ތިންވަނަ ފަހަރަށް ފަރަންސޭސިވިލާތް ފުރަބަންދުކޮށްފިއެވެ.
ފަރަންސޭސިވިލާތުގެ ރައީސް އެމަނުއަލް މެޚްރޮން މަސައްކަތް ކުރެއްވީ އިޤްތިޞާދު ކޮޅަށްޖެހުމަށް ޤައުމު ފުރަބަންދު ނުކޮށް ޙާލަތު ރަނގަޅު ކުރެއްވުމަށެވެ. ނަމަވެސް ކޯވިޑް-19ގެ އައު ބާވަތެއް ފެނި އެ ޤައުމުގެ ޙާލަތުވަނީ އެއް ދުވަހުން އަނެއް ދުވަހަށް ގޯސްވެފައެވެ. ފަރަންސޭސިވިލާތުގައި މިހާތަނަށް 4.6 މިލިއަނަށްވުރެ ގިނަ މީހުންނަށް ކޯވިޑް-19 ޖެހި 95،640 މީހުންވަނީ މަރުވެފައެވެ. ފާއިތުވި 24 ގަޑިއިރުގެ ތެރޭގައި އެ ޤައުމުގައި 41،907 މީހުންނަށް ބަލިޖެހުމުގެ އިތުރުން 303 މީހުންވަނީ މަރުވެފައެވެ. އެ ޤައުމުގައި ފެތުރެމުންދާ ބަލީގެ ތިންވަނަ ރާޅާއެކު ހަސްފަތާލުތަކުގެ އައިސީޔޫތަކަށް ބާރު ބޮޑުވެ އެދެވޭ ގޮތަކަށް ޞިއްޙީ ޚިދުމަތްތައް ފޯރުކޮށްދިނުމަށްވަނީ ދަތިވެފައެވެ.
މަދުވެގެން އެއް މަސް ދުވަހުގެ މުއްދަތަށް ފަރަންސޭސިވިލާތް ފުރަބަންދުކޮށް ތިން ހަފުތާގެ މުއްދަތަކަށް މަދަރުސާތައް ބަންދުކުރުމަށް ސަރުކާރުން ނިންމާފައިވާކަން އިޢުލާނުކުރެއްވީ ރައީސް މެޚްރޮންއެވެ. ޓީވީ މެދުވެރިކޮށް ރައްޔިތުންނާ މުހާތަބުކުރައްވަމުން މެޚްރޮން ވިދާޅުވީ ރައްކާތެރިތަކުގެ ފިޔަވަޅުތައް ނާޅައިފިނަމަ ޤައުމުގެ ޙާލަތު އިތުރަށް ގޯސްވާނެކަމަށެވެ.
ފުރަބަންދުގެ ފިޔަވަޅުތަކުގެ ސަބަބުން 150،000އަށްވުރެ ގިނަ ވިޔަފާރި ވަގުތީގޮތުން ބަންދުކުރަން ޖެހޭނެއެވެ. އޭގެ ސަބަބުން މަހެއްގެ މައްޗަށް 12.89 ބިލިއަން އެމެރިކާ ޑޮލަރުގެ ގެއްލުމެއްވާނެކަމަށް ފަރަންސޭސިވިލާތުގެ މާލީ ވުޒާރާއިން ބުނެއެވެ. އެއާއެކު މިހާރުވެސް ހީނަރުވެފައިވާ ފަރަންސޭސިވިލާތުގެ އިޤްތިޞާދު ކޮޅަށްޖެހުމަށް ކުރަމުންދާ މަސައްކަތަށް އިތުރަށް ހުރަސް އެޅޭނެއެވެ.
ފާއިތުވި ދުވަސްތަކުގައި ފަރަންސޭސިވިލާތުގެ ކޯވިޑް-19އާ ދެކޮޅަށް ވެކްސިން ދިނުމަށްވެސް ގިނަ ގޮންޖެހުންތަކެއްވަނީ ކުރިމަތިވެފައެވެ. އެ ޤައުމުގައި މިހާތަނަށް ވެކްސިން ދީފައިވަނީ އާބާދީގެ 12 އިންސައްތަ މީހުންނަށެވެ. ކުރިއަށް އޮތް ދުވަސްތަކުގައި އެ ޤައުމުގައި ވެކްސިން ދޭ މިންވަރު އިތުރުކުރާނެކަމާއި ޖޫން މަހުގެ ތެރޭގައި 30 މިލިއަން މީހުންނަށް ވެކްސިން ދިނުމަށް ސަރުކާރުން އުންމީދުކުރާކަމަށް މެޚްރޮން ވިދާޅުވިއެވެ. ފުރަބަންދުގެ ފިޔަވަޅުތަކުގެ ސަބަބުންނާއި ވެކްސިން މަޝްރޫޢުގެ ދުވެލި އަވަސްކުރުމުން މެއި މަހުގެ ވަކި ހިސާބަކުން ފެށިގެން ލުއިތަކެއް ދެވޭނެކަމަށް މެޚްރޮން ވިދާޅުވިއެވެ.