ކުރު މުއްދަތެއްގެ ތެރޭގައި ސިފައިންނަށް ކުރިއެރުން ލިބުނީ ރައީސްގެ ހަރުދަނާ ތަސައްވުރުން: މާރިޔާ

ކުރު މުއްދަތެއްގެ ތެރޭގައި ދިވެހި އަސްކަރިއްޔާއަށް ގެނެވުނު ކުރިއެރުންތަކަކީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ އިބްރާހީމް މުޙައްމަދު ޞާލިޙް ގެންގުޅުއްވާ ހަރުދަނާ ސިޔާސަތުގެ ސަބަބުން ކަމަށް ޑިފެންސް މިނިސްޓަރ މާރިޔާ އަޙްމަދު ދީދީ ވިދާޅުވެއްޖެެވެ. ޑިފެންސް މިނިސްޓަރ މިހެން ވިދާޅުވީ ދިވެހި ސިފައިންގެ އަހަރީ ދުވަހުގެ މުނާސަބަތުގައި ދެއްވި ޚިޠާބުގައެވެ.

ޑިފެންސް މިނިސްޓަރުގެ ޚިޠާބުގައި، 129 ވަނަ ސިފައިންގެ ދުވަހުގެ ތަހުނިޔާ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ އިބްރާހީމް މުޙައްމަދު ޞާލިޙަށާއި، ޗީފް އޮފް ޑިފެންސް ފޯރސް މޭޖަރ ޖެނެރަލް ޢަބްދުﷲ ޝަމާލަށާއި، ޖެނެރަލް އޮފިސަރުންނަށާއި، އެކި އެކި ރޭންކުތަކުގައި ޙަރަކާތްތެރިވާ އެންމެހާ ސިފައިންނަށާއި، ސިފައިންގެ އާއިލާތަކަށް، ވަނީ ފޮނުއްވާފައެވެ.

ޑިފެންސް މިނިސްޓަރގެ ޚިޠާބުގައި ދިވެހި އަސްކަރިއްޔާގެ ޤާބިލްކަމާއި ހުނަރުވެރިކަމާއި ޚިދުމަތުގެ ފެންވަރު ރަނގަޅުކޮށް، ރާއްޖެއާއި ރާއްޖޭން ބޭރުން ތަމްރީނާއި ތަޢުލީމުގެ ފުރުޞަތުތައް ފަހިކޮށްދީ، ދިވެހި އަސްކަރިއްޔާގެ ތެރޭގައި މިންތީގެ ހަމަހަމަކަން ޤާއިމްކުރުމަށް، ކާމިޔާބު ގިނަ މަސައްކަތްތަކެއް ކުރެވެމުންދާކަމަށް ވިދާޅުވިއެވެ. ރާއްޖެއާއި ރާއްޖެއިން ބޭރުން، އެކި ރޮނގުތަކުން ހޯދި ފުރުސަތުތަކުގެ ފުރިހަމަ ބޭނުންކޮށް، ޤައުމު ފަޚުރުވެރިވާ ފަދަ ރަން ވަނަތަކާއި މެޑަލްތައް، ސިފައިން ޙާސިލްކޮށްފައިވާކަން، މިނިސްޓަރ ވަނީ ފާހަގަކުރައްވާފައެވެ. އަދި ސިޔާސީ ނުފޫޒުން ދިވެހި އަސްކަރިއްޔާ އެއްކިބާކޮށް، "ޕްރޮފެޝަނަލް ފައިޓިންގ ފިޓް ފޯރސް” އެއްގެ ގޮތުގައި، ރާއްޖޭގެ އެކި ކަންކޮޅުތަކުގައި ދިރިއުޅެމުންދާ ދިވެހި އެންމެހާ ރައްޔިތުންނަށް، ހަމަހަމަކަމާއި އޯގާތެރިކަމާއެކީ ސިފައިންގެ ޚިދުމަތް ފޯރުކޮށްދޭނެ މަގު ފަހިކޮށްދީފައިވާކަން ގިނަ ރައްޔިތުން ޤަބޫލުކުރާކަަމށްވެސް މިނިސްޓަރ ވިދާޅުވިއެވެ.

