އިނގިރޭސި އެފް އޭ ކަޕްގެ ފައިނަލްގެ ފަހު ޖާގަ ލެސްޓަރ ސިޓީ ހޯދައިފިއެވެ. މިމުބާރާތުގެ ފައިނަލުން ލެސްޓަރ ޖާގަހޯދީ ސެމީފައިނަލްގައި ސައުތެމްޓަން އާއި ބައްދަލުކުރިމެޗް ކާމިޔާބުކޮށްގެންނެވެ.
ވެމްބްލީ ސްޓޭޑިއަމްގައި ކުޅުނު މިމެޗް ލެސްޓަރ ކާމިޔާބުކުރީ އެއްލަނޑު ސުންލަނޑުންނެވެ. 4000 ކުޅިބެލުންތެރިން ވައްދައިގެން ކުޅުނު މިމެޗްގައި ލެސްޓަރއިން ޖެހި ހަމައެކަނި ލަނޑު މެޗްގެ 55 ވަނަ މިނެޓްގައި ޖަހައިދިނީ އެޓީމްގެ ހުނަރުވެރި ފޯވަޑް ކަލޭޗީ އިއަނާޗިއޯއެވެ. މިމެޗްގައި މީގެއިތުރުންވެސް ލަނޑު ޖަހާނެ ރަނގަޅު ފުރުސަތު ދެޓީމަށް ލިބި ބޭކާރުވެފައިވާކަން ފާހަގަކޮށްލެވެއެވެ.
މި ކާމިޔާބީއާއެކު ލެސްޓަރ މިމުބާރާތުގެ ފައިނަލަށް ދަތުރުކޮށްފައިވާއިރު ފައިނަލްގައި އެޓީމް ބައްދަލުކުރާނީ ޗެލްސީ އާއެވެ. މިއީ 1969 ވަނަ އަހަރަށްފަހު އިނގިރޭސި އެފް އޭ ކަޕްގެ ފައިނަލުން ލެސްޓަރއަށް ޖާގަހޯދުނު ފުރަތަމަ ފަހަރެވެ. މެޗަށްފަހު ވާހަކަ ދައްކަމުން ލެސްޓަރގެ ކޯޗު ބްރެންޑަން ރޮޖަރސް ހާމަކުރިގޮތުގައި މިއީ ލެސްޓަރއަށް ވަރަށް މުހިންމު މުބާރާތެއް ކަމަށާއި އެނާ މިކުލަބާއި ހަވާލުވިއިރުވެސް މި މުބާރާތުގެ ތަށި ހޯދުމުގެ މުހިންމު ކަމާބެހޭގޮތުން ވާހަކަ ދެއްކި ކަމަށެވެ. އަދި މިމުބާރާތް ކާމިޔާބުކޮށް ކްލަބްގެ ތާރީހްގައި އާ ސޮފްހާއެއް އިތުރު ކުރަން ވީ އެންމެ ބޮޑަކަށް މަސައްކަތް ކުރާނެކަމަށް ރޮޖަރސް ހާމަކުރިއެވެ.