ކޯވިޑް-19 ފެތުރުން ހުއްޓުވުމަށް ޚާއްޞަ ފިޔަވަޅުތަކެއް މިޞްރުގައި އަޅައިފިއެވެ.
މިޞްރުގައި މިހާތަނަށް 231،803 މީހުންނަށް ކޯވިޑް-19 ޖެހި 13،591 މީހުންވަނީ މަރުވެފައެވެ. ފާއިތުވި ހަފުތާތަކުގައި އެ ޤައުމުގައި ބަލިޖެހޭ މީހުންގެ ޢަދަދު ދަނީ އެއް ދުވަހުން އަނެއް ދުވަހަށް އިތުރުވަމުންނެވެ. އެންމެ ފުރަތަމަ ކޯވިޑް-19 ފެތުރެން ފެށުމުން މިޞްރުންވަނީ ރައްކާތެރިކަމުގެ ހަރުކަށި ފިޔަވަޅުތަކެއް އަޅައިފައެވެ. ނަމަވެސް މިދިޔަ އަހަރުގެ ޖޫން މަހުން ފެށިގެން ގިނަ ފިޔަވަޅުތަކަކަށް ބޮޑެތި ލުއިތައް ދީފައިވެއެވެ. މި އަހަރުގެ ރަމަޟާން މަހުގައި ޢާއިލާތައް ބައްދަލުކުރާ މިންވަރު އިތުރުވުމުންނާއި ކުރިއަށް އޮތް ފިޠުރު ޢީދު ފާހަގަކުރުމުގެ ތެރޭގައި ބަލިޖެހޭ މީހުންގެ ޢަދަދު އިތުރުވާނެކަމަށް އެ ޤައުމުގެ ޞިއްޙީ މާހިރުން ބުނެއެވެ.
ކުރިއަށް އޮތް ދުވަސްތަކުގައި ބަލިފެތުރޭ މިންވަރު މަދުކުރުމަށް މިޞްރުގެ ފިހާރަތާކާއި ވިޔަފާރި މަރުކަޒުތަކާއި ކެފޭތަކާއި ރެސްޓޯރަންޓުތައް ބަންދުކުރާ ގަޑި އަވަސްކުރުމަށްވަނީ ނިންމައިފައެވެ. އެގޮތުން މެއި މަހުގެ 6ވަނަ ދުވަހުން ފެށިގެން ދެ ހަފުތާގެ މުއްދަތަށް ރޭގަނޑު 9 ޖަހާއިރު އެ ތަންތަން ބަންދުކުރާނެއެވެ. އޭގެ އިތުރުން ގިނަ މީހުން އެއްފަހަރާ އެއްވެ އުޅުން މަނާކޮށް ޕާކުތަކާއި ގޮނޑުދޮށްތައް މެއި މަހުގެ 12ވަނަ ދުވަހުން 16ވަނަ ދުވަހަށް ބަންދުކުރުމަށްވަނީ ނިންމައިފައެވެ.
މިޞްރުގެ ބޮޑުވަޒީރު މުސްޠަފާ މަދުބޫލީ ވިދާޅުވީ ރައްކާތެރިކަމުގެ ފިޔަވަޅުތަކާ އެއްގޮތަށް ޢާންމުން ޢަމަލުނުކުރާތީ ސަރުކާރުން ކަންބޮޑުވާކަމަށެވެ. ފާއިތުވި ދުވަސްތަކުގައި މާސްކު އެޅުމުގެ ޤަވާއިދުތަކާ ޚިލާފުވި 1.7 މިލިޔަން މީހުން ޖޫރިމަނާކޮށްފައިވާކަމަށް އޭނާ ވިދާޅުވިއެވެ. ޢާއިލާއެއްގެ މީހަކަށް ބަލިޖެހޭ ޙާލަތުގައި މުޅި ޢާއިލާއަށް ބަލިފެތުރޭ މަންޒަރު ފެންނަމުންދާކަމަށް އޭނާ ވިދާޅުވިއެވެ.
ކޯވިޑް-19އާ ދެކޮޅަށް މިޞްރުގައި ވެކްސިން ދޭން ފަށާފައިވަނީ މިދިޔަ ޖަނަވަރީ މަހުގެ ތެރޭގައެވެ. އެ ޤައުމުގައި މިހާތަނަށް 1 މިލިޔަނެއްހާ މީހުންނަށް ވެކްސިން ދީފައިވެއެވެ.