މަރާލާފައި އޮއްވާ ފެނުނު 13 އަހަރު ކުއްޖާގެ މައްސަލައާ ގުޅިގެން ސަރުކާރުގެ 3 އިދާރާއަކާއެކު ރައްޔިތުންގެ މަޖިލީހުގެ ހިއުމަންރައިޓްސް އެންޑް ޖެންޑަރ ކޮމިޓީން ބޭއްވި ބައްދަލުވުން ސިއްރުކޮށްފިއެވެ.
މިމައްސަލައާ ގުޅިގެން މަޖިލީހުގެ ހިއުމަންރައިޓްސް އެންޑް ޖެންޑަރ ކޮމިޓީން މިއަދު ބައްދަލުކުރީ މޯލްޑިވްސް ޕޮލިސް ސަރވިސްއާ، ޖެންޑަރ މިނިސްޓްރީގެ އިތުރުން ޑިޕާޓްމަންޓް އޮފް ޖުވެނައިލް ޖަސްޓިސްއާއެވެ.
މިއަދުގެ ކޮމިޓީ ބައްދަލުވުން ފަށްޓަވަމުން މުޤައްރިރު ޖީހާން އަޙްމަދު ވިދާޅުވީ މަރާލާފައި އޮއްވައި ފެނުނު 13 އަހަރުގެ ކުއްޖާއަކީ މީގެ ކުރިން އެއްވެސް ސަބަބަކާހުރެ ދައުލަތުން ރައްކާތެރިކަން ދީފައިވާ ކުއްޖެއްތޯ ދެނެގަތުމަށް ކަމާ ގުޅުންހުރި މުއައްސަސާތަކުން މައުލޫމާތު ހޯދުމަށް އެދުމުން ހުރިހާ މުއައްސަސާއަކުންވެސް ކޮމިޓީއަށް މަޢުލޫމާތު ހިއްސާކޮށްފައިވާކަމަށެވެ.
މިއަދު ބޭއްވި ކޮމިޓީ ބައްދަލުވުމަކީ އިދާރާތަކާ ބައްދަލުކޮށް، މައްސަލައާއި ގުޅިގެން އަޅާފައިވާ ފިޔަވަޅުތައް ދެނެގަތުމާއި މިކަމުހައި އަމަލުކުރިގޮތް ދެނެގަތުމަށް ބޭއްވި ބައްދަލުވުމެކެވެ.
ނަމަވެސް މިއީ ތަޙުޤީޤު ކުރިއަށްދާ އަދި މަރުވި ކުއްޖާއާއި އަދި އެއަމަލު ހިނގުމުގައި ޝާމިލުވި 17 އަހަރުގެ ކުއްޖާގެ ޒާތީ މައުލޫމާތުތަކެއް ހިމެނޭކަމަކަށްވުމުން ކޮމިޓީ އިތުރަށް ކުރިއަށްގެންދިޔައީ ސިއްރު ކޮށްގެންނެވެ.
މިދިޔަ ހޯމަދުވަހުގެ ރޭ ހުޅުމާލެ ދެވަނަ ފިޔަވަހި ސަރަޙައްދުގައި މަރާލާފައި އޮއްވައި ފެނުނު އުމުރުން 13 އަހަރުގެ ކުއްޖާ މަރާލި މައްސަލާގައި މިހާތަނަށް 2 މީހަކު ހައްޔަރުކޮށްފައިވެއެވެ. އޭގެތެރޭގައި ހިމެނޭނީ 27 އަހަރުގެ ފިރިހެނަކާއި، 17 އަހަރުގެ ކުއްޖެއްކަމަށް ފުލުހުން ވިދާޅުވިއެވެ. އަދި މިކަމާއި ގުޅިގެން އިތުރު މީހަކުދަނީ ހޯދަމުންނެވެ.
މިމައްސަލާގައި ހައްޔަރުކުރި ދެމީހުންނަކީ މަރާލާފައި އޮއްވައި ފެނުނު ކުއްޖާގެ ދެ އެކުވެރިން ކަމަށް މަޢުލޫމާތު ލިބެއެވެ. މި މައްސަލަ ސީރިއަސް މައްސަލައެއްގެ ގޮތުގައި ފުލުހުން އަންނަނީ ތަޙުޤީގުކުރަމުންނެވެ.