މިއަންނަ މަހު ފެށުމަށް ހަމަޖެހިފައިވާ ޔޫރޯ 2020 ގައި ނެދަލަންޑްސްގެ ތަޖްރިބާކާރު ޑިފެންޑަރ ވަރޖިލް ވެން ޑައިކްއަށް ނުކުޅެވޭނެކަމަށް އޭނާ ބުނެފިއެވެ. ވެން ޑައިކް އަންނަނީ މިދިޔަ އަހަރުގެ އޮކްޓޯބަރު މަހުގެ ތެރޭގައި ފަޔަށް ލިބުނު އަނިޔާ އަކާއި ގުޅިގެން ކުޅުމާއި ގިނަ ދުވަސްތަކެއް ވަންދެން ދުރުގައި ހުރުމަށްފަހު އެނބުރި ކުޅުމުގެ ތެރެއަށް އާދެވެތޯ މަސައްކަތް ކުރަމުންނެވެ.
ނެދަލަންޑްސްގެ ކެޕްޓަންކަންވެސް ކުރަމުން އަންނަ ވެން ޑައިކް ހާމަކުރިގޮތުގައި އޭނާއަށް ގަބޫލް ކުރެވޭގޮތުގައި މިވަގުތަށް އެންމެ ރަނގަޅު ނިންމުމަކަށް ވާނީ ޔޫރޯ ގައި މިފަހަރު ނުކުޅެ ލިބިފައިވާއަނިޔާއިން މުޅިން ރަނގަޅުވެ އެއްކޮށް ފިޓް ވެގެން ކުޅުމުގެ ތެރެއަށް އައުން ކަމަށެވެ. މިއީ އޭނާ ނިންމި އެހާ ފަސޭހަ ނިންމުމެއް ނޫން ކަމަށެވެ. ވެން ޑައިކް މިފަހަރުގެ ޔޫރޯއަށް ފިޓްވާނެކަމަށް ކުރިން އޮތީ ބެލެވިފައެވެ. ނަމަވެސް ވެން ޑައިކް ބުނީ އޭނާގެ ރިހެބިލިޓޭޝަންގެ ކަންތައްތައް ދަނީ ވަރަށް ރަނގަޅަށް ކަމަށާއި ނަމަވެސް ކުރިން ހީކުރި ގޮތަށް ޔޫރޯއަށް ފިޓްވުމުގެ ފުރުސަތު ނެތްކަމަށެވެ.
ވެން ޑައިކްއަށް މިފަހަރުގެ ޔޫރޯގައި ނެދަލަންޑްސް އަށް ނުކުޅެވޭތީ ވަރަށް ދެރަވާކަމަށާއި ނަމަވެސް މިއީ މިފަހަރު ކަން ދިމާވި ގޮތް ކަމަށާއި މިހާރު އޭނާގެ އަމާޒު ހިފާފައިވަނީ ކުރިއަށް އޮތް ސީޒަންގެ ގެ ކުރިން އޮންނަ ޕްރީ ސީޒަންގައި ލިވަޕޫލްގެ ފަރިތަ ކުރުންތަކުގައި ބައިވެރިވުންކަމަށެވެ. މިފަހަރު ވެންޑައިކް ނެތް ތަން ލިވަޕޫލުން ވަރަށް ބޮޑަށް އަންނަނީ ފެންނަމުންނެވެ. މިގޮތުން މިސީޒަންގައި ލިވަޕޫލަށް ދިމާވެފައިވާ އަނިޔާގެ މައްސަލަ ތަކުގެ ސަބަބާއެކު އެޓީމް މިހާރު އުޅެނީ ޕޮއިންޓް ތާވަލްގެ ހަވަނައިގައެވެ. އަދި އަންނަނީ މިއަންނަ ސީޒަންގައި ޗެމްޕިއަންސް ލީގުގެ ޖާގައެއް ހޯދޭތޯ މަސައްކަތް ކުރަމުންނެވެ.
ލިވަޕޫލްގެ ކޯޗް ޔަރގަން ކްލޮޕް ބުނީ ޔޫރޯ މިއައީ ވެން ޑައިކްއަށް ބައިވެރިވެވޭވަރަށްވުރެ ތަންކޮޅެއް ކުރިން ކަމަށާއި އޭނާގެ ރިހެބިލިޓޭޝަންގެ ކަންތައްތަކުގައި އަވަސް އަރުވާލައިގެން އުޅުމަކީ ރަނގަޅު ކަމެއް ނޫންކަމަށެވެ. އަދި އެންމެންވެސް މިކަމުގައި ކެތްތެރިކަމާއެކު މަސައްކަތް ކުރުން ވަރަށް މުހިންމު ކަމަށްވެސް ކްލޮޕް ބުންޏެވެ.