އެންބީއޭ ބާސްކެޓްބޯޅަ މުބާރާތުގައި ޔޫޓާ ޖޭޒް އާއި ސެކްރެމެންޓޯ ކިންގްސް ބައްދަލުކުރިމެޗް ޖޭޒް ކާމިޔާބުކޮށްފިއެވެ. މިމެޗް ޖޭޒް ކާމިޔާބުކުރީ 154 ޕޮއިންޓް 105 ޕޮއިންޓުގެ ތަފާތު ބޮޑު ނަތީޖާއަކުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ޖޭޒްގެ ފަރާތުން އެންމެ ރަނގަޅު ކުޅުމެއް ދެއްކީ 24 ޕޮއިންޓް ހޯދާދިން ބޮޔާން ބޮގްޑަނޮވިޗްއެވެ. އަދި ކިންގްސްއަށް އެންމެ ރަނގަޅު ކުޅުމެއް ދެއްކީ 18 ޕޮއިންޓް ހޯދައިދީ 7 އެސިސްޓް ދިން ބަޑީ ހީލްޑްއެވެ.
މިމުބާރާތުގައި ފީނިކްސް ސަންސް އާއި ލޮސް އެންޖަލިސް ކްލިޕަރސް ބައްދަލު ކުރިމެޗް 109 ޕޮއިންޓް 101 ޕޮއިންޓުން ކާމިޔާބުކުރީ ސަންސްއެވެ. މިމެޗްގައި ސަންސްގެ ކްރިސް ޕޯލް ވަނީ 28 ޕޮއިންޓް ހޯދައިދީ 10 އެސިސްޓް ކޮށްފައެވެ. އަދި ކްލިޕަރސްގެ ޕޯލް ޖޯޖްވަނީ 25 ޕޮއިންޓް ހޯދައިދީ 10 ރީބައުންޑް ނަގާފައެވެ. މީގެއިތުރުން ފިލަޑެލްފިއާ ސެވަންޓީ ސިކްސަރސް އާއި އެޓްލާންޓާ ހޯކްސް ބައްދަލުކުރިމެޗް 127 ޕޮއިންޓް 83 ޕޮއިންޓުން ކާމިޔަބުކުރީ ސިކްސަރސްއެވެ. މިމެޗްގައި ސިކްސަރސްގެ ޓޯބިއަސް ހެރިސް ވަނީ 17 ޕޮއިންޓް ހޯދައިދީ 7 ރީބައުންޑް ނަގާ 6 އެސިސްޓް ކޮށްފައެވެ. އަދި ހޯކްސްގެ ޖޯން ކޮލިންސް ވަނީ އެޓީމަށް 21 ޕޮއިންޓް ހޯދައިދީފައެވެ.
މިމުބާރާތުގައި ކުޅުނު އެހެން މެޗްތަކަށް ބަލާލާއިރު ވޮޝިންގޓަން ވިޒަޑްސް އާއި ލޮސް އެންޖަލިސް ލޭކަރސް ބައްދަލުކުރިމެޗް 116 ޕޮއިންޓް 107 ޕޮއިންޓުން ވިޒަޑްސް ކާމިޔާބުކުރިއިރު ޑެންވަރ ނަގެޓްސް އާއި ނިއުއޯލިއަންސް ޕެލިކަންސް ބައްދަލުކުރިމެޗް 114 ޕޮއިންޓް 112 ޕޮއިންޓުން ކާމިޔާބުކުރީ ނަގެޓްސްއެވެ. ނިއުޔޯކް ނިކްސް އާއި ޝިކާގޯ ބުލްސް ބައްދަލުކުރިމެޗް 113 ޕޮއިންޓް 94 ޕޮއިންޓުން ނިކްސް ކާމިޔާބުކުރިއިރު ޕޯޓްލަންޑް ޓްރެއިލް ބްލޭޒަރސް އާއި މެމްފިސް ގްރިޒްލީސް ބައްދަލުކުރިމެޗް 130 ޕޮއިންޓް 109 ޕޮއިންޓުން ކާމިޔާބުކުރީ ބްލޭޒަރސްއެވެ.