ޖުމްލަ ގޮތެއްގައި ހާލު ރަނގަޅުކަމަށާއި އެހެންނަމަވެސް ލިިބިވަޑައިގެންފައިވާ ޒަަހަމްތަކާއި ގުޅިގެން އިތުރު އޮޕަރޭޝަނެއް ކުރަންޖެހިދާނެކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް މެއި މަހުގެ 6 ވަނަ ދުވަހުގެރޭ ދިން ހަމަލާއަށްފަހު އެމަނިކުފާނު ސިއްހީ ހާލަތާ ގުޅޭގޮތުން ފުރަތަމަ ފަހަރަށް ވާހަކަފުޅު ދެއްކެވީ އެމްޑީޕީގެ އަހަރީ ދުވަހާ ގުޅުވައިގެން ސޯޝަލް މީޑިއާ ޕްލެޓްފޯމެއްކަމަށްވާ "ކްލަބް ހައުސް އެމްޑީޕީގެ ހަރުގެ" އިފްތިތާހް ކުރުމަށް ބޭއްވި ރަސްމިއްޔާތުގައެވެ. މިރަސްމިއްޔާތުގައި އެމަނިކުފާނު ބައިވެރިވެ ވަޑައިގަތީ ޖަރުމަންވިލާތުގައި ހުންނަވައިގެންނެވެ. 800 އަށް ވުރެ ގިނަ މީހުން ބައިވެރިވި "ކްލަބް ހައުސް އެމްޑީޕީ ހަރުގެ" އިފްތިތާޙް ކުރުމުގެ ރަސްމިއްޔާތުގައި ރައީސް ނަޝީދު ވަނީ ހަމަލާއަށްފަހު ފުރަތަމަ ފަހަރަށް އެމަނިކުފާނުގެ ހާލުކޮޅާއި ގުޅޭގޮތުން ވާހަކަފުޅުދައްކަވާފައެވެ.
ރައީސް ނަޝީދު ވިދާޅުވީ އެމަނިކުފާނުގެ އެތެރެހަށީގެ ހުރިހާ ގުނަވަނެއް ރަނގަޅު ކަމަށް ޑޮކްޓަރުން ވިދާޅުވެފައިވާކަމަށެވެ. ނަމަވެސް ވައަތު ކަންފަތުގެ ތޫރިއަށް ލިބުނު ގެއްލުމެއްގެ ސަބަބުން އެ ކަންފަތަށް އެންމެ ރަނގަޅަށް އަޑު ނީވޭކަމަށާއި، އެހެން ނަމަވެސް އެކަންތައް ރަނގަޅުވަމުން އަންނަ ކަމަށް ރައީސް ނަޝިދު ވިދާޅުވިއެވެ. ކަންފަތުގެ އަޑު މުޅިން ރަނގަޅު ކުރުމަށް އަންނަ ނޮވެމްބަރުމަހު އިތުރު އޮޕަރޭޝަނެއް ކުރަން ޖެހިދާނެކަމަށް ޑޮކްޓަރުން ލަފާދީފައިވާ ކަމަށްވެސް އެމަނިކުފާނު ވިދާޅުވިއެވެ. މީގެ އިތުރުން ކަނައަތުގެ ތިން އިނގިއްޔެއްވެސް ހުންނަނީ އައްސިވެފައިކަމަށް ނަޝީދު ވިދާޅުވިއެވެ.
"ޑޮކްޓަރު ބުނީ އެހެން އޮޕަރޭޝަނެއް ކޮށްގެން ބެލިދާނެއޭ އިނގިލި ރަނގަޅު ކުރެވޭތޯ. އަޅުގަނޑު ދަންނަވައިފިން މިހާރު އުމުރުން 54 އަހަރޭ. ދެން ބަޅު މެދު އިނގިއްޔަކާ އެކީގައި ބާކީ އޮތްބައި އުޅެން ނިންމާނީއޭ،" ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އެމަނިކުފާނުގެ ހަށިގަނޑުގެ ވާތް ފަރާތުގެ ވަރަށް ގިނަ ތަންތަން ހުންނަނީ އައްސިވެފައި ކަމަށާއި އެ އައްސި ކަނޑައިގެން ދާން ދުވަސްތަކެއް ނަގާނެކަމަށެވެ. އަދި މަސައްކަތް ކުރައްވަމުން ގެންދަވަނީ ވީ އެންމެ އަވަހަކަށް ރާއްޖެ ވަޑައިގަތުމަށް ކަމަށްވެސް ވިދާޅުވިއެވެ. ރައީސް ނަޝީދުގެ ވާހަކަފުޅުގައި ރާއްޖޭގެ ސަލާމަތާއި ރައްކާތެރިކަން އިތުރަށް ވަރުގަދަ ކުރަން މަސައްކަތްކުރަން ޖެހޭކަމަށް ވިދާޅުވިއެވެ.
އެމްޑީޕީގެ 16 ވަނަ އަހަރީ ދުވަހާ ގުޅިގެން ބޭއްވި "ކްލަބްހައުސް އެމްޑީޕީ ހަރުގެ" އިފްތިތާޙް ކުރުމުގެ ރަސްމިއްޔާތުގައި ރައީސް ނަޝީދު ވިދާޅުވީ އެމްޑީޕީއަކީ އަބަދުވެސް އިންސާފަށް މަސައްކަތް ކުރަމުން އަންނަ ޕާޓީއެއްކަމަށާއި އަދި އެ މަސައްކަތުގައި ދެމި ތިބޭނެ ކަމަށެވެ.
އެމްޕޑީޕީއަށް 16 އަހަރު ފުރުމާ ގުޅިގެން މުޅި ރާއްޖޭގައި ގިނަ ހަރަކާތްތަކެއް ބޭއްވުމަށް އެ ޕާޓީގެ ގައުމީ މަޖިލީހުން ވަނީ ނިންމާފައެވެ. އެގޮތުން އެ ހަރަކާތްތައް ފެށީ އިއްޔެ މާލޭގައި އެމްޑީޕީގެ މައި ހަރުގޭގައި ބޭއްވި ދިދަ ނެގުމުގެ ރަސްމިއްޔާތަކުންނެވެ. އަދި މީގެ އިތުރުން 26 ޖޫން 2021 ހުން ފެށިގެން 24 ޖުލައި 2021 އަށް ގިނަ ހަރަކާތްތަކެއް އެމްޑީޕީން ކުރިއަށްގެންދިއުމަށް އެޕާޓީގެ ގައުމީ މަޖިލީހުން ވަނީ ނިންމާފައެވެ.