މޯލްޑިވްސް ޑިމޮކްރެޓިކް ޕާޓީ އެމްޑީޕީގެ އެތެރޭގެ އިންތިޚާބު އަންނަ މަހުގެ 29ވަނަ ދުވަހު ބޭއްވުމަށް ހަމަޖައްސައިފިއެވެ. މި އިންތިޚާބަކީ ޕާޓީގެ ދާއިރާތަކުގެ ހިންގާ ކޮމިޓީތަކާ ޕްރޮވިންސްތަކަށް މެންބަރުން ހޮވުމަށް ބާއްވާ އިންތިޚާބެކެވެ.
އިންތިޚާބުގައި ވޯޓުލުމަށް ހަމަޖެހިފައިވަނީ އެ ދާއިރާއެއްގައި ހިމެނޭ ޕާޓީގެ އާއްމު މެންބަރުންނެވެ. އިންތިޚާބުގެ ކަންކަން ކުރިއަށްގެންދިއުމަށްޓަކާ، ޕާޓީގެ މެންބަރަކަށްވުމަށް ފޯމު ބަލައިގަތުން މިއަދުން ފެށިގެން އަންނަ މަހުގެ 29ވަނަ ދުވަހުގެ ނިޔަލަށް ވަގުތީގޮތުން މެދުކަނޑާލާފައިވާކަމަށްވެސް އެ ޕާޓީން ބުނެއެވެ. އެ ޕާޓީން ބުނީ އިންތިޚާބުގައި ވޯޓުލެވޭނީ މިއަދު (18 އޭޕްރިލް 2020)ގެ ނިޔަލަށް ޕާޓީގެ މެންބަރުންގެ ގޮތުގައި ތިބި މީހުންނަށް އެކަނިކަމަށެވެ.
ޕާޓީގެ އެކި ދާއިރާތަކަށް ވާދަކުރާ މެންބަރުންނަށް އަދި ފުރުޞަތު ހުޅުވާލާފައި ނުވިނަމަވެސް، ސޯޝަލް މީޑިއާގައި އެކި ފަރާތަތްކުންދަނީ އެމްޑީޕީގެ ޤައުމީ މަޖިލީހުގެ އެކި ދާއިރާތަކަށް ކުރިމަތިލުމަށް ނިންމާފައިވާކަން އިއުލާންކުރަމުންނެވެ. މީގެތެރޭގައި ޕާޓީގެ އިސް ފަރާތްތަކާ ސަރުކާރު ޙިއްސާވާ ކުންފުނިތަކުގެ ވެރިންވެސް ހިމެނެއެވެ. އަދި ފޯރިއާއެކު ކެމްޕެއިންގެ ކަންކަން ވަނީ ފަށާފައެވެ.
އެމްޑީޕީން އެންމެ ފަހުން އިންތިޚާބުކޮށްފައިވާ ޤައުމީ މަޖިލީހުގައި 140އަށްވުރެ ގިނަ މެންބަރުން ހިމެނެއެވެ. މި މެންބަރުން އިންތިޚާބުކޮށްފައިވަނީ 2016ވަނަ އަހަރުއެވެ.
އެމްޑީޕީގެ ޤައުމީ މަޖިލީހަކީ ޕާޓީގެ އެންމެ މުހިންމު ނިންމުންތައް ނިންމުމުގައި މަޝްވަރާ ކުރާ މަޖިލީހެވެ.