ސާފް ސުޒުކީ ކަޕަށް ތައްޔާރުވުމަށް ދިވެހި ޤައުމީ ފުޓްބޯޅަ ޓީމް މެދުއިރުތުމަތީގެ ޤައުމެއްގައި ކޭމްޕްކުރާނެކަމަށް އެފް.އޭ.އެމްއިން ބުނެފިއެވެ. ދިވެހިރާއްޖޭގެ އަޑުގެ ކުޅިފަސް ޕްރޮގްރާމުގައި ވާހަކަދައްކަވަމުން އެފް.އޭގެ ޖެނެރަލް ސެކްޓްރީ ބައްސާމް އަދީލް ޖަލީލް ވިދާޅުވީ ކުވެއިތު، ބަޙްރެއިން އަދި ޤަތަރުން ރާއްޖޭގެ ޤައުމީ ޓީމަށް ކޭމްޕް ކުރަން ދިއުމަށް ދަޢުވަތު ލިބިފައިވާކަމަށެވެ. ރާއްޖޭގެ ލީގު ނިމެނީ އަންނަ މަހު ދޭއްގައެވެ. ބައްސާމް ވިދާޅުވީ އަންނަ މަހުގެ ފަސްވަނަ ދުވަހު ރާއްޖޭގެ ޤައުމީ ޓީމް ކޭމްޕަށް ފުރާނެކަމަށެވެ. ރާއްޖޭގެ ކޯޗް ބޭނުންވަނީ ރަނގަޅު ވަޞީލަތްތަކެއް ހުރި ޤައުމެއްގައި ކޭމްޕް ކުރާށެވެ. އަދި ކޯޗް ބޭނުންވަނީ ބޮޑަށް ފިޓްނެސްއަށް މަސައްކަތްކުރުމަށެވެ.ބައްސާމް ވިދާޅުވީ ބަޙްރެއިން، ޤަތަރު އަދި ކުވެއިތުން ރަނގަޅު ވަޞީލަތްތައް ލިބޭނެކަމަށެވެ. އަދި މި ޤައުމުތަކުން ރާއްޖެއަށް ފަސޭހައިން އެކަންތަށް ހަމަޖެހިގެންދާނެކަމަށް ބައްސާމް ވިދާޅުވިއެވެ. މި ހަފްތާތެރޭގައި ކޭމްޕް ކުރަން ދާނެ ވަކި ޤައުމެއް ކަނޑައަޅާނެކަމަށްވެސް ބައްސާމް ވިދާޅުވިއެވެ. ރާއްޖޭގެ ޤައުމީ ޓީމް އަންނަ މަހުގެ ފަހެއްގައި ފުރުމަށްފަހު ކޭމްޕް ނިމުމުން، ސާފް ސުޒުކީކަޕަށް ފުރާނީ ރާއްޖޭގައި ދެ ދުވަހު މަޑުކޮށްފައިކަމަށް ބައްސާމް މަޢުލޫމާތުދެއްވިއެވެ.ރާއްޖެއިން ވޯލްޑްކަޕް ކޮލިފިކޭޝަންގައި އެންމެ ފަހުން ހޮންގ ކޮންގްއާ ދެކޮޅަށް ކުޅުނު މެޗުގައި ކުޅުނީ ވަރަށް ތަފާތު ކުޅުމެއްކަމަށް ކޯޗުން ވަނީ ފާހަގަކޮށްފައެވެ. އާއްމުކޮށް ވަރުގަދަ ޓިމްތަކާއެކު ކުޅޭއިރު ވަރަށް ބޮޑަށް ޑިފެންސިވްކޮށް ކުޅޭތަން ރާއްޖޭގެ ފަރާތުން ފެނިގެންދިޔަނަމަވެސް އެ މެޗުގައި ރާއްޖެއިން ފަށައިގަތީވެސް ވަރަށް ރަނގަޅު ހަމަލާތަކަކާއިއެކުކަމަށް ކޯޗުން ފާހަގަކުރިއެވެ. އެކެއް ސުމަކުން ރާއްޖެ އެ މެޗުން ބަލިވިނަމަވެސް ވަރަށް ޕޮޒިޓިވް ގިނަ ކަންތައްތަކެއް އެ މެޗުގައި ރާއްޖޭގެ ޓީމްގެ ފަރާތުން ފެނިގެންދިޔަކަމަށް ދިވެހި ކޯޗުންވެސް ވަނީ ފާހަގަކޮށްފައެވެ. ކޯޗް ވަނީ ތަޖުރިބާކާރު ގިނަ ކުޅުންތެރިންތަކެއްގެ ބަދަލުގައި ޒުވާން ކުޅުންތެރިންތަކަކަށް ފުރުސަތުދީފައެވެ. ނިއުޒިލޭންޑް ވޯލްޑްކަޕަށް ގެންގޮސްދީ، އެއްވެސް މެޗަކުން ބަލިނުވެ މުބާރާތުން ކެޓިއިރު އެ ޓީމަށް ކޯޗްކޮށްދިން ރިކީ ހާބާރޓް ބުނަނީ ރާއްޖޭގެ ޒުވާން ކުޅުންތެރިން ދަނޑަށް ނެރެން ޖެހިލުން ނުވާކަމަށެވެ.ބައްސާމް ވިދާޅުވީ ހޮންކޮންގް މެޗުންވެސް ރާއްޖެ ސާފް ސުޒުކީ ކަޕުގައި ކުޅޭނެ ގޮތް އެނގިގެންދާނެކަމަށާ، ރާއްޖެއިން މަސައްކަތްކުރާނީ އެއަށްވުރެންވެސް ރަނގަޅު ކުޅުމެއް ދައްކަން ކަމަށެވެ.ކުޅިފަސް ޕްރޮގްރާމްގައި ވާހަކަ ދައްކަމުން ރާއްޖޭގެ ޤައުމީ ޓިމްގެ އެސިސްޓެންޓް ކޯޗް އައްސަދް އަބްދުލް ޣަނީ ބުނީ ރާއްޖެއިން ކާމިޔާބެއް ހާސިލްކުރަން ބޭނުންވާނަމަ އެޓޭކިން ފުޓްބޯޅައެއް ކުޅެންޖެހޭކަމަށެވެ. އައްސަދު ބުނީ ކޯޗްގެ ވިސްނުންވެސް އެފަދަ އެޓޭކިންގ ގޭމަކަށް ހުރިއިރު، ކުޅުންތެރިން އެ ގޭމަށް ނަފްސާނީ ގޮތުންނާއި އަދި ފިޒިކަލީވެސް ތައްޔާރުވާން ޖެހޭކަމަށެވެ.ކުރިން ސާފް ޗެމްޕިއަންޝިޕުގެ ނަމުގައި ކުރިޔަށް ގެންދިޔަ މުބާރާތް ދެން ކުރިޔަށްދާނި ސާފް ސުޒުކީ ކަޕުގެ ނަމުގައެވެ. އަންނަ މަހު ފަށާ މި މުބާރާތުގައި ރާއްޖެ ކުޅޭ ފުރަތަމަ މެޗުގައި ސައުވީސް ވަނަ ދުވަހު ބައްދަލުކުރާނީ ބޫޓާނާއެވެ.