އެން.ބީ.އޭ. ބާސްކެޓްބޯޅަ މުބާރާތުގައި ބްރޫކްލިން ނެޓްސް އާއި ނިއުއޯލިއަންސް ޕެލިކަންސް ބައްދަލުކުރިމެޗް ނެޓްސް ކާމިޔާބުކޮށްފިއެވެ. މިމެޗް ނެޓްސް ކާމިޔާބުކުރީ 134 ޕޮއިންޓް 129 ޕޮއިންޓުންނެވެ.
މިމެޗްގައި ނެޓްސްއަށް އެންމެ ރަނގަޅު ކުޅުމެއް ދެއްކީ 32 ޕޮއިންޓް ހޯދައިދީ 8 އެސިސްޓް ދިން ކައިރީ އަރވިންގއެވެ. އަދި ޕެލިކަންސްއަށް އެންމެ ރަނގަޅު ކުޅުމެއް ދެއްކީ 33 ޕޮއިންޓް ހޯދައިދީ 7 ރީބައުންޑް ނަގާދިން ޒިއޮން ވިލިއަމްސަންއެވެ.
މިމުބާރާތުގައި ލޮސް އެންޖަލިސް ކްލިޕަރސް އާއި ޕޯޓްލަންޑް ޓްރެއިލް ބްލޭޒަރސް ބައްދަލުކުރިމެޗް 113 ޕޮއިންޓް 112 ޕޮއިންޓްގެ ކުޑަ ތަފާތަކުން ކާމިޔާބުކުރީ ކްލިޕަރސްއެވެ. މިއީ މިސީޒަންގައި މޮޅު ކުޅުމެއް ދައްކަމުންދާ ކްލިޕަރސްއިން ކާމިޔާބުކުރި 41 ވަނަ މެޗެވެ. މިމެޗްގައި ކްލިޕަރސްއަށް އެންމެ ރަނގަޅު ކުޅުމެއް ދެއްކީ 33 ޕޮއިންޓް ހޯދައިދީ 11 ރީބައުންޑް ކާމިޔާބުކުރި ޕޯލް ޖޯޖެވެ. އަދި ބްލޭޒަރސްގެ ސީޖޭ މެކްކޮލަމްވަނީ އެޓީމަށް 28 ޕޮއިންޓް ހޯދައިދީފައެވެ. މީގެއިތުރުން ނިއުޔޯކް ނިކްސް އާއި ޗާލޮޓް ހޯނެޓްސް ބައްދަލުކުރިމެޗް 109 ޕޮއިންޓް 97 ޕޮއިންޓުން ކާމިޔާބުކުރީ ނިކްސްއެވެ. މިމެޗްގައި ނިކްސްގެ ޖޫލިއަސް ރެންޑްލްވަނީ އެޓީމަށް 16 ޕޮއިންޓް ހޯދައިދީ 10 ރީބައުންޑް ނަގާފައެވެ. އަދި ހޯނެޓްސްއަށް އެންމެ ރަނގަޅު ކުޅުމެއް ދެއްކީ 21 ޕޮއިންޓް ހޯދައިދީ 7 ރީބައުންޑް ނަގާ 8 އެސިސްޓް ދިން ޓެރީ ރޯޒިއަރއެވެ.
މިމުބާރާތުގައި ކުޅުނު އެހެން މެޗްތަކަށް ބަލާލާއިރު އެޓްލާންޓާ ހޯކްސް އާއި އޯލާންޑޯ މެޖިކް ބައްދަލުކުރިމެޗް 112 ޕޮއިންޓް 96 ޕޮއިންޓުން ހޯކްސް ކާމިޔާބުކޮށްފައިވާއިރު މިނެސޯޓާ ޓިމްބަރވުލްވްސް އާއި ސެކްރެމެންޓޯ ކިންގްސް ބައްދަލުކުރިމެޗް 134 ޕޮއިންޓް 120 ޕޮއިންޓުން ކާމިޔާބު ކުރީ ޓިމްބަރވުލްވްސްއެވެ.