ޔޫރަޕްގެ ފުޓްބޯޅައިގެ ގަދަބާރުތަކުގެ ތެރޭގައި ހިމެނޭ ބޮޑެތި ބައެއް ކްލަބްތަކުން ވެގެން އަލަށް އެކުލަވާލުމަށް މަސައްކަތް ކުރަމުންދާ ޔޫރަޕިއަން ސުޕަރ ލީގަށް ގިނަ ބައެއްގެ ފާޑު ކިޔުން އަމާޒުވާން ފަށައިފިއެވެ. ޔޫރަޕިއަން ސުޕަރ ލީގުގައި ބައިވެރިވުމަށް މިހާރު ސޮއި ކޮށްފައިވަނީ އިންގްލިޝް ޕްރިމިއަރ ލީގުގެ 6 ކްލަބް ކަމަށްވާ އާސެނަލް، ޗެލްސީ، ލިވަޕޫލް، މެންޗެސްޓަރ ސިޓީ، މެންޗެސްޓަރ ޔުނައިޓެޑް، ޓޮޓްނަމް ހޮޓްސްޕަރ، އިޓާލިއަން ސެރީއާގެ ތިން ކްލަބް ކަމަށްވާ އިންޓަރ މިލާން، އޭސީ މިލާން، ޔުވެންޓަސްގެ އިތުރުން ސްޕެނިޝް ލަލީގާގެ ތިން ކްލަބް ކަމަށްވާ ރެއާލް މެޑްރިޑް، އެފްސީ ބާސެލޯނާ އަދި އެޓްލެޓިކޯ މެޑްރިޑެވެ.
ޔޫރަޕިއަން ސުޕަރ ލީގު، އީއެސްއެލްއިން ހާމަކުރިގޮތުގައި މިމުބާރާތް އެކުލަވާލުމުގައި މަސައްކަތްކުރި ކްލަބްތަކުންވަނީ މިހާރުވެސް ވާދަކުރާ އުސޫލުން އެޤައުމުތަކުގެ ލީގުތަކުގައި ވާދަކުރުމަށްފަހު ހަފްތާ މެދުތެރޭގައި ކުޅޭ ގޮތަށް މުބާރާތެއް ފަށާށެވެ. އެގޮތުން ފުރަތަމަ ސީޒަން މުބާރާތް ބޭއްވުމުގެ އިންތިޒާމްތައް ހަމަޖެއްސޭހާ އަވަހަކަށް ފަށަންވީ ކަމަށާއި އަދި މިހާރު އޮތް 12 ޓީމަށް އިތުރު 3 ޓީމް ބައިވެރިވާނެކަމަށެވެ. އަދި ފިރިހެން ޓީމްތަކުގެ މުބާރާތް ފަށާތާ މާގިނަ ދުވަހެއް ނުވެ އަންހެން ޓީމްތަކުގެ މުބާރާތެއްވެސް ފަށަން ގަސްދުކުރާކަމަށް އީއެސްއެލްއިން ހާމަކުރެއެވެ.
ނަމަވެސް އީއެސްއެލްއިން މިމުބާރާތުގެ ވާހަކަތައް އާންމު ކުރުމާއެކު ގިނަ ބައެއްގެ ފާޑު ކިޔުންތައްވަނީ އަމާޒުވާން ފަށާފައެވެ. މީގެތެރޭގައި ކުޅިވަރުގެ ދާއިރާގައި ހަރަކާތްތެރިވާ ފަރާތްތަކުގެ އިތުރުން ޤައުމުތަކުގެ ވެރިންވެސް ހިމެނެއެވެ. އެގޮތުން އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ވިދާޅުވީ ޔޫރަޕިއަން ސުޕަރ ލީގު މިހާރު ކުރިއަށް ގެންދަން ޕްރޮޕޯސް ކޮށްފައިވާގޮތަށް އެމުބާރާތް ގެންދިޔަ ނުދިނުމަށްޓަކައި އިނގިރޭސި ސަރުކާރުން ކަމާބެހޭ ފުޓްބޯޅަ އިދާރާތަކާއި ގުޅިގެން ކުރެވެން އޮތް ހުރިހާ މަސައްކަތެއް ކުރައްވާނެކަމަށެވެ. ބޮރިސް ޖޯންސަން ވިދާޅުވީ އަލަށް ފަށަން މަސައްކަތް ކުރާ ލީގާއި ގުޅޭގޮތުން އޭނާއަށް އަޑުއިވުނު ވާހަކަ ތަކަކީ ކުޅިބެލުންތެރިންނަށް އުފާވެރި ޚަބަރަކަށް ވާނެކަމަށް ޤަބޫލް ނުކުރައްވާ ކަމަށާއި އަދި އެއީ އިނގިރޭސި ފުޓްބޯޅައަށް އުފާވެރި ޚަބަރެއް ނޫންކަމަށެވެ.
