ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓް ހަމަލާގެ ތަހުޤީގުގެ އެންމެ ފަހުގެ މައުލޫމަތު ހިއްސާކުރުމަށް މިއަދު ފުލުހުން ނޫސްވެރިންނާއި ބައްދަލުކުރަން ނިންމައިފިއެވެ.
މިދިޔަ މޭމަހުގެ 6ވަނަ ދުވަހުގެރޭ ރައީސް ނަޝީދު އަވަހާރަކޮށްލުމަށް އެއްޗެއް ގޮއްވާލާ ދިން ހަމަލާގެ ތަހުޤީގާއި ގުޅޭ މައުލޫމާތު ފުލުހުން އެންމެ ފަހު ހިއްސާކުރީ މޭމަހުގެ 20 ވަނަދުވަހުއެވެ. ތަހުޤީގު ކުރިޔަށްދާތީ އެދުވަހުވެސް ފުލުހުން މާ ގިނަ މައުލޫމާތުތަކެއް ހާމަކޮށްފައެއް ނުވެއެވެ.
ރައީސް ނަޝީދަށް ދިން ހަމަލާއަށް އެއްމަސް ހަމަވާ ދުވަހާއި ދިމާކޮށް މިއަދު ފުލުހުން ބާއްވާ ނޫސްވެރިންގެ ބައްދަލުވުން ތާވަލުކޮށްފައިވަނީ މިއަދު މެންދުރު 13:30 އަށެވެ. އޮންލައިންކޮށް ކުރިޔަށް ގެންދާ މި ނޫސްވެރިންގެ ބައްދަލުވުމުގައި މައުލޫމާތު ދެއްވާނީ ކްރިމިނަލް އިންވެސްޓިގޭޝަން ކޮމާންޑުގެ ފަރާތުން ޗީފް ސުޕްރިންޑެންޓް އޮފް ޕޮލިސް މުހައްމަދު ބަޝީރާއި ސުޕްރިންޑެންޓް އޮފް ޕޮލިސް ހަސަން ޝިފާއުއެވެ.
ސައިކަލެއްގައި ބޮމެއް ގޮއްވާލާ ރައީސް ނަޝީދަށް ހަމަލާދިންތާ ދެ ދުވަހުގެ ތެރޭގައި މި ހަމަލާ ދިނުމުގައި ބައިވެރިވިކަމަށް ތުހުމަތުކުރޭވޭ ދެމީހުންވަނީ ފުލުހުން ހައްޔަރުކޮށްފައެވެ. އަދި މި ހަމަލާދިނުމުގައި އަމަލީ ގޮތުން ބައިވެރިވި މީހާވެސް މޭ މަހުގެ 9 ވަނަދުވަހު ވަނީ ހައްޔަރުކޮށްފައެވެ. މީގެއިތުރުން މި ހަމަލާއާއި ގުޅުން ހުރި އެހެން މީހަކު މޭމަހުގެ 19 ވަނަދުވަހުގެރޭ ބ. ދަރަވަންދޫއިން ވަނީ ހައްޔަރުކޮށްފައެވެ.
މި ހަމަލާއާއި ގުޅިގެން މިހާތަަނަށް ހައްޔަރުކުރި ހަތަރު މީހުންނަކީ މއ.ފޭރުގެ ޢުމުރުން 21 އަހަރުގެ މުޖާޒް އަޙްމަދާއި ގއ.ކޮނޑޭ ފޮޅޭމާގޭ ޢުމުރުން 32 އަހަރުގެ ތަހްމީނު އަޙްމަދާއި، ރައީސް ނަޝީދަށް ހަމަލާދިން ބޮން ގޮއްވާލީ ވ.ތިނަދޫ ހިޔާ ޢުމުރުން 25 އަހަރުގެ އަދުހަމް އަޙްމަދު ރަޝީދާއި ލ.ގަން / ދުންފިނި އުފާ، ޢުމުރުން 23 އަހަރުގެ އަހުމަދު ފާތިހެވެ. މީގެތެރެއިން އަދުހަމް އަޙްމަދަކީ ރައީސް ނަޝީދަށް ހަމަލާދިނުމަށް ސައިކަލްގައި ހަރުކޮށްފައި އޮތް ބޮން ގޮއްވާލުމުގައި އަމަލީ ގޮތުން ބައިވެރިވި މީހާއެވެ. ފުލުހުން އާއްމުކުރި ވީޑިއޯ ފުޓޭޖްތަކަށް ބަލާއިރު މީނާ މިކަން ކޮށްފައިވަނީ ރައީސް ނަޝީދަށް ފާރަލައިގެން ފިލާ ހުރެކަން އެގެއެވެ. ދެން މި މައްސަލާގައި ހަރަުކޮށްފައިވާ ތަހްމީނު އަޙްމަދަކީ ބޮން ހަރުކޮށް ގޮއްވާލި ސައިކަލްގެ ވެރި ފަރާތެވެ.
