ބައެއް މީޑިއާތަކުން 13 އަހަރުގެ ކުޑަކުއްޖާގެ މަރުގެ މައްސަލައިގައި މަޢުލޫމާތު ނަހަމަ ގޮތުގައި ޤާނޫނާ ޚިލާފަށް ބޭނުންކޮށްފައިވާތީ ޖެންޑަރ މިނިސްޓްރީން ފިޔަވަޅު އެޅީ ޤާނޫނީ އިމުގެ ތެރެއިންކަމަށް ޕްރޮސެކިއުޓަރ ޖެނަރަލް ހުސައިން ޝަމީމް ވިދާޅުވެއްޖެއެވެ.
ކުޑަކުދިންގެ މައްސަލަތަކުގައި މަޢުލޫމާތު ހާމަކުރަން ވާނީ ވަކިވަރަކަށް ކަމަށާއި އެއީ އެކުދިންގެ ކަރާމާތަށް އުނިކަމެއް ނާންނާނެ މިންވަރަކަށް ކަމަށް ޕީޖީ ޝަމީމްގެ އަމިއްލަ ބްލޮގްގައި އާއްމު ކުރެއްވި ލިޔުއްވުމެއްގައި ވިދާޅުވިއެވެ.
13 އަހަރުގެ ކުޑަކުއްޖާގެ މައްސަލައިގައި މައުލޫމާތު ފެތުރިގޮތުން ޖެންޑަރ މިނިސްޓްރީން ވަނީ ރާއްޖޭގެ މީޑިއާއެއް ޖޫރިމަނާކޮށްފައެވެ. އަދި މިކަމާއި ގުޅިގެން ބައެއް ފަރާތްތަކުން ވަނީ ކަންބޮޑުވުން ފާޅުކުރައްވާފައެވެ.
ޝަމީމްގެ ބްލޮގްގައި ވަނީ 13 އަހަރުގެ ކުޑަކުއްޖާގެ މަރުގެ މައްސަލައިގައި ޤާނޫނީ ގޮތުން މަޢުލޫމާތު ހާމަކުރާނެ މިންވަރު ބަޔާންކޮށްފައިވެއެވެ. ހަމައެއާއިއެކު ކުޑަކުދިންގެ އަދްލުގެ ޤާނޫނުގެ 15 ވަނަ މާއްދާއަށް ރިއާޔަތް ކުރައްވާ ޕީޖީ ވިދާޅުވީ ޤާނޫނާ ޚިލާފުވާ ކުޑަކުދިން ހިމެނޭ މައްސަލަތަކުގެ ޚަބަރު ޝާޢިއު ކުރުމުގައި ވަކި ފަރާތަކަށް ނުޖެހި ވަކި މިންގަނޑު ތަކަކަށް މީޑިއާތަކުން މަޢުލޫމާތު ޚިއްސާ ކުރަންޖެހޭނެކަމަށެވެ. އަދި ހަމައެއާއިއެކު ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނުގެ ދަށުން ކުޑަކުދިންގެ ކަރާމަތަށް ގެއްލުންވާފަދަ މަޢުލޫމާތުތައް އާންމުންނާއި ހިއްސާކުރާއިރު ސަމާލުކަން ދިނުމަށްވެސް ޕީޖީ ޝަމީމް ވިދާޅުވިއެވެ.
ކުޑަކުއްޖާގެ މަރާ ގުޅިގެން ޕީޖީ ޝަމީމް އިތުރަށް ވިދާޅުވީ ފުލުހުން އެ މައްސަލަ ވަރަށް ބާރު ސްޕީޑެއްގައި ޕްރެސެކިއުޓަރ ޖެނެރަލްގެ އޮފީހުގެ ޕްރޮސެކިއުޓަރުންގެ ބައިވެރިވުމާއެކު ތަހުޤީޤް ކުރިއަށް ގެންދާކަމަށެވެ. އަދި އެ މައްސަލައިގައި ރަހީނުކުރުމުގެ މައްސަލައަކާއި، މަރުގެ މައްސަލައަކާއި އަދި ޖިންސީ ކުށުގެ މައްސަލައެއް ފުލުހުން ތަހްޤީޤް ކުރަމުންދާކަމަށްވެސް ޕީޖީ ޝަމީމް ވިދާޅުވިއެވެ.
13 އަހަރުގެ ކުއްޖާ މަރާލާފައި އޮތްވާ ފެނުނީ މިދިޔަ ހޯމަދުވަހުގެ ރޭ ދަންވަރު 2:30 ހާއިރު ހުޅުމާލެ ދެވަނަ ފިޔަވަހީގެ އިރުއުތުރު ފަރާތުގެ މޫދަށް އެއްލާލާފައިވާ ފޮށްޓެއްގެ ތެރެއިންނެވެ. އަދި އެ ކުއްޖާ ފެނިފައިވަނީ ކުއްޖާއަށް އަނިޔާ ކުރާ ކަމުގެ މަޢުލޫމާތު ލިބިގެން ކުއްޖާ ހޯދުމަށް ކުރި މަސައްކަތުގެ ތެރެއިންނެވެ. ކުއްޖާގެ ހަޑިގަނޑު ފެނުނުއިރު ބޮޑެތި ޙާނިކަތަކެއް ދީފަހުރިކަމަށް ފުލުހުން ބުނެއެވެ. ކުއްޖާއަށް ލިބިފައިވާ އަނިޔާތަކާ، ކުއްޖާގެ މަރުގެ ޙަޤީގަތް ދެނެގަތުމަށް ޕޯސްޓްމޯޓަމް ހެދުމަށްވެސް ވަނީ ނިންމާފައެވެ.
މި މައްސަލައާ ގުޅިގެން މިހާތަނަށް ވަނީ އުމުރުން 27 އަހަރުގެ ފިރިހެނަކާއި، 17އަހަރުގެ ކުޑަ ފިރިހެން ކުއްޖެއް ހައްޔަރުކޮށްފައެވެ. 27 އަހަރުގެ މީހާ، ތަހުޤީޤު ނިމެންދެން ބަންދުގައި ބެހެއްޓުމަށާއި، ކުޑަކުއްޖާ 15 ދުވަސް ވަންދެން ބަންދުގައި ބެހެއްޓުމަށް ކޯޓުން މުއްދަތު ވަނީ ޖަހާފައެވެ.
މިމައްސަލައިގައި ހައްޔަރުކުރި ދެމީހުންނަކީ މަރާލާފައި އޮއްވާ ފެނުނު ކުއްޖާގެ ދެ އެކުވެރިން ކަމަށް މަޢުލޫމާތު ލިބެއެވެ. މި މައްސަލަ ސީރިއަސް މައްސަލައެއްގެ ގޮތުގައި ފުލުހުން އަންނަނީ ތަޙުޤީގުކުރަމުންނެވެ. ހުޅުމާލޭގަ ކުއްޖާގެ ހަށިގަނޑު ފެނުނު ސަރަޙައްދުންވެސް ވަނީ ހެކި އެއްކޮށްފައެވެ.