މާލޭ ސިޓީގެ ޑެޕިއުޓީ މޭޔަރުކަމަށް ޕީޕީއެމްގެ ފަރާތުން ކުރިމަތިލައްވާނެ ބޭފުޅަކު ހޮވަމް އިދިކޮޅު ޕީ.ޕީ.އެމްއިން ބޭއްވި އިންތިޚާބުގައި މާފަންނު މެދު ދާއިރާގެ ކައުންސިލަރު އަހްމަދު ނަރީޝް އިންތިޚާބުވެއްޖެއެވެ.
އިދިކޮޅު ޕީ.ޕީ.އެމްއިން މާލޭގެ ޑެޕިއުޓީ މޭޔަރުކަމަށް ޥާދަކުރައްވަން ބޭފުޅެއްގެ ނަން ހޮވަން ބޭއްވި އިންތިޚާބުގައި ވާދަކުރެއްވީ މާލޭ ސިޓީ ކައުންސިލްގައި ތިބި ޕީ.ޕީ.އެމްގެ ތިން ކައުންސިލަރެކެވެ. އެއީ ވިލިމާލެ ދާއިރާގެ ކައުންސިލަރު ނަހުލާ ޢަލީ އާއި، ހުޅުމާލެ ދާއިރާގެ ކައުންސިލަރު އިބްރާހީމް ޝުޖާޢުގެ އިތުރުން މާފަންނު މެދު ދާއިރާގެ ކައުންސިލަރު އަހްމަދު ނަރީޝެވެ.
މިއަދު މެންދުރު ޕީ.ޕީ.އެމްގެ އޮފީހުގައި ބޭއްވި ބައްދަލުވުމުގައި މާލޭ ސިޓީގެ ޑެޕިއުޓީ މޭޔަރު ކަމަށް ޕީ.ޕީ.އެމްއިން ވާދަކުރައްވާނީ ނަރީޝްކަން ފާސްކުރީ އެ ބައްދަލުވުމުގައި ބައިވެރިވި 13 މެންބަރުންގެ ތެރެއިން 5 ކައުންސިލަރުންގެ ވޯޓް ލިބިވަޑައިގެންނެވެ. އަދި ދެން ތިބި ދެ ބޭފުޅުންނަށް ލިބިވަޑައިގެންފައިވަނީ 4 ވޯޓެވެ.
މާލޭ ސިޓީގެ ޑެޕިއުޓީ މޭޔަރަކު އިންތިޚާބު ކުރާނީ މާލޭ ސިޓީ ކައުންސިލުން ނެގޭ ސިއްރު ވޯޓަކުންނެވެ. އަދި މާލޭ ސިޓީގައި ތިއްބެވީ އިދިކޮޅޫ ޕީ.ޕީ.އެމްގެ 13 ކައުސިލަރަކާ އެމް.ޑީ.ޕީގެ 6 ކައުންސިލަރުންނެވެ.
ޑެޕިއުޓީ މޭޔަރު އިންތިޚާބު ކުރަން ބާއްވާ މާލެ ސިޓީ ކައުންސިލްގެ ބައްދަލުވުން އޮންނާނީ މާދަމާގެ ވަގުތެއްގައެވެ. ލޯކަލް ގަވަރުމަންޓް އޮތޯރިޓީ (އެލްޖީއޭ) އިން އެދިފައިވަނީ އެންމެ ލަސްވެގެން ވެސް މާދަމާއަށް ޑެޕިއުޓީ މޭޔަރު އިންތިޚާބު ކުރުމަށެވެ.