މިމަހުގެ 20ގެ ކުރިން، ލޯކަލް ކައުންސިލްތަކުގެ ޑެޕިއުޓީ މޭޔަރުންނާއި ނާއިބު ރައީސުން ކަނޑައަޅައި ނިންމުމަށް ލޯކަލް ގަވަރުމަންޓް އޮތޯރިޓީ (އެލްޖީއޭ)އިން އަންގަވައިފިއެވެ.
ސިޓީ ކައުންސިލްތަކަށާއި އަތޮޅު ކައުންސިލްތަކަށާއި ރަށު ކައުންސިލްތަކަށް އިންތިޚާބުކުރި ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުން ހުވައި ކުރެއްވީ މިދިޔަ މަހުގެ 17ވަނަ ދުވަހުއެވެ.
ކޯވިޑް-19އާ ގުޅިިގެން ބައެއް ރަށްރަށުގައި މެންބަރުން ހުވައި ކުރައްވައި، ކައުންސިލް ބައްދަލުވުންތައް ބޭއްވީ އޮންލައިންކޮށެވެ. އެހެންކަމުން ކައުންސިލްތަކަށް ނާއިބުން ވަނީ އަދި ކަނޑަނޭޅިފައެވެ. ސަބަބަކީ ޤާނޫނު ބަޔާންކުރާގޮތުން އެ މަޤާމުތަކަށް މީހުން އައްޔަންކުރަންޖެހޭނީ ކައުންސިލް މެންބަރުންގެ މެދުގައި ނަގާ ސިއްރު ވޯޓަކުންކަމަށްވާތީއެވެ.
އެލްޖީއޭގެ ސީއީއޯ ފާޠިމަތު އަފްޝަން ލަޠީފް ސޮއިކުރައްވައި ކައުންސިލްތަކަށް ފޮނުއްވާފައިވާ ސިޓީގައި ވަނީ، ދިވެހިރާއްޖެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ ދަށުން އިންތިޚާބުކުރާ ނާއިބު ރައީސާއި ޑެޕިއުޓީ މޭޔަރުން އިންތިޚާބުކުރުން، މެންބަރުން ހުވައި ކުރުމަށްފަހު ބާއްވާ ފުރަތަމަ ބައްދަލުވުމުގައި ފަސްކުރުމަށް އިރުޝާދު ދެއްވާފައިވާނެކަމަށެވެ. މިގޮތަށް އިރުޝާދުދެއްވީ ކޯވިޑް-19ގެ ޙާލަތާ ގުޅިގެންނެވެ. އަދި މިގޮތަށް އިރުޝާދުދެއްވުމުގައި، އިންތިޚާބުކުރާ ތާރީޚު އިއުލާނުކުރިއިރު، އިންތިޚާބީ ބައެއް މެންބަރުން ދުރާލައި އެތާރީޚަށް ރަށްރަށަށް ވަޑައިގަތުމަށް ހަމަޖައްސަންޖެހޭ އިންތިޒާމްތައް ހަމަޖެއްސުމުގެ ފުރުޞަތު ބައެއް މެންބަރުންނަށް ދީ ދުރާލައި އިންތިޒާމުތައް ހަމަޖެއްސުމަށް ވަގުތު ނުލިބުމުގެ މައްސަލަތައް ރިޢާޔަތްކުރައްވާފައި ވެއެވެ.
ނަމަވެސް ހުވައިކުރުން އޮންނަ ތާރީޚު އިއުލާން ކުރި ދުވަހުންފެށިގެން މިހާތަނަށް އެޗްޕީއޭގެ މިންގަނޑުތަކާއެކު ރަށްރަށަށް ވަޑައިގަތުމަށް މަސައްކަތްކުރެއްވި ބޭފުޅުންނަށް އެކަށީގެންވާ ވަގުތު ލިބިފައިވާކަމަށް އެލްޖީއޭއަށް ޤަބޫލުކުރެވޭތީ، ކައުންސިލްތަކުގެ ނައިބު ރައީސުންނާއި ޑެޕިއުޓީ މޭޔަރުގެ އިންތިޙާބު އޮންނަދުވަސް ކަނޑައަޅައި އެބޭފުޅުންނަށް 14 ދުވަހުގެ ނޯޓިސްއެއް ދެއްވުމަށްފަހު، މިމަހުގެ 20ވަނަ ދުވަހުގެ ނިޔަލަށް އެޗްޕީއޭގެ މިންގަނޑުތަކަށް ރިއާޔަތްކޮށް އެކަން ނިންމެވުމަށް އެލްޖީއޭއިން ވަނީ އަންގަވާފައެވެ.
ސިޓީ ކައުންސިލްތަކުގެ ތެރެއިން މިހާތަނަށް ޑެޕިއުޓީ މޭޔަރަކު ކަނޑަނާޅައި އޮތީ މާލެ ސިޓީ ކައުންސިލް އެކަންޏެވެ. ކައުންސިލްތަކުގެ ތެރެއިން ޑެޕިއުޓީ މޭޔަރުގެ ވަދަވެރިކަން އެންމެ ބޮޑުވެފައިވަނީވެސް މާލެ ސިޓީ ކައުންސިލްގައެވެ. އެގޮތުން އެކައުންސިލްގައި މޭޔަރާއެކު ހިމެނިވަޑައިގަންނަވާ 19 މެންބަރުންގެ ތެރެއިން 12 މެންބަރުންނަކީ ޕީޕީއެމްގެ މެންބަރުންނެވެ. ޑެޕިއުޓީ މޭޔަރުކަމަށް މިހާތަނަށް ޝަޢުގުވެރިކަން ފާޅުކޮށްފައިވަނީ ވިލިމާލެ ދާއިރާގެ ކައުންސިލް މެންބަރު ނަހުލާ އަލީ އާއި، މާފަންނު ދެކުނު ދާއިރާގެ ކައުންސިލް މެންބަރު ޢަބްދުﷲ ނާސިރާއި، ހުޅުމާލެ ދާއިރާގެ ކައުންސިލް މެންބަރު އިބްރާހީމް ޝުޖާޢުގެ އިތުރުން މާފަންނު މެދު ދާއިރާގެ ކައުންސިލް މެންބަރު އަހުމަދު ނަރީޝްއެވެ.
އޭޕްރީލް މަހުގެ 10ވަނަ ދުވަހު ބޭއްވި ލޯކަލް ކައުންސިލް އިންތިޚާބުން އެންމެ ގިނަ ގޮނޑި ކާމިޔާބުކުރީ ވެރިކަން ކުރާ މައި ޕާޓީ އެމްޑީޕީންނެވެ. އެމްޑީީޕީން 400 ގޮނޑި ކާމިޔާބުކޮށްފައިވާއިރު، އިދިކޮޅު ޕްރޮގްރެސިވް ކޯލިޝަނުން ކާމިޔާބު ކުރީ 325 ގޮނޑިއެވެ.