މި އަހަރުގެ ޙައްޖު މޫސުމުގައި ބޭރު ޤައުމުތަކުގެ ޙައްޖުވެރިންނަށް ފުރުޞަތު ނުދިނުމަށް ސަޢުދީ ޢަރަބިއްޔާއިން ވިސްނަމުންދާކަމަށް އިތުބާރުހުރި މަސްދަރުތަކަކުން ބުނެފިއެވެ.
އަހަރަކު ދެ މިލިއަނަށްވުރެ ގިނަ މުސްލިމުން ބައިވެރިވާ ޙައްޖުގެ އަޅުކަމުގައި މިދިޔަ އަހަރު ބޭރު ޤައުމުތަކުން ދަތުރުކުރާ މީހުންނަށް ބައިވެރިވުމުގެ ފުރުޞަތު ސަޢުދީ ޢަރަބިއްޔާއިން ދީފައެއް ނުވެއެވެ. މިދިޔަ އަހަރު ޙައްޖުވުމުގެ ފުރުޞަތު ދީފައިވަނީ ސަޢުދީ ޢަރަބިއްޔާގައި ދިރިއުޅޭ 1،000 މީހުންނަށެވެ. އެ ޤައުމުން އެގޮތަށް ނިންމީ ޙައްޖުގައި ބައިވެރިވާ މީހުންގެ ސަލާމަތާއި ރައްކާތެރިކަން ޔަޤީންކުރުމަށެވެ.
ކޯވިޑް-19ގެ ނުރައްކާތެރި އެކި ވައްތަރުތައް ދުނިޔޭގެ އެކި ސަރަޙައްދުތަކުގައި ދަނީ ހަލުވިކަމާއެކު ފެތުރެމުންނެވެ. އެހެންކަމުން މިދިޔަ އަހަރެކޭ އެއްގޮތަށް މި އަހަރުވެސް އެހެން ޤައުމުތަކުން ދަތުރުކުރާ މީހުންނަށް ޙައްޖުވުމުގެ ފުރުޞަތު ނުދިނުން އެކަށީގެންވެއެވެ. ޙައްޖުގެ އަޅުކަމުގައި ބައިވެރިވުމުގެ ފުރުޞަތު މި އަހަރު ދޭނީ ސަޢުދީ ޢަރަބިއްޔާގައި ދިރިއުޅޭ ވެކްސިންގެ ޑޯޒުތައް ފުރިހަމަކޮށްފައިވާ މީހުންނާއި ފަހުގެ ތާރީޚެއްގައި ކޯވިޑް-19 ޖެހި ރަނގަޅުވެފައިވާ މީހުންނަށްކަމަށް ބެލެވެއެވެ. އަދި ވަކި އުމުރުފުރައެއްގެ މީހުންނަށް ޙައްޖުގެ އަޅުކަމުގައި ބައިވެރިވުމުގެ ޙުއްދަ ދިނުންވެސް އެކަށީގެންވެއެވެ. މަޝްވަރާތަކެއް ކުރި ނަމަވެސް އެ ޤައުމުގެ ސަރުކާރުން ވަކި ގޮތެއް އަދި ނިންމައިފައެއް ނުވެއެވެ.
ސަޢުދީ ޢަރަބިއްޔާގައި މިހާތަނަށް 422،316 މީހުންނަށް ކޯވިޑް-19 ޖެހި 7،018 މީހުންވަނީ މަރުވެފައެވެ. ކޯވިޑް-19 ފެތުރުން ހުއްޓުވުމަށް މިދިޔަ އަހަރުގެ މާރިޗު މަހުގެ ތެރޭގައި އެ ޤައުމުން އެހެން ޤައުމުތަކަށް ދަތުރުކުރުން މަނާކުރިއެވެ. އެއަށްފަހު އެ އަހަރުގެ ޖުލައި މަހުގެ ތެރޭގައި ސަރަޙައްދީ ރޮނގުތައް އަލުން ހުޅުވިއެވެ. ނަމަވެސް އޭރު އެ ޤައުމުގެ ރައްޔިތުން ޤައުމުން ބޭރަށް ދަތުރުކުރުން އޮތީ މަނާކޮށްފައެވެ. މިދިޔަ ޖަނަވަރީ މަހުގެ ތެރޭގައި ދަތުރުފަތުރުކުރުމުގެ ޙުއްދަދިނުމަށް ސަރުކާރުން ވިސްނި ނަމަވެސް އެ ނިންމުންވަނީ ފަސްކޮށްފައެވެ. އޭގެ ފަހުން ފެބްރުއަރީ މަހުގެ ތެރޭގައި 20 ޤައުމެއްގެ މީހުން ސަޢުދީ ޢަރަބިއްޔާއަށް އެތެރެވުންވަނީ މަނާކޮށްފައެވެ. ނަމަވެސް ސަޢުދީ ޢަރަބިއްޔާގެ ރައްޔިތުންނާއި ޤައުމުތަކުގެ ޚާރިޖީ މުވައްޒަފުންނާއި ޞިއްޙީ ޚިދުމަތްތެރިންނާއި އެ މީހުންގެ ޢާއިލާތަކަށް ޤައުމަށް އެނބުރި އައުމުގެ ފުރުޞަތު ދީފައިވެއެވެ.