ޔުއޭފާ ޔޫރޮޕާ ލީގުގައި ގްރަނާޑާ އާއި މެންޗެސްޓަރ ޔުނައިޓެޑް ބައްދަލުކުރި ކްއާޓަރ ފައިނަލްގެ ފުރަތަމަ ލެގްގެ މެޗް ޔުނައިޓެޑުން ކާމިޔާބުކޮށް މިމުބާރާތުގެ ސެމީފައިނަލާއި ގާތަށް ޖެހިލައިފިއެވެ. ގްރަނާޑާގެ ދަނޑުގައި ކުޅުނު މިމެޗް ޔުނައިޓެޑް ކާމިޔާބުކުރީ 2 ލަނޑު ސުންލަނޑުންނެވެ.
މިމެޗްގެ ފުރަތަމަ ލަނޑު މެޗްގެ 31 ވަނަ މިނެޓްގައި ޖަހައިދިނީ ޔުނައިޓެޑްގެ ހުނަރުވެރި ފޯވަޑް މާކަސް ރަޝްފަޑްއެވެ. މިއީ މިސީޒަންގައި ރަޝްފަޑް ކާމިޔާބުކުރި 20 ވަނަ ލަނޑެވެ. އަދި އެޓީމްގެ ދެވަނަ ލަނޑު މެޗްގެ 90 ވަނަ މިނެޓްގައި ލިބުނު ޕެނަލްޓީއަކުން ކާމިޔާބުކޮށްދިނި ބްރޫނޯ ފެނާންޑޭޒްއެވެ. މިމެޗްގައި މީގެއިތުރުންވެސް ލަނޑު ޖަހާނެ ރަނގަޅު ފުރުސަތު ޔުނައިޓެޑަށް ލިބި ބޭކާރުވެގެންދިޔައެވެ. އަދި ހަމައެއާއެކު ގްރަނާޑާއަށްވެސް ލަނޑު ޖަހާނެ ފުރުސަތު މިމެޗްގައި ލިބިގެން ގޮސްފައިވެއެވެ.
މިމެޗުން މޮޅުވުމުން މިއަންނަ ހަފްތާގައި ދެވަނަ ލެގް ކުޅޭއިރު ޔުނައިޓެޑަށް މިވަނީ ރަށުން ބޭރުގައި ދެލަނޑާއެކު ފުރަތަމަ ލެގް ކާމިޔާބު ކުރެވިފައެވެ. އެހެން ކަމުން މުބާރާތުގެ ސެމީފައިނަލަށް ދިއުމުގެ ފުރުސަތު މިހާރު ބޮޑީ ޔުނައިޓެޑަށެވެ. މިދިޔަ ސީޒަންގައި ސްޕެނިޝް ލަލީގާގެ ހަތްވަނައަށް ގޮސްގެން ޔޫރޮޕާ ލީގުގެ ކޮލިފައިން ތިން ބުރު ކުޅެ ގެން ޔޫރޮޕާ ލީގަށް ކޮލިފައިވި ގްރަނާޑާއަށް މިމުބާރާތުގެ މިހާހިސާބަށް ދެވުންވެސް މިއީ ކާމިޔާބީއެކެވެ. އަދި ރޭގެ މެޗަކީ އެކްލަބްގެ ތާރީހްގައިވެސް މިހާތަނަށް ކުޅުނު އެންމެ މުހިންމު މެޗެވެ. ކޮރޯނާ ވައިރަހުގެ ސަބަބުން ސަޕޯޓަރުންނަށް މިމެޗް ބަލާލަށް ދަނޑަށް ނުވަދެވުނު ނަމަވެސް ޓީމްގެ ކުޅުންތެރިންނަށް މަރްހަބާ ކިޔަން ކްލަބްގެ ވަރަށް ގިނަ ސަޕޯޓަރުންވަނީ ދަނޑުގެ ބޭރަށް ޖަމާވެ މެޗްގެ ކުރިން ޓީމަށް ހިތްވަރު ދީފައެވެ.