ފާއިތުވި އަހަރަކީ ސިފަައިންގެ ވާޖިބާއި މަސްއޫލިއްޔަތު އަދާކުރުމުގައި އަގުހުރި ޚިދުމަތްތަކެއް ކޮށްދެވިފައިވާ ކާމިޔާބު އަހަރެއްކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލް ވިދާޅުވެއްޖެއެވެ. ޝަމާލް މިހެން ވިދާޅުވީ، މިއަދު ފާހަގަކުރާ ސިފައިންގެ 129 ވަނަ އަހަރީ ދުވަހުގެ މުނާޞަބަތުގައި ދެއްވި ވީޑިއޯ މެސެޖެއްގައެވެ.
ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލް ވިދާޅުވީ، ކޯވިޑް-19ގެ ޕެންޑެމިކާއި ސިފައިން ކުރިމަތިލާ އަދި ކޯވިޑް-19އާއި ގުޅިގެން ކުރަންޖެހޭ އެންމެހާ މަސައްކަތްތައް ސިފައިން ކުރަމުން ގެންދިޔައީ އެއްވެސް ވަރުބަލި ކަމެއް ނެތި ސާބިތުކަމާއެކީގައިކަމަށެވެ. ވޭތުވެދިޔަ އަހަރުވެސް ދިވެހިރާއްޖޭގެ މިނިވަންކަމާއި އިސްތިޤްލާލާއި ސިޔާދަތު ދިފާޢު ކުރުމަށާއި، ކަނޑުމަތީގައި ހާލުގަޖެހޭ މީހުންނާ އެމީހުންގެ މުދާ ސަލާމަތް ކުރުމުގައާއި، ޚާއްސަކޮށް އަލިފާނުގެ ޙާދިސާތަކުން ރައްޔިތުންނާ މުދާ ސަލާމަތް ކުރުމަށްޓަކާ ގިނަގުނަ މަސައްކަތްތަކެއް ސިފައިން ކޮށްދީފައިވާކަންވެސް ޝަމާލް ފާހަގަކުރެއްވިއެވެ.
ކޯވިޑް-19ގެ ވަބާގެ ތެރޭގައި މަސައްކަތް ކުރަމުން ދިޔަކަމުގައިވީ ނަމަވެސް އިންސާނީ ވަސީލަތް ތަރައްޤީ ކުރުމަށްޓަކާވެސް ގިނަ މަސައްކަތްތަކެއް ސިފައިން ކޮށްފައިވާކަމަށާއި، މުޅި ސިފައިންގެ ފޯސްގެ ގާތްގަނޑަކަށް %25 ގެންދިޔައީ އަބަދުވެސް ޓްރެއިނިންގް ސައިކަލް އެއްގެ ތެރޭގައި މަސައްކަތްކުރަމުން ކަމަށް ޝަމާލް ވިދާޅުވިއެވެ. އެގޮތުން ބޭރު ޤައުމުތަކާ ގުޅިގެން އިތުރު ތަމްރީން ޕްރޮގްރާމްތަކެއް ހިންގާ، ގިނަ އަދަދެއްގެ ސިފައިން ތަމްރީން ކުރެވިފައިވާކަންވެސް ޝަމާލް ފާހަގަކުރެއްވިއެވެ.
"ހަމަ އެހެންމެ ޤައުމީ ދިފާއީ ބާރުގެ އޮޕަރޭޝަނަލް ކެޕޭސިޓީ ނުވަތަ ފަންނީ ޤާބިލްކަން އޮޕަރޭޝަނަލް ޤާބިލްކަން އިތުރުކުރުމަށްޓަކާ ހޯދަންޖެހޭ އެންމެހާ އާދަތަކާ ވަސީލަތްތައް ހޯދުމަށްޓަކާވެސް ގިނަގުނަ މަސައްކަތްތަކެއް މިދިޔައަހަރުކުރެވިފައިވޭ" ޝަމާލް ވިދާޅުވިއެވެ.
ޤައުމީ ދިފާއީ ބާރުގެ އުމްރާނީ ތަރައްގީއަށް ބޭނުންވާ ވަސީލަތްތައް ހޯދުމަށާއި، އިންފްރާސްޓްރަކްޗަރ ތަރައްޤީކުރުމަށްޓަކާއި މުހިންމު މަސައްކަތްތަކެއް ކުރެވި އަދިި މިހާރުވެސް ގިނަ މަސައްކަތްތަކެއް ކުރަމުން އަންނަ ކަމަށްވެސް ޝަމީލް ވިދާޅުވިއެވެ.
ސިފައިންގެ އަހަރީ ދުވަހުގެ މުނާސަބަތުގައި އިފްތިތާހްކުރެއްވި، މިލިޓަރީ ޖަސްޓިސް ސިސްޓަމް ނުވަތަ އަސްކަރީ ޢަދުލުގެ ނިޒާމުގެ ސަބަބުންވެސް ސިފައިންނަށް ވަރަށް ރަނގަޅު ފައިދާތަކެއް ކުރާނެކަމަށާއި، އެއީ ދިވެހި ސިފައިންގެ ޑިސިޕްލިން ދެމެހެއްޓުމަށް އެޅިގެންދާ ވަރަށް ބޮޑު ބިންގަލެއްގެ ގޮތުގައި ޝަމާލް ސިފަކުރެއްވިއެވެ.