ހަމަނުޖެހުންތަކަކާއި ގުޅިގެން ރ.މަޑުއްވަރީން ހައްޔަރުކުރި 10 މީހުން ދޫކޮށްލައިފިއެވެ.
މަޑުއްވަރީގައި ހިނގި ހަމަނުޖެހުންތަކާއި ގުޅިގެން ކޯޓު ޢަމުރެއްގެ ދަށުން 10 މީހުން ހައްޔަރުކުރީ މިދިޔަ މަހުގެ 26 ވަނަ ދުވަހުއެވެ. ފުލުހުން ހައްޔަރުކުރި 10 މީހުންގެ ތެރެއިން ނުވަ މީހުންގެ ބަންދަށް ހަތް ދުވަސް އަދި އަނެއް މީހާގެ ބަންދަށް ތިން ދުވަސް މަޑުއްވަރީ ކޯޓުން ޖަހައިދީފައިވަނީ މިދިޔަ މަހުގެ 27 ވަނަ ދުވަހުއެވެ. އަދި އެމީހުންގެ ބަންދާމެދު ގޮތެއް ނިންމުމަށް އުނގޫފާރު ކޯޓަށް ޙާޒިރުކުރުމުން ވަނީ އެމީހުން ދޫކޮށްލާފައެވެ.
މަޑުއްވަރީން 10 މީހުން ހައްޔަރުކުރީ ހަމަނުޖެހުން ހިންގާ، ދަޢުލަތުގެ މުދަލަށް ގެއްލުންދީފައިވާތީކަމަށް ފުލުހުން ވިދާޅުވެފައިވެއެވެ މީގެއިތުރުން ފުލުހުންނަށް ހަމަލާދިން މައްސަލައެއްވެސް ތަޙުޤީގުކުރަމުންދާކަމަށް ފުލުހުން ވިދާޅުވެފައިވެއެވެ.
މަޑުއްވަރީގައި ބަޔަކު އިހުތިޖާޖުކޮށްފައިވަނީ މި ދިޔަމަހުގެ 3 ވަނަ ދުވަހު އެރަށުގައި ހިނގި ޖިންސީ ގޯނާގެ މައްސަލައެއް ފެންމަތިވެ، އެމައްސަލައިގައި މިހާތަނަށް މީހަކު ހައްޔަރުކޮށްފައިނުވާކަމަށް ބުނެއެވެ.
ފުލުުހުން ވިދާޅުވީ މިދިޔަ މަހުގެ 3 ވަނަ ދުވަހު އުތުރުގެ ރަށެއްގައި 18 އަހަރު ނުފުރޭ އަންހެން ކުއްޖަކަށް ޖިންސީ ގޯނާކުރުމުގެ ޢަމަލެއް ހިންގާފައިވާކަމަށް ބުނާ މައްސަލައެއް މިދިޔަ މަހުގެ 11 ވަނަ ދުވަހު ހުށަހަޅާފައިވާކަމަށެވެ. ފުލުހުން ވިދާޅުވީ މި މައްސަލައިގައި ވަކި މީހެއްގެ މައްޗަށް ތުޙުމަތުކުރެވޭ ހެކި މިހާތަނަށް ތަޙުޤީގަށް ލިބިފައިނުވާކަމަށެވެ. ނަމަވެސް އަދިވެސް އިތުރަށް މިމައްސަލަ ތަޙުޤީގުކުރަމުންދާކަމަށް ފުލުހުން ވިދާޅުވެއެވެ.
ފުލުހުން ވިދާޅުވީ މިފަދަ މައްސަލަތަކަކީ ނާޒުކު މައްސަލަތަކަކަށްވާތީ، ހެކި ހޯދުމަށް ކުރާ މަސައްކަތްތަކުގެ ތަފްސީލަކީ ޙާމަކުރެވޭނެ މަޢުލޫމާތެއް ނޫންކަމަށެވެ.