ޔޫއޭފާ ޗެމްޕިއަންސް ލީގަށް އަލައް ގެންނަން އެއްބަސްވި އިސްލާހުތަކާމެދު ހިތްހަމަ ނުޖެހޭކަމަށް ލިވަޕޫލްގެ ކޯޗު ޔަރގެން ކްލޮޕް ބުނެފިއެވެ. ކްލޮޕް މިހެން ބުނެފައި މިވަނީ ޗެމްޕިއަންސް ލީގުގައި ވާދަކުރާ ޓީމްގެ އަދަދު 36 އަށް ހެދުމަށް ޔުއޭފާއިން މިދިޔަ ހޯމަދުވަހު ނިންމުމާ ގުޅިގެންނެވެ.
ކްލޮޕް ބުނީ ޔޫރަޕިއަން ސުޕަރ ލީގު ނުބޭއްވޭގޮތް ވުމުން ހިތްހަމަ ޖެހޭ ކަމަށާއި ނަމަވެސް ޗެމްޕިއަންސް ލީގަށް މިގެނައި ބަދަލު ތަކުގެ ސަބަބުން މިހާރުވެސް ތޮށް ޖެހިފައިވާ ސީޒަންގެ މެޗް ޝެޑިއުލަށް އިތުރު ގޮންޖެހުންތަކެއް ކުރިމަތިވާނެކަމަށެވެ. ކްލޮޕް ވަނީ ހަމަ ބޭނުންވާހާ އިރަކަށް އާ މުބާރާތްތަކެއް ތައާރަފެއް ނުކުރެވޭނެ ކަމަށްވެސް ބުނެފައެވެ. ޔުއޭފާއިން އެއްބަސްވެފައިވާގޮތުގައި 2024 ވަނަ އަހަރުގެ ސީޒަނުން ފެށިގެން 2033 ވަނަ އަހަރުގެ ސީޒަނާއި ހަމައަށް ކުޅޭނީ އަލަށް އެއްބަސްވި އާފޯމެޓަށެވެ. މި ފޯމެޓްގައި ވާގޮތުން ކްލަބްތަކުން ޗެމްޕިއަންސް ލީގުގައި ކުޅޭ މެޗްތަކުގެ އަދަދު އިތުރު ވެގެންދާނެއެވެ.
ކްލޮޕް ބުނީ މުބާރާތްތަކުގެ ކަންތައްތައް ނިންމާއިރު އެއްވެސް ފަރާތަކުން ކްލަބްތަކުގެ ކޯޗުންނާއި ކުޅުންތެރިންނާއި ސަޕޯޓަރުންގެ ކައިރިން އެއްވެސް އެއްޗެއް އަހާކަށް ބޭނުމެއް ނުވާކަމަށެވެ. މިގޮތުން ސުޕަރ ލިގު ހެދިއިރު އެމީހުންގެ ކައިރިން އަހާފައި ނުވާއިރު ޗެމްޕިއަންސް ލީގަށް ބަދަލު ގެނައިއިރު ޔުއޭފާއިންވެސް އެމީހުންގެ ކައިރިން އަހާފައި ނުވާކަމަށެވެ. އަދި ޗެމްޕިއަންސް ލީގަށް ބަދަލު ގެންނަން ޖެހުނީ ކީއްވެތޯވެސް ކްލޮޕް ސުވާލު އުފެއްދިއެވެ. އަދި އެއީވެސް ސުޕަރ ލީގެކޭ އެއްގޮތަށް ފައިސާގެ ބޭނުމުގައި ކުރި ކަމެއްތޯވެސް ކްލޮޕް ވަނީ ސުވާލު އުފައްދާފައެވެ.