ރައީސް ނަޝީދަށް ދިން ޙަމަލާގެ މައްސަލައާ ގުޅުންހުރި ކަންކަން އަންނަނީ ބަލަމުން: އެޗްއާރުސީއެމް

މިދިޔަ މަހުގެ 6 ވަނަ ދުވަހުގެރޭ ރައީސް ނަޝީދަށް ދިންޙަމަލާގެ މައްސަލަ ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެޗްއާރްސީއެމުންވެސް ބަލަމުންދާ ކަމަށް އެކޮމިޝަނުން ހާމަކުރައްވައިފިއެވެ. ނުބަލާކަކަމަށް ތުހުމަތުކުރުމުން އެކަން ދޮގުކޮށް ހަމަލާއާ ގުޅުންހުރި ކަންކަން ބަލަމުންދާކަމަށް ހިއުމަން ރައިޓްސް ކޮމިޝަނުން ހާމަކޮށްފިއެވެ.

އެޗްއާރްސީއެމުން މިކަން ހާމަކުރައްވާފައިވަނީ ރައީސް ނަޝީދަށް ދިން ހަމަލާ ހިއުމަން ރައިޓްސް ކޮމިޝަނުން ކުށްވެރިކުރިކަން އެނގިފައިނުވާކަމަށާއި އެކަމާއި ގުޅިގެން ހިއުމަން ރައިޓްސް ކޮމިޝަނުގެ މަސްއޫލިއްޔަތުތާކާއި ގުޅޭގޮތުން ބުރާސްފަތި ދުވަހުގެރޭ ބޭއްވި އެމްޑީޕީގެ ޤައުމީ މަޖިލީހުގެ ބައްދަލުވުމުގައި "6 މެއި ކޮމިޓީ" ގެ ޗެއަރ ވިލުފުށި ދާއިރާގެ މެންބަރު ޙަސަން އަފީފުގެ ވާހަކަ ދައްކާވަފައިވަނިކޮށެވެ.

އެޗްއާރުސީއެމުން ނެރުނު ނޫސްބާޔާނެއްގައި ވިދާޅުވީ މެއި މަހުގެ 6 ވަނަ ދުވަހު ރައީސް މުޙައްމަދު ނަޝީދަށް އަމާޒުކޮށް ދިން ނުރައްކާތެރި ޙަމަލާގައި އެމަނިކުފާނުގެ ހަށިކޮޅަށް ލިބުނު އަނިޔާތަކަށް އޭ.ޑީ.ކޭ ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށް ކޮމިޝަނުގެ މެންބަރަކު ހިމެނޭގޮތަށް ޚާއްޞަ ޓީމެއް އެރޭ އެ ހޮސްޕިޓަލަށް ޒިޔާރާތް ކުރިކަމަށެވެ.

އަދި މި ޙާދިސާއާ ގުޅިގެން ހޮސްޕިޓަލުގައި ކަން ހިނގަމުންދިޔަ ގޮތް އެރޭ ބަލަމުންގެންދިޔަކަމަށާއި، އެއާއެކު އެ އަނިޔާވެރި ޙަމަލާ ކުށްވެރިކޮށް، އެކަމާ ކަންބޮޑުވުން ފާޅުކޮށް، ރައީސް ނަޝީދަށް އަވަސް ޝިފާއަކަށް އެދި، ޙަމަލާ ދިނުމުގައި ޝާމިލުވާ ފަރާތްތަކަށް ޙައްޤު އަދަބު ދިނުމަށް ކޮމިޝަނުން ގޮވާލާފައިވާނެކަމަށެވެ. އަދި ޖެހިގެން އައިދުވަހު ކޮމިޝަނުން މި ޙަމަލާއާ ގުޅޭ ނޫސްބަޔާނެއް ނެރުނުކަމަށާއި، އެ ބަޔާނުގައި މި ޙަމަލާ ކުށްވެރި ކުރުމުގެ އިތުރުން ޙަމަލާއާ ގުޅިގެން ކަމާބެހޭ މުއައްސަސާތަކުން ޢަމަލު ކުރަމުންދާ ގޮތް މޮނިޓަރ ކުރަމުންދާކަން ބަޔާންކޮށްފައިވާނެކަމަށެވެ.

މި ޙާދިސާއާ ގުޅިގެން މި މައްސަލައާ ގުޅުންހުރި ކަންކަން ބަލަމުންދާކަން ހާމަކުރައްވައި އެޗްއާރުސީއެމުން ވިދާޅުވީ ޙާދިސާއާއި ގުޅިގެން ކަމާ ގުޅުން ހުރި ދައުލަތުގެ އިދާރާތަކުން ޢަމަލުކޮށްފައިވާ ގޮތާއި ކުރަމުންދާ ގޮތް ބަލައި، ތަޙްޤީޤަށް ބޭނުންވާ މަޢުލޫމާތު ހޯދަމުންގެންދާކަމަށެވެ.

