޫނު އިސްލާހުކުރުމަށް މިހާރު ވާނީ އަނެއްކާވެސް މަޖިލީހަށް ހުށަހަޅާފައިކަމަށެވެ.