މިނިސްޓަރގެ ޚިޠާބުގައި ދިވެހިރާއްޖޭގައި މިންތީގެ ހަމަހަމަކަން ޤާއިމްކުރަން ސަރުކާރުން ގެންގުޅުއްވާ ސިޔާސަތުގެ ދަށުން، ދިވެހި އަސްކަރިއްޔާގައި ޙަރަކާތްތެރިވާ އަންހެން ސިފައިން ބާރުވެރިކުރުވުމުގައި އިތުރު ހަރުފަތްތަކެއް ގިރާކޮށްފައިވާކަން ފާހަގަކުރައްވާ ވިދާޅުވީ، އެމްއެންޑީއެފްގެ ތާރީޚުގައި ފުރަތަމަ ފަހަރަށް ލެފްޓިނެންޓް ކާނަލްގެ މަޤާމަށް އަންހެން ބޭފުޅުން ޢައްޔަންކުރުމާ ގުޅިގެން، ދިވެހި ޤައުމީ ދިފާޢީ ބާރުގެ އެންމެ މަތީ ފަޑީގައި، ފުރަތަމަ ފަހަރަށް، ލެފްޓިނެންޓް ކާނަލް ރޭންކުގެ އޮފިސަރުންނަށް ތިއްބެވޭނެ މަގުފަހިކޮށް، ސިފައިންގެ ލީޑަރޝިޕުން ނިންމާ ނިންމުންތަކުގައި، ކަނބަލުންގެ އަޑު ހިމެނޭނެހެން ލަފާދޭ މަޖިލީހަށް ބަދަލުވަނީ ގެނެވިފައިވާކަމަށެވެ. މިއަދު، އެމްއެންޑީއެފްގެ ހުރިހާ ބޯޑެއްގައިވެސް އަންހެން ބޭފުޅުން ތިއްބަވާނެކަމަށާއި، ދާދިފަހުން، އިނގިރޭސިވިލާތުގެ ރޯޔަލް މިލިޓަރީ އެކެޑަމީ ސޭންޑްހަރސްޓްގައި ކޯހެއް ފުރިހަމަކުރުމަށް، ފުރަތަމަ ފަހަރަށް ފޮނުވި ދިވެހި އަންހެން އޮފިސަރ ކެޑޭޓު އެނބުރި ޤައުމަށް އައީ "ބެސްޓް އިންޓަރނޭޝަނަލް ސްޓޫޑަންޓް އެވޯޑްގެ މަތިވެރި ޝަރަފާއެކުގައިކަންވެސް މިނިސްޓަރ ފާހަގަކުރެއްވިއެވެ.

"މިހާ ކުރު މުއްދަތެއްގެ ތެރޭގައި، ދިވެހި އަސްކަރިއްޔާއަށް މިގެނައި ކުރިއެރުންތަކުގެ ފަހަތުގައިވަނީ، ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ އިބްރާހީމް މުޙައްމަދު ޞާލިޙް ސިފައިންނާ ގުޅޭ ކަންކަމަށް ދެއްވާ ޚާއްޞަ އަހައްމިއްޔަތުކަމާއި އެމަނިކުފާނުގެ ހަރުދަނާ ވިސްނުންފުޅާއި ތަޞައްވުރުކަން ފާހަގަކޮށް، ކޮމާންޑަރ.އިން.ޗީފް ރައީސް ޞާލިޙަލް، ދިވެހި ޤައުމީ ދިފާޢީ ބާރުގެ ލީޑަރޝިޕާއި އެންމެހާ ސިފައިންނާއި، ދިވެހި އެންމެހާ ރައްޔިތުންގެ ނަމުގަޔާއި އަޅުގަނޑުގެ އަމިއްލަ ނަމުގައި، ޚާއްޞަ ޝުކުރެއްދަންނަވަމެވެ. ސިފައިންގެ ލީޑަރޝިޕާއި ސިފައިންގެ އެއްބާރުލުމާ ނުލައި، މިއިން އެއްވެސް ކުރިއެރުމެއް ޙާސިލްކުރުމަކީ މުސްތަޙީލު ކަމެކެވެ. އެހެންކަމުން، މިފުރުޞަތުގައި، ކަށިން ހިތްވަރު ނަންގަވައިގެން، ވަރުބަލިކަމެއްނެތި، ރެއާއި ދުވާލު ސިފައިންގެ މަސައްކަތުގައި އުޅުއްވާ، ޗީފް އޮފް ޑިފެންސް ފޯރސް މޭޖަރ ޖެނެރަލް ޢަބްދުﷲ ޝަމާލާއި ސިފައިންގެ ލީޑަރޝިޕްގެ ބޭފުޅުން ދެއްވާ އިރުޝާދާއި ހުރިހާ ސިފައިންގެ ފަރާތުން ލިބޭ އެއްބާރުލުން ފާހަގަކޮށް، އެބޭކަލުންނާއި ބޭކަނބަލުންނަށް އިޚްލާޞްތެރި ޝުކުރެއް ދަންނަވަމެވެ." މާރިޔާ ވިދާޅުވިއެވެ.

މިނިސްޓަރ މާރިޔާ ވަނީ، މިއަހަރުގެ ސިފައިންގެ ޝިޢާރުކަމަށްވާ "ސިފައިންގެ ޤާބިލްކަން - ޤައުމުގެ އަމާންކަން" އޭގެ އެންމެ ފުރިހަމަ، ޙަޤީޤީ މާނައިގައި ތަމްސީލުކޮށް، މިއަހަރަކީވެސް، ދިވެހި އަސްކަރިއްޔާގެ ޤާބިލްކަމަށް އިތުރު ބާރެއް ލިބި، ސިފައިން ރައްޔިތުންނަށް ދޭ އެފަދަ ދެވަނައެއް ނެތް އޯގާތެރި ޚިދުމަތުން، ޤައުމުގެ އަމާންކަމަށް އިތުރު ދިރުމެއް ލިބިގެންދާނެ އަހަރަކަށް ހަދަން ސިފައިން ޢަޒުމް ކަނޑައެޅުމަށް އިލްތިމާސްކުރައްވާފައެވެ.

ސިފައިންގެ އަހަރީ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެވެސް އޭޕްރީލް މަހުގެ 21 ވަނަ ދުވަހެވެ.