ޖީ7ގެ ޤައުމުތަކުގެ ޚާރިޖީ ވަޒީރުންގެ ބައްދަލުވުމުގައި ބައިވެރިވުމަށް އިނގިރޭސިވިލާތަށް ދަތުރުކުރި އިންޑިޔާގެ 2 މުވައްޒަފުންނަށް ކޯވިޑް-19 ޖެހިފައިވާކަން އެނގުމުން އިންޑިޔާގެ ޚާރިޖީ ވަޒީރު ސުބްރަމާންޔަމު ޖައިޝަންކަރާއި އޭނާގެ މުޅި ވަފުދު އެކަހެރިވެއްޖެއެވެ. އިންޑިޔާއަކީ ދުނިޔޭގައި އެންމެ ހަލުވިކޮށް ބަލިފެތުރެމުންދާ ޤައުމެވެ.
ޖީ7ގައި ހިމެނެނީ އިނގިރޭސިވިލާއި ފަރަންސޭސިވިލާތާއި ޖަރުމަނުވިލާތާއި އިޓަލީވިލާތާއި ޖަޕާނާއި އެމެރިކާއާއި ކެނެޑާއެވެ. އެއީ ދުނިޔޭގެ އެންމެ ބާރުގަދަ އަދި ނުފޫޒުގަދަ ޤައުމުތަކެވެ. 2019ވަނަ އަހަރުގެ ފަހުން އެ ޤައުމުތަކުގެ އިސްވެރިންގެ މެދުގައި ބާއްވައި ފުރަތަމަ ޖީ7ގެ ބައްދަލުވުން އަންނަ މަހުގެ ތެރޭގައި އިނގިރޭސިވިލާތުގައި ބޭއްވުމަށްވަނީ ހަމަޖެހިފައެވެ. އެ ބައްދަލުވުމުގެ ކުރިން ޖީ7ގެ ޤައުމުތަކުގެ ޚާރިޖީ ވަޒީރުންގެ މެދުގައި އިނގިރޭސިވިލާތުގައި ތިން ދުވަހުގެ ބައްދަލުވުމެއްވަނީ ފަށައިފައެވެ. ޖީ7ގެ ޤައުމުތަކުގެ ތެރޭގައި އިންޑިޔާ ނުހިމެނު ނަމަވެސް އެ ބައްދަލުވުންތަކުގައި އިންޑިޔާއިން ބައިވެރިވަނީ މެހެމާނެއްގެ ގޮތުގައެވެ.
މެއި މަހުގެ 4ވަނަ ދުވަހާއި 5ވަނަ ދުވަހު ޚާރިޖީ ވަޒީރުންގެ ބައްދަލުވުމުގެ ހަވާސާގައި ބޭއްވި ގިނަ ބައްދަލުވުންތަކެއްގައި އިންޑިޔާއިން ބައިވެރިވުމަށް އޮތީ ހަމަޖެހިފައެވެ. ނަމަވެސް އެ ވަފުދުގައި ހިމެނޭ ބައެއް މުވައްޒަފުންނަށް ކޯވިޑް-19 ޖެހިފައިވާކަން އެނގުމުން އެ ބައްދަލުވުންތަކުގައި އިންޑިޔާގެ ޚަރިޖީ ވަޒީރު ސުބުރަމާންޔަމު ޖައިޝަންކަރު ބައިވެރިވެވަޑައިގެންނެވީ އިންޓަނެޓު މެދުވެރިކޮށެވެ. އަދި މެއި މަހުގެ 6ވަނަ ދުވަހު ބާއްވައި ބައްދަލުވުންތަކުގައިވެސް އޭނާ ބައިވެރިވެވަޑައިގަންނަވާނީ އިންޓަނެޓު މެދުވެރިކޮށެވެ. ބައްދަލުވުންތައް ބާއްވަމުންދިޔަ މައި މާލަމަށް އިންޑިޔާގެ ވަފުދުން ވަދެފައިނުވުމުން އެ މާލަމުގައި ބާއްވައި ބައްދަލުވުންތައް ކުރިން ރާވާފައިވާ ގޮތަށް ކުރިޔަށްދާނެއެވެ.
އިނގިރޭސިވިލާތަށް ޖައިޝަންކަރު ކުރައްވަމުންދާ ދަތުރުފުޅުގައި އެ ޤައުމުގެ ދާޚިލީ ވަޒީރު ޕުރިތީ ޕަޓޭލާވަނީ ބައްދަލުކުރައްވައިފައެވެ. ނަމަވެސް އެ ބައްދަލުވުން ބާއްވާފައިވަނީ ރައްކާތެރިކަމުގެ ޚާއްޞަ ފިޔަވަޅުތަކާއެކުއެވެ. އެހެންކަމުން ޕުރިތީ ޕަޓޭލް އެކަހެރިވެވަޑައިގެންފައެއް ނުވެއެވެ.
އިނގިރޭސިވިލާތުގެ ޚާރިޖީ ވަޒީރު ޑޮމިނިކު ރާބު ވިދާޅުވި ގޮތުގައި ބައްދަލުވުންތައް ބައްވަނީ ރައްކާތެރިކަމުގެ ހަރުކަށި ފިޔަވަޅުތަކާއެކުއެވެ. އެ ފިޔަވަޅުތަކުގެ ނަތީޖާ ރަނގަޅުކަން ފާހަގަކުރައްވަމުން ރާބު ވިދާޅުވީ ޖޫން މަހުގެ ތެރޭގައި ބާއްވައި ޖީ7ގެ އިސްވެރިންގެ ބައްދަލުވުން ތާވަލާ އެއްގޮތަށް ބޭއްވުން ވަރަށް މުހިންމުކަމަށެވެ. އެ ބައްދަލުވުމުގައި ބައިވެރިންގެ ރައްކާތެރިކަން ޔަޤީންކުރުމަށް މިހާރަށްވުރެވެސް ރަނގަޅަށް ޤަވާއިދުތައް ތަންފީޒުކޮށް އިތުރު ރޭވުންތައް ރާވާނެކަމަށް އޭނާ ވިދާޅުވިއެވެ.