މޭ ހައެއްގެ ހަމަލާގެ ކަންކަން ބެއްލެވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އައްޔަންކުރެއްވި ޚާއްޞަ މަންދޫބް އައްބާސް ފާއިޒާއި ރައްޔިތުން މަޖިލީހުގެ ސަލާމަތީ ހިދުމަތްތަކާއި ބެހޭ ކޮމެޓީން ބައްދަލުކުރައްވައިފިއެވެ. ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ދިން ނުރައްކާތެރި ޓެރަރިޒަމް ހަމަލާއި ގުޅިގެން މަޖިލީހުގެ 241 ކޮމެޓީން އަންނަނީ ޕާލިމެންޓްރީ އިންކުއަރީއެއް ހަދަމުންނެވެ.
މޭމަހުގެ 6 ވަނަ ދުވަހު ރައީސް ނަޝީދަށް އަމާޒުކޮށްގެން ދީފައިވާ ޓެރަރިސްޓް ޙަމަލާގެ ތަޙުޤީޤާއި، އެންމެހާ ކޯޓު މަރުޙަލާތައް ގާތުން ބެއްލެވުމަށްޓަކައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ޚާއްޞަ މަންދޫބެއްގެ ގޮތުން އިނގިރޭސިވިލާތުގެ ރައްޔިތެއްކަމަށްވާ އައްބާސް ފާއިޒް ޢައްޔަންކުރައްވީ މެއި މަހުގެ 19 ވަނަދުވަހުއެވެ. މި ޙަމަލާއާއި ގުޅޭ ހުރިހާ ތަހުޤީޤެއް ނިމި ތުޙުމަތު ކުރެވޭ މީހުންނަށް ޝަރީޢަތް ހިންގާ، ނިހާއީ ޙުކުމަކާއި ހަމައަށް ވާސިލްވަންދެން އައްބާސް ފާއިޒް މި މަސައްކަތުގައި ދެމިހުންނަވާނެކަމަށް ރައީސް އޮފީހުން ވަނީ ވިދާޅުވެފައެވެ.
މަޖިލީހުގެ 241 ކޮމެޓީން އައްބާސް ފާއިޒާ ބައްދަލުކުރެއްވީ އޮންލައިންކޮށެވެ. އެ ކޮމެޓިން ވަނީ އިންކުއަރީގެ ބޭނުމަށް ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދުދީދީ އާއި ހޯމް މިނިސްޓަރ އައްޝައިޚް ޢިމްރާން ޢަބްދުﷲވެސް ބައްދަލުކުރައްވާފައެވެ. މިނިސްޓަރ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމާއި މާލޭ ސިޓީގެ ކުރީގެ މޭޔަރ ސިފާ މުހައްމަދާއިވެސް ކޮމެޓީން ވަނީ ބައްދަލުކުރައްވާފައެވެ. މީގެއިތުރުން ސަލާމަތީ ބާރުތަކުގެ އިސްވެރިންނާއި އެތަންތަނުގެ ޖުމްލަ 32 އޮފިސަރެއްގެ އިތުރުން ރައީސް ނަޝީދަށް ފަރުވާ ދެއްވި އޭޑީކޭގެ ޑޮކްޓަރުންނާއިވެސް ކޮމެޓީން ވަނީ ބައްދަލުކުރައްވާފައެވެ.
ރައްޔިތުންގެ މަޖިލީހުގެ ރައީސަށް ދެމުންގެންދާ ސަލާމަތާއި ރައްކާތެރިކަން ބަލިކަށިވިގޮތް ހޯދުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާއި ބެހޭ ކޮމިޓީން ކުރިއަށްގެންދާ ޕާލަމެންޓަރީ އިންކުއައިރީގެ ރިޕޯޓު ފުރިހަމަކުރެވޭ ވަރަށް މަޢުލޫމާތު އެއްކުރެވިފައިވާކަމަށް އެކޮމިޓީން ވަނީ މި މަހުގެ 25 ވަނަދުވަހު ހާމަކޮށްފައެވެ. އަދި ކޮމެޓީ ރިޕޯޓް އަނަން ހަފްތާ އާއްމުކުރައްވާނެކަމަށްވެސް ކޮމެޓީގެ މުޤައްރިރު ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ވަނީ ވިދާޅުވައެވެ.