އީއެސްއެލްއަށް ފާޑު ކިޔާ ފަރާތްތަކުން ހާމަކުރާގޮތުގައި މި މުބާރާތަކީ ހަމައެކަނި ފައިސާގެ ދަހިވެތިކަމުގައި ފަށަން އުޅޭ މުބާރާތެއް ކަމަށާއި އަދި އެލީގުގެ ސަބަބުން ޔޫރަޕްގެ ޤައުމުތަކުގައި މިހާރު ކުރިއަށް ގެންދާ ޑޮމެސްޓިކް ލީގުތަކަށް އެކަމުގެ ނޭދެވޭ އަސަަރު ކުރާނެ ކަމަށާއި ހަމައެއާއެކު މިއީ ކުޅިވަރުގެ ރޫހާވެސް ޚިލާފު މުބާރާތެއް ކަމަށެވެ.
ޔޫރަޕްގެ ފުޓްބޯޅައިގެ މައިއިދާރާ ޔުއެފާއިން މިހާރު އިންތިޒާމް ކޮށްގެން ޔޫރަޕްގެ ކްލަބްތަކުގެ މެދުގައި ބާއްވާ އެންމެ ޝަރަފްވެރި މުބާރާތުގެ ގޮތުގައި ބެލިފައިވާ ޗެމްޕިއަންސް ލީގުގައި އޮންނަ ގޮތާއި ޚިލާފަށް ޔޫރަޕިއަން ސުޕަރ ލީގުގައި މުބާރާތް އެކުލަވާލަން މަސައްކަތް ކުރި 12 ކްލަބާއި އަލަން ގުޅޭ ތިން ކްލަބާއެކު 15 ކްލަބަކީ އެއްވެސް ގޮތަކަށް ބަދަލުވާނެ ނުވަތަ މަގާމް ގެއްލޭނެ 15 ޓީމެއް ނޫނެވެ. އަދި އެމުބާރާތަށް ކޮންމެ އަހަރަކު ކޮލިފައިވުމަށް ހުޅުވާލެވިފައިވަނީ 5 ޖާގައެވެ.
ދުނިޔޭގެ ފުޓްބޯޅައިގެ މައި އިދާރާ ފީފާއިން ކުރިން ހާމަކުރިގޮތުގައި އެއިދާރާއިން މިފަދަ މުބާރާތެއް ޤަބޫލެއް ނުކުރާނެއެވެ. އަދި އެފަދަ މުބާރާތެއްގައި ވާދަކުރާ އެއްވެސް ކުޅުންތެރިޔަކަށް ފީފާ ވާރލްޑް ކަޕްގައި ކުޅުމުގެ ފުރުސަތު ނޯންނާނެކަމަށްވެސް ފީފާއިން ކުރިން ހާމަކޮށްފައިވެއެވެ. ފީފާގެ އިތުރުން ޔުއޭފާއިންވެސް ރޭ ހާމަކުރިގޮތުގައި ޔޫރަޕިއަން ސުޕަރ ލިގުގައި ވާދަކުރާ އެއްވެސް ކުޅުންތެރިޔަކަށް ޔޫރަޕްގެ އެެހެން އެއްވެސް މުބާރާތެއްގައި ވާދަކުރުމުގެ ފުރުސަތު ނޯންނާނެކަމަށެވެ. އެގޮތުން ޑޮމެސްޓިކް ލީގުތަކުގައި ނުކުޅެވުމުގެ އިތުރުން ޤައުމީ ޓީމަށްވެސް އެކުޅުންތެރިންނަށް ނުކުޅެވޭނެ ކަމުގެ އިންޒާރު ޔުއޭފާއިންވަނީ ދީފައެވެ. އީއެސްއެލްއިން މިމުބާރާތް ބާއްވާކަން އިޢުލާން ކުރުމާއެކު ފީފާއިންވަނީ އެކަމާ ހިތްހަމަނުޖެހުން ފާޅުކޮށްފައެވެ. އަދި ފީފާއިން ވަނީ މިކަމުގައި ހިމެނޭ ހުރިހާ ފަރާތްތަކެއް ގުޅިގެން ވާހަކަދައްކައިގެން މިކަމަށް ހައްލެއް ގެނައުމަށް އެދިފައެވެ.
