މިދިޔަ ބުރާސްފަތިދުވަހުގެ ރޭ ހިނގި އެކްސިޑެންޓްގައި، އެކްސިޑެންޓްވުމުން މަޑުނުކޮށް ފިލި ސައިކަލު ދުއްވަން އިން މީހާއާ ގުޅޭ މަޢުލޫމާތު ފުލުހުންނަށް ލިބިފައިވާ ކަމަށް ފުލުހުން ހާމަކޮށްފިއެވެ.
މިއެކްސިޑެންޓް ހިނގާފައިވަނީ ގަލޮޅު ހުވަފެނީ ގޯޅީގައި ބާއްވާފައި އޮތް ގާޑިޔަލެއްގައި އެމަގުން ދުއްވާފައި ދިޔަ ސައިކަލަކުން ޖެހިގެންނެވެ. މިއެކްސިޑެންޓްގައި ސައިކަލުގެ ފަހަތުގައި އިން މީހާގެ ކަރަށް ގާޑިޔަލުގެ މުއްގަނޑު ވަދެ، ލިބުނު ހާނިއްކަތަކުގެ ސަބަބުން ވަނީ މަރުވެފައެވެ. މަރުވެފަވަނީ އުމުން 22އަހަރުގެ ދިވެހި ޒުވާނެކެވެ. މިޒުވާނާ މަރުވީ ލިބުނު ގެއްލުންތަކަށް އޭޑީކޭ ހޮސްޕިޓަލްގައި ފަރުވާދެމުން ދަނިކޮށް ކަމަށް ފުލުހުން މަޢުލޫމާތުދެއެވެ.
ނަމަވެސް އެކްސިޑެންޓްވުމުން ސައިކަލު ދުއްވަން އިން މީހާވަނީ ފިލާފައެވެ. ފުލުހުން ވިދާޅުވީ މި އެކްސިޑެންޓާ ގުޅޭ ތަޙުޤީގު މިހާރު ކުރިއަށްދާއިރު، އެކްސިޑެންޓް ހިނގިއިރު ސައިކަލު ދުއްވަން އިން މީހާ ދެނެގަނެވި އޭނާއާ ގުޅޭ މަޢުލޫމާތު ފުލުހުންނަށް ލިބިފައިވާކަމަށެވެ. ނަމަވެސް މި މީހާ ހޯދާ ހައްޔަރުކޮށްފައިވާކަން އަދި ފުލުހުން ހާމަކޮށްފައެއް ނުވެއެވެ. މި މައްސަލައާ ގުޅިގެން އަޅަންޖެހޭ ފިޔަވަޅުތައް އެޅުމުގެ މަސައްކަތް ކުރިއަށްދާކަމަށްވެސް ފުލުހުންވަނީ ބުނެފައެވެ.
މިއެކްސިޑެންޓް ހިނގި ވަގުތަކީ މާލޭގައި އިޢުލާންކޮށްފަ އޮތް ކާފިއުއާ ގުޅިގެން ބޭރުގައި އުޅުން މަނާ ވަގުތެކެވެ. މިވަގުތުތަކުގައި ބޭރުގަ އުޅެވޭނީ ފުލުހުންގެ ޚާއްސަ ހުއްދަ އޮންނަ މީހުންނަށް އެކަންޏެވެ.