އެގޮތުން މާލޭ ސިޓީ ކައުންސިލާއި، މޯލްޑިވްސް ޕޮލިސް ސަރވިސް އާއި މިނިސްޓްރީ އޮފް ނޭޝަނަލް ޕްލޭނިން، ހައުސިންގ އެންޑް އިންފްރާސްޓްރަކްޗަރ އާއި މިނިސްޓްރީ އޮފް ޑިފެންސްއަށް ލިޔުމުން ހުށަހަޅައި މިހާތަނަށް މިނިސްޓްރީ އޮފް ޑިފެންސް ފިޔަވައި އެހެން މުއައްސަސާތަކުން އެ ކޮމިޝަނުން އެދިފައިވާ މައުލޫމާތު ޙިއްޞާކޮށްފައިވާ ކަމަށް ހިއުމަންރައިޓް ކޮމިޝަނުން ވިދާޅުވިއެވެ.

ރައީސް މުޙައްމަދު ނަޝީދަށް އަމާޒުކޮށް ދީފައިވާ ނުރައްކާތެރި ޙަމަލާއާ ގުޅިގެން ޚާއްޞަ ސަމާލުކަމެއް ދީގެން މަސައްކަތް ކުރަމުންދާ ދަނޑިވަޅެއްގައި، އަދި ވަކިން ޚާއްޞަކޮށް ހިއުމަން ރައިޓްސް ކޮމިޝަންގެ މަސައްކަތްތައް ހަރުދަނާކުރުމަށް ކޮމިޝަނުގެ 5 ވަނަ ދައުރުން ގިނަ މަސައްކަތްތަކެއް ކުރަމުންދާ ދަނޑިވަޅެއްގައި ކޮމިޝަނާ މެދު ޢާއްމު ރައްޔިތުންގެ އިތުބާރު ގެއްލޭ ގޮތަށް އެއްވެސް ފަރާތަކުން ޙަޤީޤަތާ ޚިލާފު މަޢުލޫމާތު ހާމަކުރުމަކީ ކޮމިޝަނުން ނުހަނު ކަންބޮޑުވާ ކަމެއް ކަމަށް އެޗްއާރުސީއެމުން ވިދާޅުވިއެވެ.

އަދި އެމްޑީޕީން އުފައްދާފައިވާ "މެއި ހައެއް ކޮމިޓީ"ން ހަމާލާގެ މަޢުލޫމާތު ހާމަ ކުރެއްވުމުގައި އެ ކޮމިޝަނުގެ ރަސްމީ ޓްވީޓަރގައި ޢާއްމުކޮށްފައިވާ މަޢުލޫމާތުތަކަށް ބެއްލެވުމެއްނެތި ކޮމިޝަނުގެ މަސައްކަތްތަކުގެ މަޢުލޫމާތު ހޯއްދެވުމަށް އެއްވެސް މަސައްކަތެއް ކުރެއްވުމެއް ނެތި ޙަޤީޤަތާ ޚިލާފު މަޢުލޫމާތު ޢާއްމުކުރައްވާފައިވާތީ އެކަމާ ހިތާމަ ކުރާކަމުގައި ހިއުމަންރައިޓް ކޮމިޝަނުގެ ބަޔާނުގައިވަނީ ފާހަގަކުރައްވާފައެވެ.

ރައީސް ނަޝީދު އަވަހާރަކޮށްލަން ދިން ހަމަލާގެ ތަހުގީގު ކުރިއަށްދާ ގޮތަށް ފާރަވެރިވުމަށް "މެއި ހައެއް"ގެ ނަމުގައި އެމްޑީޕީގެ ޤައުމީ މަޖިލީހުން ޖޫން 10ގައި އުފައްދާފައިވާ ކޮމިޓީން ވަނީ އެ ކޮމިޓީގެ މަސައްކަތްތައް ޙިއްސާކުރައްވާފައެވެ.

ހަމަލާއާގުޅިގެން ކުރިއަށްދާ ތަޙުޤީގާއި އެނޫންވެސް ކަންކަމާއި ގުޅޭ މައުލޫމާތު ހޯދައި އެމްޑީޕީގެ އާންމު މެންބަރުންނާއި ޙިއްސާކުރުމަށް ޕާޓީގެ ތެރެއިން ކޮމިއުނިކޭޝަން ޓީމެއް ކަނޑައަޅައި ރައީސް ނަޝީދުގެ ސިއްޙީ ހާލުކޮޅާއި، އެމަނިކުފާނަ އިންސާފު ހޯދުމަށްކުރެވޭ މަސައްކަތްތަކުގެ ސައްޙަ މަޢުލޫމާތު ޕާޓީގެ ޢާންމު މެންބަރުންނަށް ފޯރުކޮށްދިނުމަށް ޚާއްސަ މަސައްކަތްތަކެއް "މެއި ހައެއް" ކޮމިޓީން ވަނީ ފަށާފައެވެ.