ރައީސް ނަޝީދު އަވަހާރަކޮށްލަން ދިން ޓެރަރިސްޓް ހަމަލާގެ ތަހުޤީގުގެ މައުލޫމާތު ހާމަކުރުން ލަސްވާތީ އެމަނިކުފާނުގެ އާއިލީ ބޭފުޅުންނާއި ސަޕޯޓަރުން އަންނަނީ ކަންބޮޑުވުން ފާޅުކުރަމުންނެވެ. ފުލުހުން މީގެ ކުރިން ވިދާޅުވީ މި މައްސަލާގައި ހައްޔަރުކޮށްފައިވާ މީހުންނާއި ތަހުޤީގު ޓީމުގައި އިސްކޮށް ހަރަކާތްތެރިވާ އޮފިސަރުން ކޯވިޑަށް ޕޮޒިޓިވްވުމުން ތަހުޤީގަށް ލަސްތަކެއް ކުރިމަތިވެފައިވާކަމަށެވެ. އެހެންނަމަވެސް މި ތަހުޤީގަށް ލިބެމުން އަންނަ ކުރި އެރުންތައް މަޖިލީހަށް ހިއްސާކުރަމުން އަންނަކަން ފުލުުހުން ވަނީ ހާމަކުރައްވާފައެވެ.
ފުލުހުން ވިދާޅުވީ މި މައްސަލާގައި ހަމަލާދިނުމުގައި ބައިވެރިވި މީހުންގެ އިތުރުން މި ހަމަލާދިނުމުގެ ފަހަތުގައި ތިބެ އެކަމަށް ހަރަދުކުރީ ކޮންބައެއްތޯވެސް ހޯދާނެކަމަށެވެ. އަދި މިކަމަށް ފަންޑުކުރި މީހުން ހޯދުމަށް ރައީސް ނަޝީދުވެސް ވަނީ ގޮވާލައްވާފައެވެ.
ރައީސް ނަޝީދަށް ދިން ހަމަލާގައި އެމަނިކުފާނުގެ ސެކިއުރިޓީ ބްރީޗްވި ގޮތުގެ އިންކުއަރީއެއް މަޖިލީހުގެ 241 ކޮމެޓިން އަންނަނީ ކުރަމުންނެވެ. މި އިންކުއަރީއަށް ކޮމިޝަނަރ އޮފް ޕޮލިސް މުހައްމަދު ހަމީދާއި ކައުންޓަ ޓެރަރިޒަމްގެ ޑިރެކްޓަރު ސުޕްރިންޓެންޑެންޓް އޮފް ޕޮލިސް ފަރީދު އިސްމާއީލް އިއްޔެ ވަނީ ހާޒިރުކޮށްފައެވެ.
ރައީސް ނަޝީދަށް ދިން ނުރައްކާތެރި ހަމަލާގައި އެމަނިކުފާނަށް ސީރިއަސް ޒަހަމްތަކެއް ލިބިވަޑައިގެން ގިނަ އޮޕަރޭޝަންތަކެއް ވަނީ ކޮށްފައެވެ. އަދި އެ ޒަހަމްތަކަށް އޭޑީކޭގައި ފަރުވާ ހޯއްދެއްވުމަށްފަހު ޖަރުމަންވިލާތަށް ވަޑައިގެން އިތުރު ފަރުވާ ވަނީ ހޯއްދަވާފައެވެ. އަދި އަންނަ މަހު އެނބުރި ރާއްޖެ ވަޑައިގެންނެވޭވަރު ވާނެކަން ރައީސް ނަޝީދު ވަނީ ހާމަކުރައްވާފައެވެ.