ކޯވިޑް-19ން ޖަނަވާރުން ރައްކާތެރިކުރުމަށް ދުނިޔޭގައި ފުރަތަމަ ފަހަރަށް ވެކްސިނެއް އުފައްދައިފިއެވެ. އެ ވެކްސިން އުފައްދައި ދަފުތަރުކޮށްފައިވަނީ ރަޝިޔާގައެވެ. އެ ވެކްސިން އުފައްދައިފައިވަނީ ދުނިޔޭގެ ޞިއްޙަތު ޖަމުޢިއްޔާ ޑަބުލިޔުއެޗުއޯއިން ޖަނަވާރުންގެ ޒަރިއްޔާއިން އިންސާނުންނަށް ކޯވިޑް-19 ފެތުރޭކަމުގެ ކަންބޮޑުވުން ފައުޅުކޮށްފައިވާ ދަނޑިވަޅެއްގައެވެ.
ޖަނަވާރުންނަށް ޚާއްޞަކޮށްގެން ވެކްސިން އުފެއްދި ރޮސެލްޚޮޒްނަޑްޒޯއިން ބުނީ ކާނިވެކް-ކޮވް ވެކްސިނުން ޖަނަވާރުންގެ ބައެއް ވައްތަރުތައް ކޯވިޑް-19ން ރައްކާތެރިކޮށްދޭނެކަމަށެވެ. އަދި ޖަނަވާރުންނަށް ކޯވިޑް-19 ޖެހުމުން ވައިރަހަށް ވިރާސީ ބަދަލުތައް އައުން ހުއްޓުވައިދޭކަމަށެވެ. އެ ވެކްސިން ގަނޑުކޮށް އުފެއްދުމުގެ މަސައްކަތް އޭޕްރިލް މަހުގެ ތެރޭގައި ފެށޭނެކަމަށް އެ އިދާރާއިން ބުނެއެވެ. ރަޝިޔާއާއި ގުރީސާއި ޕޮލެންޑާއި އޮސްޓްރިޔާގެ ވަލުޖަނަވާރު ގެންގުޅޭ ތަންތަނުން އެ ވެކްސިން ގަތުމަށް ޝައުގުވެރިވާކަމަށް އެ އިދާރާއިން ބުނެއެވެ.
ރަޝިޔާއިން އުފެއްދި ވެކްސިން ތަހުލީލުކުރަން ފެށީ މިދިޔަ އަހަރުގެ އޮކްޓޯބަރު މަހުގެ ތެރޭގައެވެ. އެ ތަހުލީލުތަލުގައި ބުޅަލާއި ކުއްތާއާއި ހިޔަޅުފަދަ ޖަނަވާރުންވަނީ ބައިވެރިކޮށްފައެވެ. ތަހުލީލުގެ ނަތީޖާއިން ދެއްކިގޮތުގައި އެ ވެކްސިނަކީ ރައްކާތެރި އަދި ޖަނަވާރުންގެ ހަށިގަނޑުގައި ވައިރަހާ ދެކޮޅަށް ދިފާޢީ ބާރު އުފައްދާ ވެކްސިނެކެވެ. ތަހުލީލުތަކަށް 6 މަސް ދުވަސް ފާއިތުވިފަހުންވެސް ޖަނަވާރުންގެ ހަށިގަނޑުގައި ވައިރަހާ ދެކޮޅަށް ދިފާޢީ ބާރު ހުރިކަމަށް ދިރާސާއިން ދެއްކިއެވެ. ކުރިއަށް އޮތް ދުވަސްތަކުގައި ވެކްސިންގެ ސަބަބުން ޖަނަވާރުންނަށް ކުރާ އަސަރު ދިރާސާ ކުރަމުންދާނެކަމަށް ރޮސެލްޚޮޒްނަޑްޒޯއިން ބުނެއެވެ.
ރަޝިޔާއިންވަނީ ކޯވިޑް-19ން އިންސާނުން ރައްކާތެރިކޮށްދޭ ތިން ވެކްސިނެއް އުފައްދައިފައެވެ.