އީއެސްއެލްއިން މިހާރުވަނީ އެފަރާތުން ބާއްވަން އުޅޭ މުބާރާތް ބޭއްވިޔަ ނުދިނުމަށް ފިޔަވަޅު އަޅައިފިނަމަ ފީފާ އާއި ޔުއޭފާ އާއި ދެކޮޅަށް ޔޫރަޕްގެ ކޯޓުތަކުގައި ޤާނޫނީ ފިޔަވަޅު އަޅާނެކަން ހާމަކޮށް ފީފާގެ ރައީސް ޖިއާނީ އިފަންޓީނޯ އާއި ޔުއޭފާގެ ރައީސް އެލެގްޒެންޑަރ ޗެފެރިންއަށް ނޯޓިސްވެސް ފޮނުވާފައެވެ. ނަމަވެސް އީއެސްއެލްއިން ނެރުނު ނޫސް ބަޔާނެއްގައި ހާމަކޮށްފައިވާގޮތުގައި އަލަށް ފަށަން މަސައްކަތް ކުރާ ލީގާއި ގުޅޭގޮތުން މިމުބާރާތް އެކުލަވާލުމުގައި ހަރަކާތްތެރިވި ކްލަބްތަކުން ތިބީ ފީފާ އާއި ޔުއޭފާގެ އިސްވެރިންނާއި މަޝްވަރާކޮށް މިކަމަށް ސުލްހަވެރި ހައްލެއް ހޯދުމަށް ތައްޔާރަށެވެ. އަދި އީއެސްއެލްއިން ބޭނުންވަނީ ފީފާ އާއި ޔުއޭފާ އާއެކު ގުޅިގެން މި ލީގަށާއި މުޅި ފުޓްބޯޅައަށް ފައިދާ ހުރި ގޮތެއްގެ މަތިން މިކަން ކުރިއަށް ގެންދަން ކަމަށް ހާމަކޮށްފައިވެއެވެ.
މިދިޔަ އަހަރުގެ އޮކްޓޯބަރުމަހު އެންމެ ފުރަތަމަ މިކަމާއި ބެހޭގޮތުން ދެކެވުނު ވާހަކަތައް ބިނާވެފައިވީ ވޯލް ސްޓްރީޓްގެ ބޭންކެއް ކަމަށްވާ ޖޭޕީ މޯގަން އާއި ގުޅިގެން ޗެމްޕިއަންސް ލީގުގެ ބަދަލުގައި އެހެން މުބާރާތެއް ފެށުމުގެ ވާހަކައެވެ. އެގޮތުން މި މުބާރާތަށް 4.6 ބިލިއަން ޕައުންޑް ހޭދަކުރުމުގެ ވާހަކަތަކެއް ދެކެވުނެވެ. ނަމަވެސް ޔުއޭފާއިން ދިޔައީ އެއިދާރާއިން ޗެމްޕިއަންސް ލީގަށް ގެެންނަން މަސައްކަތް ކުރަމުންދާ އިސްލާހުތަކުގެ ސަބަބުން އާ ލީގެއް އުފެއްދުމަށް ކުރަމުންދާ މަސައްކަތް ނިމުމަކަށް އަންނާނެކަމަށް ޤަބޫލް ކުރަމުންނެވެ. އަދި ޗެމްޕިއަންސް ލީގަށް ގެންނަ އިސްލާހުތަކަށް މިރޭގެ ވަގުތެއްގައި އެއްބަސްވުމަށްވެސް ޔުއޭފާއިން އޮތީ ނިންމާފައެވެ. ނަމަވެސް ސުޕަރ ލީގުގައި ހިމެނޭ 12 ޓީމުން ޤަބޫލް ކުރާގޮތުގައި ޔުއޭފާއިން ގެންނަން އުޅޭ އިސްލާހުތަކަކުން އެކްލަބްތަކުން ބޭނުންވާވަރަށް އަދި އިސްލާހުތަކެއް ނާންނާނެއެވެ. އީއެސްއެލްއިން ހާމަކުރާގޮތުގައި ކޯވިޑްގެ ސަބަބުން މިހާރު ޔޫރަޕިއަން ފުޓްބޯޅައިގައި ބޭނުންކުރާ ފުޓްބޯޅައިގެ މޮޑެލްއަށް ގޮންޖެހުންތަކެއްވަނީ ކުރިމަތި ކުރުވާފައެވެ.
