ކަރަބާއޮ ކަޕްގެ ޗެމްޕިއަންކަން ޖެހިޖެހިގެން 4 ވަނަ ފަހަރަށް މެންޗެސްޓަރ ސިޓީއިން ކާމިޔާބުކޮށްފިއެވެ. މިމުބާރާތް ސިޓީއިން ކާމިޔާބުކުރީ ރޭ ކުޅުނު ފައިނަލްގައި ޓޮޓްނަމް ހޮޓްސްޕަރ އާއި ބައްދަލުކޮށް މެޗް ކާމިޔާބުކޮށްގެންނެވެ.
ސިޓީގެ ފަރާތުން މޮޅު ކުޅުމެއް ފެނިގެންދިޔަ މިމެޗް އެޓީމް ކާމިޔާބުކުރީ އެއް ލަނޑު ސުންލަނޑުންނެވެ. މިމެޗް ފެށުނީއްސުރެ ނިންމެންދެން މެޗް ކޮންޓްރޯލް ކުރަމުންދިޔައީ ސިޓީއިންނެވެ. މިގޮތުން މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސިޓީއިންނެވެ. މިމެޗްގެ ފުރަތަމަ ހާފްގައި ލަނޑެއް ފެނިގެން ނުދިޔަ ނަމަވެސް ސިޓީއަށްވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފައެވެ. ނަމަވެސް ސްޕަރސްއިން ޑިފެންޑް ކުރަމުންދިޔަލެއް ރަނގަޅުކަމުން މިއިން އެއްވެސް ހަމަލާއެއް ސިޓީއަށް ކާމިޔާބުކުރެވޭގޮތެއް ނުވިއެވެ. މިމެޗްގައި ސިޓީއިން ޖެހި ހަމައެކަނި ލަނޑު މެޗްގެ 82 ވަނަ މިނެޓްގައި ކާމިޔާބުކޮށްދިނީ އެމެރިކް ލަޕޯޓްއެވެ. މީގެއިތުރުންވެސް ލަނޑު ޖަހާނެ ރަނގަޅު ފުރުސަތު ސިޓީއަށް މިމެޗްގައި ލިބިގެން ގޮސްފައިވެއެވެ. މީގެ ހަފްތާއެއް ހާ ދުވަސް ކުރިން ސްޕަރސްއިން އެޓީމްގެ ތަޖްރިބާކާރު ކޯޗު ޖޯސޭ މޮރީނިއޯ ވަކިކުރި ނަމަވެސް މިމެޗްގައި އޭގެ ސަބަބުން ކުރި އިތުރު ފައިދާއެއް ފެނިގެނެއް ނުދިޔައެވެ. މިމެޗްގައި ސްޕަރސްގެ ކޯޗްކަން ކޮށްފައިވަނީ އެޓީމާއި ވަގުތީގޮތުން ހަވާލުވެހުރި ޒުވާން ކޯޗް ރަޔަން މޭސަންއެވެ.
މިކާމިޔާބީއާއެކު ސިޓީއިން މިވަނީ މިސީޒަންގެ ފުރަތަމަ ތަށި ކާމިޔާބުކޮށްފައެވެ. އަދި ސިޓީ ވެފައިވަނީ 1980ގެ އަހަރުތަކަށްފަހު ފުރަތަމަ ފަހަރަށް މި މުބާރާތުގެ ތަށި ޖެހިޖެހިގެން ހަތަރު ފަހަރު ކާމިޔާބުކުރި ފުރަތަމަ ޓީމަށް ވެގެން ގޮސްފައެވެ. މިމެޗް ބަލާލުމަށްޓަކައި މުބާރާތް އިންތިޒާމް ކުރި ފަރާތްތަކުންވަނީ 8000 ކުޅިބެލުންތެރިން ދަނޑަށް ވައްދާފައެވެ.