ސ.މަރަދޫފޭދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް އަލްއުސްތާޛު އިބްރާހިމް ނަފީސް ޙުސައިންގެ ސުލޫކީ މައްސަލައެއް ތަޙްޤީޤް ކުރަން ޖޭއެސްސީން ނިންމައިފިއެވެ.
ޖުޑީޝަލް ސަރވިސް ކޮމިޝަން، ޖޭއެސްސީން ވިދާޅުވީ ސ.މަރަދޫފޭދޫ އިސްމެޖިސްޓްރޭޓުގެ ސުލޫކީ މައްސަލައެއް ބަލަން ނިންމީ ޖިނާއީ ކުށެއްގެ ތުހުމަތުގައި ހައްޔަރުކުރި މީހެއް ބަންދުން ދޫކޮށްލުމަށް އެ ކޯޓުން ނިންމުމުން، އެ މައްސަލަ އިސްތިއުނާފް ކުރުމަށް ދިވެހިރާއްޖޭގެ ހައިކޯޓަށް ހުށަހެޅުމުން އެކޯޓުން ކަނޑައެޅި ގޮތުގެ މަތިން ޕްރޮސެކިއުޓަރ ޖެނެރަލް އޮފީހުގެ ފަރާތުން ބަންދު މުރާޖަޢާކޮށްދެއްވުމަށް ސ.މަރަދޫ މެޖިސްޓްރޭޓް ކޯޓުގައި އެދުމުން، އެ ހުށަހެޅުން ބަލައިނުގަނެ އަދި އެ ހުށަހެޅުމާމެދު ގޮތެއް ނިންމާފައިނުވާތީއެވެ.
News Briefing_24 June 2021: S.Maradhoo Feydhoo Magistrate Court ge IssMagistrate Uz. Ibrahim Nafees Hussain ge Sulookee Massala eh thahugeegu kuran nimmun
— Judicial Service Commission (@MaldivesJSC) June 24, 2021
Ithuru thafseel: https://t.co/HjtQkTBcjj pic.twitter.com/AfH7K6LjFT
ޖޭއެސްސީން ވިދާޅުވީ އެކި ފަހަރު މަތިން ޕީޖީން އެދުމުންވެސް މަތީގައި ބަޔާން ކުރެވުނު ހުށަހެޅުމާމެދު ގޮތެއް ނިންމާފައިނުވާކަމަށް ބުނާ މައްސަލައިގައި ސ.މަރަދޫފޭދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް އަލްއުސްތާޛު އިބްރާހިމް ނަފީސް ޙުސައިން ޢަމަލު ކުރައްވާފައިވާ ގޮތާ ގުޅިގެން ހުށަހަޅާފައިވާ މައްސަލައެއް ތަޙްޤީޤް ކުރަން ނިންމާފައިވާކަމަށެވެ.
މި މައްސަލައާ ގުޅިގެން ސ.މަރަދޫފޭދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް އަލްއުސްތާޛު އިބްރާހިމް ނަފީސް ޙުސައިންގެ ސުލޫކީ މައްސަލައެއް ބެލުމަށް އެ މައްސަލަ ބެލުމާމެދު ގޮތެއް ނިންމައި، ތަހްޤީޤް ކޮމެޓީ އެކުލަވާލުމަށް ނިންމާފައިވާކަމަށް އެކޮމިޝަނުން ވިދާޅުވިއެވެ.
ހަމައެއާއިއެކު މީގެ ކުރިން ޖޭއެސްސީންވަނީ ކުރީގެ ޓޫރިޒަމް މިނިސްޓަރ ޢަލީ ވަޙީދުގެ ޕާސްޕޯޓު ދޫކޮށްލަން ނެރުނު އަމުރާ ގުޅިގެން ކްރިމިނަލް ކޯޓުގެ ޤާޟީ އަލްއުސްތާޛު ޙަސަން ސައީދުގެ ސުލޫކީ މައްސަލައެއްވެސް ތަޙުޤީޤުކުރަން ނިންމާފައެވެ.