އިޓާލިއަން ސެރީއާގެ އޭސީ މިލާނަށް ކުޅެމުންދާ ތަޖްރިބާކާރު ފޯވަޑް ޒްލަޓާން އިބްރަހިމޮވިޗް އެކްލަބްގައި އިތުރު އެއް އަހަރު މަޑުކުރަން ނިންމާ ކޮންޓްރެކްޓް އާކޮށްފިއެވެ. މި އާއެއްބަސްވުމުގެ ދަށުން ޒްލަޓާންއަށް އުމުރުން 40 އަހަރު ފުރޭއިރުވެސް މިލާނަށް ކުޅޭނެއެވެ.
ކުރިންވެސް މިލާނަށް ކުޅެފައިވާ ޒްލަޓާން މިފަހަރު މިލާނާއި ގުޅިފައިވަނީ 2019 ވަނަ އަހަރު 6 މަސް ދުވަހުގެ އެއްބަސްވުމެއްގެ ދަށުންނެވެ. އަދި މިދިޔަ އަހަރު އެ އެއްބަސްވުންވަނީ އިތުރު އެއް އަހަރަށް އިތުރު ކޮށްފައެވެ. އަދި މިހާރު އަނެއްކާމިވަނީ އިތުރު އެއް އަހަރު މިލާންނަށް ކުޅެން ޒްލަޓާން ނިންމާފައެވެ. ޒްލަޓާން މިސީޒަންގައި މިހާތަނަށް 25 މެޗް ކުޅެފައިވާއިރު 17 ލަނޑު ވަނީ ކާމިޔާބުކޮށްދީފައެވެ. އަދި އޭނާގެ ކެރިއަރުގައި ޖެހި 500 ވަނަ ލަނޑުވަނީ ފެބްރުއަރީ މަހުގެ ތެރޭގައި ހަމަކޮށްފައެވެ.
މިފަހަރުގެ އެއްބަސްވުމުގައި ސޮއި ކުރުމަށްފަހު ވާހަކަ ދައްކަމުން ޒްލަޓާން ބުނީ އޭސީ މިލާނަށް ކުޅުމަކީ އޭނާ ގޭގައި ހުރުން ފަދަ ކަމެއް ކަމަށެވެ. އަދި މިލާނުށް އޭނާއާދޭތެރޭ ކަންތައްތައް ކުރަނީ ވަރަށް ރަނގަޅަށް ކަމަށާއި އޭނާއަށް ބޭނުންވަނީ މުޅިއުމުރުންވެސް މިލާންގައި ހޭދަކުރަން ކަމަށެވެ. އިބްރަހިމޮވިޗް ކުޅެން ފަށާފައިވަނީ 1999 ވަނަ އަހަރު މަލްމޯއިންނެވެ. އަދި އޭގެފަހުން މިވީތަނަށް އޭނާވަނީ އަޔެކްސް އެމްސްޓަރޑަމް، ޔުވެންޓަސް، އިންޓަރ މިލާން، ބާސެލޯނާ، ޕީއެސްޖީ، މެންޗެސްޓަރ ޔުނައިޓެޑް އަދި ލޮސް އެންޖަލިސް ގެލެކްސީއަށްވެސް ކުޅެފައެވެ. އުމުރުން މިހާރު 39 އަހަރުގެ އިބްރަހިމޮވިޗް އުމުރުން މިހާ ދުވަސް ވެފައިވާއިރުވެސް މޮޅު ކުޅުމެއް ދައްކަމުންދިއުމުގެ ނަތީޖާއެއްގެ ގޮތުން އޭނާވަނީ ބައެއް ހާއްސަ ކަންތައްތަކެއްވެސް ހާސިލް ކޮށްފައެވެ. މިގޮތުން އިބްރަހަމޮވިޗަކީ އިންގްލިޝް ޕްރިމިއަރ ލީގާއި، ސެރީއާ، ލަލީގާ، ލީގް އާން އަދި ޗެމްޕިއަންސް ލީގުގައި ކުޅުނު ފުރަތަމަ މެޗްގައި ލަނޑު ޖެހި ހަމައެކަނި ކުޅުންތެރިޔާއެވެ. އަދި އިންޓަރ އާއި އޭސީ މިލާނަށް 50 ލަނޑު ޖަހައިދީފައިވާ ހަމައެކަނި ކުޅުންތެރިޔަކީ ވެސް އިބްރަހަމޮވިޗެވެ.