ކޮރަޕްޝަނަކީ ކޮބައިކަން އިތުރަށް މާނަކޮށްދިނުމަށް ރައްޔިތުންގެ މަޖިލީހުން ފާސްކުރެއްވި އިޞްލާހުގެ ބިލް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ތަސްދީޤްކުރައްވައިފިއެވެ.
އެންޓި-ކޮރަޕްޝަން ކޮމިޝަނުގެ ޤާނޫނަށް އިޞްލާހު ގެނައުމުގެ އެބިލަކީ ރައްޔިތުންގެ މަޖިލީހުގެ މިދިޔަ މަހުގެ 19 ވަނަ ދުވަހުގެ ޖަލްސާގައި ފާސްކޮށްފައިވާ އިޞްލާހެކެވެ.
ރައީސުލްޖުމްހޫރިއްޔާ މިއަދު ތަސްދީޤްކުރެއްވި މި އިޞްލާހުގައި "ކޮރަޕްޝަން" ކަމަށް ބުނެފައިވަނީ، ކޮރަޕްޝަންގެ ކުށާއި، ކޮރަޕްޝަންގެ ކުށެއް ކުރުމަށްޓަކައި ހިންގާ އެންމެހައި ޢަމަލުތައް ހިމެނޭ ކަންކަމަށެވެ. އެންޓި ކޮރަޕްޝަން ޤާނޫނުގައި ކޮރަޕްޝަން ކަމަށް މިހާރު މާނަކޮށްފައިވަނީ ކޮރަޕްޝަން ހުއްޓުވުމާއި މާނަކުރުމުގެ ގާނޫނުގައިވާ ކުށްތައް އެކަންޏެވެ.
މީގެ އިތުރުން ރައީސް ތަސްދީޤްކުރެއްވި ބިލުގައި "ކޮރަޕްޝަންގެ ކުށް" ކަމަށް ބުނެފައިވަނީ، ޤާނޫނު ނަންބަރު 2014/9 (ދިވެހިރާއްޖޭގެ ޤާނޫނުލްޢުޤޫބާތު) ގެ 510، 513، 515، 516، 517 އަދި 518 ވަނަ މާއްދާގައި ކަނޑައަޅާފައިވާ ކުށްކުށާއި، އެނޫންވެސް ޤާނޫނެއްގައި ކޮރަޕްޝަންގެ ކުށް ކަމުގައި ކަނޑައަޅާފައިވާ ކޮންމެ ކުށެކެވެ.
ރައީސުލްޖުމްހޫރިއްޔާ މި ބިލު ތަޞްދީޤްކުރެއްވުމާއި ގުޅިގެން އެންޓި-ކޮރަޕްޝަން ކޮމިޝަނުގެ ޤާނޫނަށް ދެވަނަ އިޞްލާޙު ގެނައުމުގެ ޤާނޫނު ވަނީ ދިވެހިސަރުކާރުގެ ގެޒެޓުގައި ޝާއިޢު ކުރައްވާފައެވެ. މި ޤާނޫނަށް ޢަމަލުކުރަން ފެށުމަށް ހަމަޖެހިފައި ވަނީ މި ޤާނޫނު ތަޞްދީޤުކޮށް، ގެޒެޓުގައި ޝާއިޢުކުރާ ދުވަހުން ފެށިގެންނެވެ.
ކޮރަޕްޝަނާއި ކޮރަޕްޝަން ކުށް މާނަކުރާ ގޮތާއި ގުޅޭގޮތުން ޤާނޫނަށް އިޞްލާހު ގެނެސްފައިމިވަނީ، ޤާނޫނުގައި ކުރިއަށް އޮތްގޮތުން ކޮރަޕްޝަންގެ ތުހުމަތު ކުރެވޭ މީހުންގެ މައްޗަށް ދައުވާކުރުމަށް ދަތިތަކެއް ހުރިކަމަށް ޕްރޮސެކިއުޓަރ ޖެނެރަލާއި އެންޓި ކޮރަޕްޝަން ކޮމިޝަން (އޭސީސީ)އިން ބުނެފައި ވާތީއެވެ.