ދިވެހިރާއްޖެއާއި ކުވައިތާ ދެމެދު ދެ އެމް.އޯ.ޔޫ އެއްގައި ސޮއިކޮށްފިއެވެ.
މިއެމް.އޯ.ޔޫތަކުގައި ސޮއިކޮށްފައިވަނީ ރޭ ކުވައިތު ސިޓީގައި ހުންނަ ކުވެއިތުގެ މިނިސްޓްރީ އޮފް ފޮރިން އެފެއަރޒުގައި ބޭއްވި ރަސްމިއްޔާތެއްގައެވެ. ދިވެހިރާއްޖޭގެ ފަރާތުން މި އެމް.އޯ.ޔޫތަކުގައި ސޮއިކުރެއްވީ މިނިސްޓަރ އޮފް ފޮރިން އެފެއަރޒު ޢަބްދުﷲ ޝާހިދެވެ. ކުވެއިތުގެ ފަރާތުން ސޮއިކުރެއްވީ އެޤައުމުގެ މިނިސްޓަރ އޮފް ފޮރިން އެފެއާޒް އަދި މިނިސްޓަރ އޮފް ސްޓޭޓް ފޮރ ކެބިނެޓް އެފެއަރޒް ޑރ. އަޙްމަދު ނާސިރު އަލް މުޙައްމަދު އަލް އަޙްމަދު އަލް ޖާބިރް އަލް ސަބާޙެވެ.
ދިވެހިރާއްޖެއާއި ކުވެއިތާއި ދެމެދު ވެވުނު މި ދެ އެއްބަސްވުމަކީ "މެމޮރެންޑަމް އޮފް އަންޑަރސްޓޭންޑިންގ އޮން ކޯޕަރޭޝަން ބިޓްވީން މިނިސްޓްރީ އޮފް ފޮރިން އެފެއަރޒް އޮފް ދަ ރިޕަބްލިކް އޮފް މޯލްޑިވްސް އެންޑް ދަ މިނިސްޓްރީ އޮފް ފޮރިން އެފެއަރޒް އޮފް ދަ ސްޓޭޓް އޮފް ކުވައިތު" އާއި "މެމޮރެންޑަމް އޮފް އަންޑަސްޓޭންޑިންގ ބިޓްވީން ދަ ގަވަރމަންޓް އޮފް މޯލްޑިވްސް އެންޑް ދަ ގަވަރމަންޓް އޮފް ދަ ސްޓޭޓް އޮފް ކުވައިތު އިން ދަ ފީލްޑް އޮފް ޓޫރިޒަމް" އެވެ.
ދެ ޤައުމުގެ ދެމެދުގައި ވެވުނު މި އެއްބަސްވުންތަކުގެ ސަބަބުން، ދިވެހިރާއްޖެއާއި ކުވެއިތާއި ދެމެދު އޮތް ޚާރިޖީ ގުޅުންތައް އިތުރަށް ބަދަހިވެ، ފަތުރުވެރިކަމުގެ ދާއިރާގައި ދެ ޤައުމު އެކުގައި މަސައްކަތްކުރުމުގެ ފުރުޞަތު ހުޅުވި، ކުރިމަގުގައި ދެޤައުމުގެ ސަރުކާރުންތަކުގެ މެދުގައި ވެވޭ އެއްބަސްވުންތައް ތަންފީޒު ކުރުމަށް ލިބޭ އިތުރުފަސޭހަވެގެންދާނެއެވެ.
ކުވައިތަށް ކުރައްވަމުން ގެންދަވާ ރަސްމީ ދަތުރުފުޅުގައި މިނިސްޓަރ ޢަބްދުﷲ ޝާހިދު ވަނީ ކުވައިތުގެ ބޮޑުވަޒީރު ޝައިޚް ސަބާޙް ޚާލިދު އަލް ޙަމަދު އަލް ސަބާޙްއާ ވެސް ބައްދަލުކުރައްވާފައެވެ. މި ބައްދަލުވުމުގައި އެ ދެބޭފުޅުން ވަނީ ދެޤައުމުގެ ދެމެދުގައިވާ އަޚުވަންތަ ގުޅުމާއި ވިޔަފާރީގެ ގުޅުންތަކާ ބެހޭ ގޮތުން މަޝްވަރާކުރައްވާފައެވެ. އަދި ކުވައިތު ފަންޑް ފޮރ އަރަބް އިކޮނޮމިކް ޑިވެލޮޕްމަންޓުން ރާއްޖެއަށްވެދެއްވަމުން ގެންދަވާ އެހީތެރިކަން ފާހަގަކުރައްވައި، ރާއްޖޭގެ އިޖްތިމާޢީ އަދި އިޤްތިޞާދީ ތަރައްޤީއަށް ކުވައިތުގެ ސަރުކާރުން ވެދެއްވާ އެހީތެރިކަމަށް މިނިސްޓަރ ޝާހިދު ވަނީ ކުވައިތުގެ ބޮޑުވަޒީރު ޝައިޚް ސަބާޙް ޚާލިދަށް ޝުކުރު އަދާކުރައްވާފައެވެ.
މީގެ އިތުރުން، ކޯވިޑް-19ގެ ސަބަބުން ލިބިފައިވާ ގެއްލުންތަކާއި، އެގެއްލުންތަކުން އަރައިގަތުމަށް ކުރެވިދާނެ މަސައްކަތްތަކާ ބެހޭ ގޮތުން ވެސް ދެ ވަޒީރުން މަޝްވަރާކުރެއްވިއެވެ. އަދި މި މަޝްވަރާތަކުގައި، ރާއްޖޭގެ އިޤްތިޞާދު ޑައިވަރސިފައިކޮށް، އިޖްތިމާޢީ އަދި ހިންގުމުގެ ދާއިރާ ހަރުދަނާކުރުމަށް އެކަށައަޅާފައިވާ ނޭޝަނަލް ރިޒިލިއަންސް އެންޑް ރިކަވަރީ ޕްލޭންއާއި ބެހޭ މައުލޫމާތު މިނިސްޓަރ ޝާހިދު ވަނީ ކުވައިތުގެ ޚާރިޖީ ވަޒީރަށް އަރުވާފައެވެ.
މި ބައްދަލުވުމުގައި މިނިސްޓަރ ޝާހިދުގެ އަރިހުގައި މިނިސްޓްރީގެ ސެކްރެޓަރީ މަލްޓިލޭޓަރަލް ޑރ. ހާލާ ހަމީދު އާއި ޑިރެކްޓަރ މޫމިނާ އިބްރާހިމް އާއި އެސިސްޓަންޓް ޑިރެކްޓަރ އަހްމަދު ސަލްމާން ޒަކީ ބައިވެރިވެ ވަޑައިގެންނެވިއެވެ.