ޔޫރަޕްގެ ފުޓްބޯޅައިގާ ފާހަގަކޮށްލެވޭ ބޮޑު 12 ކްލަބަކުން ވުޖޫދަށް ގެނައުމަށް މަސައްކަތް ކުރަމުންދާ ޔޫރަޕިއަން ސުޕަރ ލިގުން އިންގްލިޝް ޕްރިމިއަރ ލީގަށް ނިސްބަތްވާ 6 ކްލަބުން ވަކިވެއްޖެއެވެ. ޕްރިމިއަރ ލީގަށް ނިސްބަތްވާ 6 ކްލަބުންވެސް މިކަންވަނީ ހާމަކޮށްފައެވެ.
މަޢުލޫމާތު ލިބިފައިވާގޮތުގައި ޔޫރަޕިއަން ސުޕަރ ލީގުން އެންމެ ފުރަތަމަ ވަކިވެފައިވަނީ މެންޗެސްޓަރ ސިޓީއެވެ. އަދި އޭރު ޗެލްސީއިންވެސް އޮތީ ވަކިވާން ކުރަންޖެހޭ ލިޔެކިޔުުގެ ކަންތައްތައް ކުރަން އުޅޭވާހަކަ ހާމަކޮށްފައެވެ. އަދި މިދެ ކްލަބާއެކު ޕްރިމިއަރ ލީގަށް ނިސްބަތްވާ އަނެއް ހަތަރު ކްލަބް ކަމަށްވާ އާސެނަލް، ލިވަޕޫލް، މެންޗެސްޓަރ ޔުނައިޓެޑް އަދި ޓޮޓްނަމް ހޮޓްސްޕަރއިންވަނީ ޔޫރަޕިއަން ސުޕަރ ލީގުން ވަކިވިކަން ހާމަކޮށްފައެވެ. ޔޫރަޕިއަން ސުޕަރ ލީގު ފެށުމުގެ މަސައްކަތް 12 ކްލަބެއް ބައިވެރިވެގެން ފެށުމަށް މަސައްކަތް ކުރާ ވާހަކަ މިދިޔަ އާދިއްތަ ދުވަހު އާންމު ވުމާއެކު ގިނަބައެއްގެ ފާޑުކިޔުން އެ ލީގަށާއި އެކަމުގައި ބައިވެރިވި 12 ކްލަބަށް އަމާޒުވެގެންދިޔައެވެ.
ސިޓީއިން ހާމަކުރިގޮތުގައި ސުޕަރ ލީގުން ވަކިވުމަށްޓަކައި ކުރަންޖެހޭ ހުރިހާ ކަމެއް މިހާރު ކުރެވިފައިވާކަމަށެވެ. އަދި ލިވަޕޫލުން ހާމަކުރިގޮތުގައި ސުޕަރ ލީގުގައި ބައިވެރިވުމަށް ނިންމި ނިންމުން އަނބުރާ ގެނެސްފައިވާކަމަށެވެ. އަދި ޔުނައިޓެޑުން ހާމަކުރިގޮތުގައި ކްލަބްގެ ސަޕޯޓަރުންނާއި އިނގިރޭސި ސަރުކާރާއި އަދި ކްލަބާއި ގުޅުންހުރި އެހެން ފަރާތްތަކުގެ ޝުއޫރުތައް ހުރިގޮތަށް ބަލާ ސުޕަރ ލީގުގައި ދެން ބައިވެރި ނުވާނެކަމަށެވެ. އާސެނަލްއިންވަނީ އެކްލަބްގެ ސަޕޯޓަރުންގެ ކިބައިން މައާފަށް އެދި ސިޓީއެއް އާންމުކޮށްފައެވެ. އަދި ސުޕަރ ލީގުގައި ބައިވެރިވުމަށް ނިންމި ނިންމުމަކީ އެކްލަބަށް ހެދުނު ވަރަށް ބޮޑު ގޯހެއް ކަމަށެވެ.
އިނގިރޭސި 6 ކްލަބްގެ އިތުރުން ޔޫރަޕިއަން ސުޕަރ ލީގުގައި ބައިވެރިވާން ނިންމާފައިވާ އަނެއް ހަ ކްލަބަކީ އިޓާލިއަން ސެރީއާއަށް ނިސްބަތްވާ އިންޓަރ މިލާން، އޭސީ މިލާން އަދި ޔުވެންޓަސް އާއި ސްޕެނިޝް ލަލީގާއަށް ނިސްބަތްވާ ތިން ކްލަބް ކަމަށްވާ ރެއާލް މެޑްރިޑާއި އެޓްލެޓިކޯ މެޑްރިޑާއި އަދި އެފްސީ ބާސެލޯނާއެވެ. ޔޫރަޕިއަން ސުޕަރ ލީގުން އާދިއްތަ ދުވަހު ހާމަކުރިގޮތުގައި ފުރަތަމަ ފެށިއިރު ތިބި 12 ކްލަބްގެ އިތުރުން އިތުރު 3 ކްލަބެއް ސުޕަރ ލީގުގައި ދާއިމީ ކްލަބްތަކުގެ ގޮތުގައި ބައިވެރިވާނެކަން ހާމަކޮށްފައެވެ. ނަމަވެސް ކްލަބްތަކެއް އިތުރު ވުމުގެ ބަދަލުގައި މިފެނިގެންދިޔައީ އެ 12 ކްލަބްގެ ތެރެއިން 6 ކްލަބެއް ވަކިވެގެންދިޔަ ތަނެވެ.