އިންގްލިޝް ޕްރިމިއަރ ލީގުގައި ޓޮޓްނަމް ހޮޓްސްޕަރ އާއި ސައުތެމްޓަން ބައްދަލުކުރިމެޗް ސްޕަރސް ކާމިޔާބުކޮށްފިއެވެ. ސްޕަރސްގެ ދަނޑުގައި ކުޅުނު މިމެޗް އެޓީމް ކާމިޔާބުކުރީ ފަހަތުން އަރާ 2 ލަނޑު އެއްލަނޑުންނެވެ.
މިއީ ސްޕަރސްގެ ކޯޗް ކަމުން ޖޯސޭ މޮރީނިއޯ ވަކިކުރިފަހުން އެޓީމް ކުޅުނު ފުރަތަމަ މެޗެވެ. ރޭގެ މެޗްގައި ސްޕަރސްގެ ބެންޗްގައި އިނީ މިވަގުތު ވަގުތީ ގޮތުން ޓީމުގެ ކޯޗް ކަމާއި ހަވާލުވެހުރި އެޓީމްގެ ކުރީގެ ކުޅުންތެރިޔާ ރަޔަން މޭސަންއެވެ. ރޭގެ މެޗާއި އެކު މޭސަން ވެގެން ގޮސްފައިވަނީ ޕްރިމިއަރ ލީގުގެ އެންމެ ޒުވާން ކޯޗަށެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސްޕަރސްއިންނެވެ. ނަމަވެސް މިމެޗްެގެ ފުރަތަމަ ހާފްގައި ސްޕަރސްގެ ފަރާތުން މާ ރަނގަޅު ކުޅުމެއް ފެނިގެން ގޮސްފައެއް ނުވެއެވެ. އޭގެ ބަދަލުގައި ސައުތެމްޓަން ފެނުނީ ސްޕަރސްއަށް ވުރެ ރަނގަޅަށް ކުޅެމުންދިޔަ ތަނެވެ. މިމެޗްގެ ފުރަތަމަ ލަނޑު މެޗްގެ 30 ވަނަ މިނެޓްގައި ޖަހާދިނީ ސައުތެމްޓަންގެ ފޯވަޑް ޑެނީ އިންގްސްއެވެ. މިމެޗްގައި ސްޕަރސްއިން މެޗްގެ ނަތީޖާ ހަމަހަމަ ކުރި ލަނޑު މެޗްގެ 60 ވަނަ މިނެޓްގައި ޖަހާދިނީ ގެރެތު ބޭލް އެވެ. އަދި މިމެޗުން ސްޕަރސް މޮޅުވި ލަނޑު މެޗްގެ ފަހު މިނެޓްގައި ލިބުނު ޕެނަލްޓީ އަކުން ޖަހާދިނީ ސޮން ހެއުންގ މިންއެވެ. މިމެޗްގައި ސްޕަރސްގެ ތަޖްރިބާކާރު ފޯވަޑް ހެރީ ކޭންއަށް އަނިޔާ ވުމުގެ ސަބަބުން ނުކުޅެވޭއިރު އޭނާ ނެތް ތަން ވަރަށް ބޮޑަށް ދެއްކިއެވެ.
މިކާމިޔާބީއާއެކު ސްޕަރސް މިހާރުވަނީ ކުޅުނު 33 މެޗުން ލިބިފައިވާ 53 ޕޮއިންޓާއެކު ތާވަލްގެ ހަވަނައަށް ކުރިއަށް ޖެހިލާފައެވެ. އަދި ހަތަރު ވަނައިގާ އުޅޭ ޗެލްސީ އާއި 2 ޕޮއިންޓަށް ގާތް ވެފައެވެ. އަދި ސައުތެމްޓަން އުޅެނީ ކުޅުނު 32 މެޗުން ލިބިފައިވާ 36 ޕޮއިންޓާއެކު ތާވަލްގެ 14 ވަނައިގައެވެ.