ޔޫރަޕިއަން ސުޕަރ ލީގު މިހާރު ކުރިއަށް ގެންދިއުމަށް ޕްރޮޕޯސް ކޮށްފައިވަނީ 20 ޓީމް ހިމެނޭ ލީގެއް ކުރިއަށް ގެންދިއުމަށެވެ. އެގޮތުން މިލީގުގައި ހިމެނޭނީ މިހާރުވެސް ތިބި 12 ކްލަބްގެ އިތުރުން އަލަށް ގުޅޭ ތިން ކްލަބަކާއެކު ބަދަލުނުވާ 15 ޓީމާއި ކޮންމެ ސީޒަނަނަށް ބަދަލުވާގޮތަށް އޮންނަ ފަސް ޓީމެވެ. އަދި މިހާރު ރޭވިފައިވާގޮތުން އީއެސްއެލްގެ މެޗްތައް ފަށާނީ އޯގަސްޓް މަހުގެ ތެރޭގައެވެ. އަދި ލީގުގައި ހިމެނޭ 20 ޓީމް 10 ޓީމްގެ ދެ ގްރޫޕަކަށް ބަހާލާ ހޯމް އެންޑް އަވޭ އުސޫލުން ގްރޫޕްގައި ހިމެނޭ 10 ޓީމްގެ މެދުގައި މެޗްތައް ކުޅެވޭނެއެވެ. އަދި ކޮންމެ ގްރޫޕަކުން އެންމެ ގިނަ ޕޮއިންޓް ހޯދާ 3 ޓީމް ކްއާޓަރ ފައިނަލަށް ދަތުރުކުރާއިރު ހަތަރުވަނަ އަށާއި ފަސްވަނައަށް ދާ ދެޓީމްގެ މެދުގައި ދެ ލެގްގެ ޕްލޭ އޮފް މެޗެއް ކުޅެ މޮޅުވާ ޓީމެއް ކްއާޓަރ ފައިނަލްގެ ފަހު ދެ ޖާގައަށް ހޮވޭގޮތަށެވެ. އަދި ކުއާޓަރ ފައިނަލާއި ހިސާބުން އެލީގު ކުރިއަށް ދާނީ ޗެމްޕިއަންސް ލީގުވެސް ކުރިއަށްދާ އުސޫލުންނެވެ. އީއެސްއެލްއިން ހާމަކުރާގޮތުގައި އެފަރާތުގެ މުބާރާތުން ޗެމްޕިއަންސް ލީގަށްވުރެ ގިނަ ފައިސާ ނެރެވޭނެއެވެ.
އީއެސްއެލްގެ ފުރަތަމަ ޗެއަރމަނަށް ހޮވާފައިވަނީ ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒްއެވެ. އަދި ޔުވެންޓަސްގެ ޗެއަރމަން އަންޑްރިއާ އަގްނެއްލީ ވަނީ ޔުއޭފާ އެގްޒެކެޓިވް ކޮމިިޓީގެ މެމްބަރުކަމުންނާއި ޔޫރަޕިއަން ކްލަބް އެސޯސިއޭޝަންގެ ޗެއަރމަންކަމުން އިސްތިއުފާ ދީފައެވެ. އަދި މިހާރު އީއެސްއެލްއަށް ސޮއި ކޮށްފައިވާ 12 ކްލަބުންވަނީ ޔޫރަޕިއަން ކްލަބް އެސޯސިއޭޝަނުންވެސް ވަކިވެފައެވެ. އަދި މެންޗެސްޓަރ ޔުނައިޓެޑްގެ ވައިސް ޗެއަރމަން އެޑް ވުޑްވަރޑް އާއި މެންޗެސްޓަރ ސިޓީގެ ޗީފް އެގްޒެކެޓިވް ފެރާން ސޮރިއާނޯވަނީ ޔުއޭފާގައި އެދެފަރާތުން އަދާކުރަމުންދާ މަސައްކަތުންވެސް ވަކިވެފައެވެ.
ޔޫރަޕިއަން ސުޕަރ ލީގަށް ކުޅިވަރުގެ ދާއިރާގެ ގިނަ ފަރާތްތަކެއްގެ ފާޑު ކިޔުންތައްވެސް އަންނަނީ އަމާޒުވަމުންނެވެ. މިފާޑުކިޔުންތަކަށް އެހެން ރިޕޯޓެއްގައި ބަލާލާނަމެވެ.