ކޯވިޑް-19ގެ ނުރައްކާ ކުޑަކުރުމަށް މިހާރު އަޅާފައިވާ ހަރުކަށި ފިޔަވަޅުތަކާއެކު، ކުރިއަށް އޮތް ދެހަފްތާގެ ތެރޭގައި ޕޮޒިޓިވް ކޭސްތައް ވަރަށް މަދުވިޔަސް، މަރުވާ މީހުންގެ އަދަދު އިތުރުވުމުގެ ފުރުޞަތު އެބައޮތްކަމަށް، ޓެކްނިކަލް އެޑްވައިޒަރީ ގްރޫޕް، ޓެގްއިން ބުނެފިއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި، ޕަބްލިކް ހެލްތު އެކްސްޕާޓް ޑރ. ޝީނާ މޫސާގެ އަންދާޒާތަކާއި ހަވާލާދެއްވާ ޓެގް ޓީމްގެ ފަރާތުން ޑރ. ނަޒްލާ މުސްތަފާ ވިދާޅުވީ މިހާރު މީހުން ޕޮޒިޓިވްވާ ނިސްބަތަށް ބަލާއިރު އެކަށިގެންވާ ފިޔަވަޅުތައް ނާޅަނަމަ އެންމެ ގިނައިން ޕޮޒިޓިވްވާ ދުވަހުވެސް 7000 މީހުން ޕޮޒިޓިވްވެދާނަކަމަށެވެ. އަދި ކޮންމެވެސް ވަރެއްގެ ފިޔަވަޅުތަކެއް އަޅާފައިވާނަމަ ދުވާލަކަށް 6000 މީހުން އަދި މިހާރު އިއުލާންކޮށްފައިވާ ލޮކްޑައުންގެ ކުރިން އަޅާފައިވާ ފިޔަވަޅުތަކުގައި ތިބިނަމަ ހާލަތު އެންމެ ގޯސްވާ ހާލަތުގައިވެސް 3000 މީހުން ޕޮޒިޓިވްވާނެކަމަށް ލަފާކުރެވޭކަމަށް ނަޒްލާ ފާހަގަކުރެއްވިއެވެ.
"ލޮކްޑައުންނެއް ނުވަތަ ވަރުގަދަ ފިޔަވަޅުތަކެއް އަޅައިފިނަމަ އެންމެ ޕީކަށްދާއިރު 500އަށް ޕޮޒިޓިވްވާ މީހުންގެ އަދަދު ނާރާ ހިފެހެއްޓޭނެކަމަށް އޭރުގެ ޕްރޮޖެކްޝަންތަކުން ދައްކާފައިވަނީ. ދެން އަޅުގަނޑުމެން މިހާތަނަށް އައިއިރު ގާތްގަނޑަކަށް 2000އަށް އަރާފައިމިވަނީ، ދެން އަޅުގަނޑުމެންގެ އުންމީދަކީ މިހާރު މި ރެސްޓްރިކްޝަން އިތުރަށް ވަރުގަދަކުރީމަ، ދެން އަންނަ ދެ ހަފްތާވަރުގެ ތެރޭގައި އިރާދަކުރެއްވިއްޔާ ނަންބަރުތައް ވަރަސް ދަށްކުރެވޭނެ" ޑރ. ނަޒްލާ ވިދާޅުވިއެވެ.
ނަޒްލާ ވިދާޅުވީ ފިޔަވަޅުތަކާއެކު ޕޮޒިޓިވްވާ މީހުންގެ އަދަދުތައް މަދުވެގެން ދިޔަނަމަވެސް މިބަލީގައި ނިޔާވާ މީހުންގެ ޢަދަދު އިތުރުވުމުގެ ފުރުސަތު އެބައޮތްކަމަށެވެ. ނަމަވެސް ފިޔަވަޅުތަކަށް ރަނގަޅަށް ސަމާލުކަންދީ، އަދަދު މަދުކޮށްފިނަމަ ނުރައްކާ ކުޑަވެގެންދާނެކަމަށްވެސް ނަޒްލާ ވިދާޅުވިއެވެ.
"މިވަގުތު އިންފެކްޓުވާ މީހުން މިހުންނާއި އިތުރަށް ބައްޔަށް ހުށައެޅޭ މީހުން އިތުރަށް ބަލިވެ އެޑްމިޓުވުމާއި، ހާލު ސީރިއަސްވެ ނިޔާވުމާހަމައަށްވެސް އަދި ވަގުތު ނަގާނެ. އެހެންވީމަ އަޅުގަނޑުމެން ނަންބަރު ދަށްކުރިކަމުގައިވީނަމަވެސް ނިޔާވާ ނިސްބަތް ދަށްވުމަށް އަދި ވަގުތު ނަގާފާނެ"
އާންމުކޮށް ކޯވިޑް-19އަށް ޕޮޒިޓިވްވެ ހަފްތާއެއްހާ ދުވަހުގެ ތެރޭގައި ބަލިން ރަނގަޅުވަމުން ދިޔަނަމަވެސް މިހާރު ބައެއް މީހުން 5 ދުވަހާއި 10 ދުވަސްތެރޭގައި އިތުރަށް ބަލިހާލަތު ގޯސްވާކަން ނަޒްލާ ފާހަގަކުރެއްވިއެވެ. އަދި މިފަދަ ކަންކަން ދިމާވާނަމަ ލަސްނުކޮށް ޑޮކްޓަރަށް ދެކުން ވަރަށް މުހިންމުކަމަށް ޑރ. ނަޒްލާ ވިދާޅުވިއެވެ.
ޚާއްސަކޮށް އުމުރުން ދުވަސްވީ މީހުންނާއި ބޮޑެތި ބަލިތައް ތަހަންމަލް ކުރާ ފަރާތްތަކާއި، މާބަނޑު މީހުން މިފަދަކަމެއް ދިމާވާނަމަ އިތުރަށް ސަމާލުވެ ރައްކާތެރިވުމަށް ވަނީ އިލްތިމާސްކޮށްފައެވެ.
ރާއްޖޭގައި ކޯވިޑްގެ ހާލަތު ނުރައްކާތެރި ހިސާބަކަށް ގޮސްފައިވާއިރު، މާލެ ސަރަޙައްދުގެ އިތުރުން، ރާއްޖޭގެ ބައެއް ރަށްރަށުގައިވެސް ކާފިއު ހިންގަމުންނެވެ. އަދި މާލެ ސަރަޙައްދުގައި ކާފިއު ނޫން ވަގުތުތަކުގައިވެސް ބޭރަށް ނިކުތުން ވަނީ މަނާކޮށްފައެވެ.