އިންގްލިޝް ޕްރިމިއަރ ލީގުގައި ޗެމްޕިއަން މެންޗެސްޓަރ ސިޓީއިން ކުޅުނު މިސީޒަންގެ ފަހުމެޗް ފަސޭހަ ކަމާއެކު ކާމިޔާބުކޮށްފިއެވެ. ސިޓީގެ ދަނޑުގައި ކުޅުނު މިމެޗް އެޓީމް ކާމިޔާބުކުރީ އެވަޓަން އާއި ބައްދަލުކޮށް 5 ލަނޑު ސުންލަނޑުންނެވެ.
ސިޓީގެ ފަރާތުން މޮޅު ކުޅުމެއް ފެނިގެންދިޔަ މިމެޗްގެ ފުރަތަމަ ލަނޑު މެޗްގެ އެގާރަވަނަ މިނެޓްގައި އެޓީމަށް ކާމިޔާބުކޮށްދިނީ ކެވިން ޑި ބްރުއިނަރއެވެ. އަދި ދެވަނަ ލަނޑު އޭގެ ތިން މިނެޓްފަހުން ޖަހައި ސިޓީގެ ލީޑު ފުޅާކޮށްދިނީ ގެބްރިއަން ޖޭސުސްއެވެ. ސިޓީގެ ތިންވަނަ ލަނޑު މެޗްގެ 53 ވަނަ މިނެޓްގައި ޖަހައިދިނީ ފިލް ފޯޑަންއެވެ. އަދި ފަހު ދެލަނޑު މެޗްގެ 71 ވަނަ މިނެޓާއި 76 ވަނަ މިނެޓްގައި ޖަހައިދިނީ މިސީޒަނަށްފަހު ޓީމާއި ވަކިވާކަން ހާމަކޮށްފައިވާ ތަޖްރިބާކާރު ފޯވަޑް ސަރޖިއޯ އަގުއެރޯއެވެ. މިއީ އޭނާ ސިޓީއަށް ކާމިޔާބުކޮށްދިން 259 އަދި 260 ވަނަ ލަނޑެވެ. އަދި މިދެލަނޑާއެކު އަގުއެރޯވަނީ ޕްރިމިއަރ ލީގުގައި އެއް ކްލަބަކަށް އެންމެ ގިނަ ލަނޑު ޖެހުމުގެ ރިކޯޑްވެސް މުގުރާލާފައެވެ. އޭނާވަނީ ސިޓީއަށް ލީގުގައި 184 ލަނޑު ޖަހައިދީފައެވެ. މިރިކޯޑް ރެއާހަމައަށް އޮތީ 183 ލަނޑު ޖަހާފައިވާ ވޭން ރޫނީއަތުގައެވެ. އަގުއެރޯ ސިޓީއަށް ކުޅެދިން ފުރަތަމަ މެޗްގައިވެސް ފަހު ހާފްގައި ބަދަލު ކުޅުންތެރިއެއްގެ ގޮތުގައި ކުޅެން އަރާ ދެލަނޑު ޖަހާފައިވާއިރު އެޓީމަށް ލީގުގައި ކުޅެދިން ފަހުމެޗްގައިވެސް މިވަނީ ދެވަނަ ހާފްގައި ކުޅެން އަރާ ދެ ލަނޑު ކާމިޔާބުކޮށްދީފައެވެ.
ރޭގެ މެޗް ބަލާލުމަށް މިސީޒަންގައި ފުރަތަމަ ފަހަރަށް ސިޓީގެ ދަނޑަށް އެޓީމްގެ ސަޕޯޓަރުން ވަނުމުގެ ހުއްދަވަނީ ލިބިފައެވެ. އަދި އެޓީމްގެ ސަޕޯޓަރުންވަނީ ސިޓީގެ ކާމިޔާބީ ވަރަށް އުފަލާއެކު ފާހަގަކޮށްފައެވެ. މެޗަށްފަހު ޕްރިމިއަރ ލީގުގެ ތައްޓާއި މެޑަލް ހަވާލު ކުރުމުގެ ރަސްމިއްޔާތުވެސް ރޭގައި ބާއްވާފައިވެއެވެ. މިފަހަރު ސިޓީއިން ޕްރިމިއަރ ލީގު ކާމިޔާބު މިކުރީ 38 މެޗުން ލިބުނު 86 ޕޮއިންޓާއެކުއެވެ. އެޓީމާއި އެންމެ ގާތުން ވާދަކުރި މެންޗެސްޓަރ ޔުނައިޓެޑަށް ކާމިޔާބުކުރެވުނީ 74 ޕޮއިންޓެވެ.