ކޯވިޑުން ރައްކާތެރިވުމަށް އެޗްޕީއޭއިން އަޅާފައިވާ އައު ފިޔަވަޅުތައް ތަންފީޒުކުރަން ސަލާމަތީ ބާރުތައް ގުޅިގެން މަސައްކަތް ކުރެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އަންގަވައިފިއެވެ. ރާއްޖޭގައި ކޯވިޑް ފެތުރޭ މިންވަރު އެއް ދުވަހުން އަނެއް ދުވަހަށް އިތުރުވަމުން އައިސް މިދިޔަ 24 ގަޑިއިރުގެ ތެރޭގައި މިބަލި ޖެހުނު މީހުންގެ އަދަދުވަނީ 1500 އިން މައްޗަށް އަރާފައެވެ.
ރާއްޖޭގައި ކޯވިޑް ކޭސްތައް ފެންނަ އަދަދު އިތުރުވަމުން އަންނައިރު މި ބަލީގައި އެންމެ ގިނަ އަދަދެއްގެ މީހުން ފެންނަމުން އަންނަނީ މާލެ ސަރަހައްދުންނެވެ. މިދިޔަ 24 ގަޑިއިރުގެތެރޭގައިވެސް މާލޭ ސަރަހައްދުން 1229 މީހަކު ވަނީ މި ބައްޔަށް ޕޮޒިޓިވްވެފައެވެ.
މާލޭ ސަރަހައްދުން ކޯވިޑް ފެންނަ އަދަދު އިތުރުވުމުން މި ސަރަހައްދުގައި އަޅާފައިވާ ފިޔަވަޅުތައް އިތުރަށް ހަރުކަށިކޮށް އެ ފިޔަވަޅުތައް އެއް ހަފްތާގެ މުއްދަތަށް ތަންފީޒުކުރުމަށް އެޗްޕީއޭއިން ވަނީ ނިންމާފައެވެ. އެގޮތުން މިއަދުން ފެށިގެން މިމަހުގެ 18ގެ ނިޔަލަށް މާލޭ ސަރަހައްދުގައި ހަވީރު 04:00 ފަތިހު 04:00 ބޭރަށް ނުކުމެ އުޅުމަކީ މަނާކަމެކެވެ. އަދި މި މުއްދަތައް މިސްކިތްތަކުގައި ޖަމާއަތުގައި ނަމާދުކުރުންވެސް މިވަނީ މެދުކަނޑާލާފައެވެ. މީގެއިތުރުން މާލޭ ސަރަހައްދުގެ ހޮޓާ ރެސްޓޯރަންޓްތަކުގައި މީހުން ވައްދައިގެން ކެއިން ބުއިމުގެ ހިދުމަތް ދިނުންވެސް ވަނީ މަނާކޮށްފައެވެ. އަދި ޑެލިވަރީގެ ހިދުމަތްވެސް ދެވޭނީ ދަންވަރު 12 އާއި ހަމައަށެވެ.
މި ފިޔަވަޅުތަކުގެ އިތުރުން ދެކުނު އޭޝިޔާގެ ޤައުމުތަކުން ރާއްޖެއަށް ދަތުރުކުރާ ފަތުރުވެރިންނަށް ޓުއަރިސްޓް ވިސާ ދިނުން ވަގުތީ ގޮތުން މެދުކަނޑާލަންވެސް ވަނީ ނިންމާފައެވެ. މި ނިންމުމަށް އަމަލުކުރަން ފަށާނީ މިމަހުގެ 13ވަނަދުވަހުން ފެށިގެންނެވެ.
އެޗްޕީއޭއިން އަޅާފައިވާ އައު ފިޔަވަޅުތައް ތަންފީޒުކުރުމަށް ހާއްސަ ސަމާލުކަމެއް ދިނުމަށް ސަރުކާރުން ވަނީ މަސައްކަތް ފައްޓާވާފައެވެ. މިގޮތުން މިފިޔަވަޅުތަކަށް އަމަލުކުރާކަން ކަށަވަރުކުރުމަށް ސަލާމަތީ ބާރުތަކަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ އަންގަވާފައެވެ. މިގޮތުން މި ފިޔަވަޅުތައް ތަންފީޒުކުރުމަށް ފުލުހުންނާއި ސިފައިން ގުޅިގެން މަސައްކަތް ކުރެއްވުމަށާއި އެ މަސައްކަތްތައް އިތުރަށް ހަރުދަނާ ކުރެއްވުމަށްވެސް ރައީސް ވަނީ އަންގަވާފައެވެ.
ކޯވިޑްގެ އައު ވޭރިއަންޓާއި އެކު ރާއްޖޭގައި މި ބަލިޖެހޭ މީހުންގެ އަދަދު އިތުރުވަމުން އަންނައިރު އޭގެތެރޭގައި ގިނަ އަދަދެއްގެ ޒުވާނުންނާއި ކުޑަކުދިންވެސް ހިމެނޭ މިންވަރުވަނީ އިންތިހާ ދަރަޖައަށް އިތުރުވެފައެވެ. ބަލިޖެހޭ މީހުންގެ ތެރޭގައި ވެކްސިންގެ އެއްވެސް ޑޯޒެއް ނުޖަހާ މީހުންނާއި ދެ ޑޯޒް ފުރިހަމަ ނުކުރާ މީހުން ތިބިކަންވެސް ސިއްހީ އޮފިޝަލުން އަންނަނީ ފާހަގަކުރަމުންނެވެ. އަދި މިފަދަ މީހުންގެ ހާލު ބޮޑުވާކަންވެސް އޮފިޝަލުން ފާހަގަކުރެއެވެ. މި ބަލީގައި މިވަގުތުވެސް 11 ހާހަށް ވުރެ ގިނަ މީހުންނަށް އަންނަނީ ފަރުވާ ހޯދަމުންނެވެ. ބަލީގައި މިހާތަނަށް 87 މީހަކު ރާއްޖެއިން ނިޔާވެފައިވާއިރު ފަރުވާ ދިނުމަށް ބޭނުންކުރާ ފެސިލިޓީތަކަށް ބާރު ބޮޑުވެ އެނދުތައް ހުސްވެދާނެކަމުގެ ބިރުވެސް ވަނީ ހީވާން ފަށާފައެވެ
ބަލިން ރައްކާތެރިވުމަށް އަޅަންޖެހޭ ފިޔަވަޅުތަކަށް ފަރުވާކުޑަނުކުރުމަށް ކަމާއި ބެހޭ އިދާރާތަކުން އަންނަނީ ގޮވާލަމުންނެވެ. މިގޮތުން ކޮންމެހެން ބޭރަށް ދާންޖެހިގެން ނޫނީ ބޭރަށް ނުނިކުތުމަށް ހާއްސަ ސަމާލުކަމެއް ދިނުމަށް ސިއްހީ މާހިރުން އިލްތިމާސްކުރައްވައެވެ.