ސަޢުދީ ސަރުކާރުން ރާއްޖެއަށް ހަދިޔާކޮށްފައިވާ އިފްތާރް ޕެކޭޖްތައް ބެހުމުގެ މަސައްކަތް އިސްލާމިކް މިނިސްޓްރީން ފައްޓަވައިފިއެވެ. ސަޢުދީން ހަދިޔާކުރި އިފްތާރު ޕެކޭޖްތަކާއި ރާއްޖޭގެ ފަރާތުން ޙަވާލުވެވަޑައިގަތީ އިސްލާމިކް މިނިސްޓަރ ޑރ.އަޙްމަދު ޒާހިރު ޢަލީއެވެ.
ރަމަޟާން މަހާ ދިމާކޮށް ރާއްޖޭގައ ތިބި ފަޤީރުންނަށް ހަދިޔާކުރުމަށް ސަޢުދީ ސަރުކާރުން ރާއްޖެއަށް ފޮނުވާފައިވާ 290 އިފްތާރް ޕެކޭޖް ބެހުމުގެ މަސައްކަތް ކުރަމުން އަންނަކަމަށް އިސްލާމިކް މިނިސްޓްރީއިން ވިދާޅުވެއެވެ. ރާއްޖޭގައި ފަޤީރުންގެ ދަފްތަރުގައި މީހުންގެ ތިބި ނިސްބަތަށްވުރެ މަދުން ޕެކޭޖްތައް ލިބުމުގެ ސަބަބުން މިޕެކޭޖްތައް ބެހުމުގައި ބަލަނީ މީހުން މަދުން ތިބި ޢާއިލާތަކަށްކަމަށް މިނިސްޓްރީން ވިދާޅުވެއެވެ. އެގޮތުން 4 މީހުން ނުވަތަ 5 މީހުން ތިބި ޢާއިލާތަކަށް އިފްތާރު ޕެކޭޖްތައް ބެހުމަށް ނިންމާފައިވާކަމަށް މިނިސްޓްރީއިން ވިދާޅުވެއެވެ.
ސަޢުދީގެ ސަރުކާރުގެ ފަރާތުން ދިވެހިރާއްޖޭގެ ނިކަމެތި ޢާއިލާތަކަށް ހަދިޔާކުރުމަށް ހަވާލު ކުރާ "އިފްޠާރު ޕެކޭޖް"ގެ 290 ޕެކޭޖް މިނިސްޓްރީ އޮފް އިސްލާމިކް އެފެއާޒް އާއި މިއަދު ހަވާލުކުރައްވައިފިއެވެ.މިތަކެތި އެފަރާތްތަކަށް ރައްދުކޮށްދިނުމުގެ މަސައްކަތް މިހާރުދަނީ ކުރަމުން#MVIaffais pic.twitter.com/P8vtaM39Q9
— Ministry of Islamic Affairs (@MVIaffairs) April 20, 2021
ޕީއެސްއެމްނިއުސްއަށް މަޢުލޫމާތު ދެއްވަމުން އިސްލާމިކް މިނިސްޓްރީން ވިދާޅުވީ މިކަމުގައި މިނިސްޓްރީއަށް އެހީތެރިވަމުން އަންނަނީ ޢާއްމުންނަށް އެހީވުމަށް އެކުލަވާލާފައިވާ އެކި ޖަމިއްޔާތަކުންކަމަށެވެ. އަދި މިހަފްތާގެ ނިޔަލަށް ހުރިހާ އިފްތާރް ޕެކޭޖްތައް ބަހާ ނިމޭނެކަމަށް އިސްލާމިކް މިނިސްޓްރީން ވިދާޅުވެއެވެ.
ރަމަޟާންމަހާ ދިމާކޮށް ސަޢުދީންވަނީ ރާއްޖެއަށް 25 ޓަނުގެ ކަދުރުވެސް ހަދިޔާކޮށްފައެވެ. މިކަދުރު ފަޤީރުންގެ ދަފްތަރުގައި ހިމެނޭ 10944 މީހުންގެ ތެރެއިން ކޮންމެ މީހަކަށް ޕެކެޓެއް ބެހުމަށްވަނީ ކަނޑައަޅާފައެވެ. ކަދުރު ބެހުމުގެ ކަންތައް ކުރިއަށްދަނީ މާލެ އާއި ވިލިމާލެ އަދި ހުޅުމާލޭގައި ދިރިއުޅޭ ފަގީރުންނަށް، އިސްލާމިކް މިނިސްޓްރީއާއި މާލެ ސިޓީ ކައުންސިލް ގުޅިގެން އިސްލާމީ މަރުކަޒުގައެވެ. އަދި ރަށްރަށާއި ސިޓީތަކުގައި އެރަށެއް އަދި އެސިޓީއެއްގެ ކައުންސިލުންނެވެ.