ޢަރަބި ޤައުމެއްކަމަށްވާ ސޫދާނުގައި ދީނީ މިނިވަންކަން ޤާއިމުކުރުމަށް އެ ޤައުމުގެ ސަރުކާރާއި ނުފޫޒުގަދަ އިދިކޮޅު ހަނގުރާމަވެރި ޖަމާޢަތަކުން އެއްބަސްވެއްޖެއެވެ.
މިދިޔަ އަހަރުގެ ތެރޭގައި ސޫދާނުގެ ސަރުކާރުންވަނީ އެ ޤައުމުގައި ޙާރަކާތްތެރިވާ ގިނަ ޢަދަދެއްގެ ހަނގުރާމަވެރި ޖަމާޢަތްތަކާއެކު ޞުލްޙައިގެ އެއްބަސްވުންތަކެއް ޤާއިމުކޮށްފައެވެ. ނަމަވެސް ސޫދާން ޕީޕަލްސް ލިބަރޭޝަން މޫވްމަންޓުގައި ހިމެނޭ މައި ޖަމާޢަތުންވަނީ ސަރުކާރާއެކު އެއްބަސްވުމަކާ ހަމައަށް އައުމަށް ދެކޮޅު ހަދައިފައެވެ. އެ ޖަމާޢަތުން ބުނެފައިވަނީ ސޫދާނުގައި އިސްލާމީ ޝަރީޢަތް ތަންފީޒުކުރުން ހުއްޓާލައި ދީނީ މިނިވަންކަން ދިނުމުން ނޫނީ އެފަދަ އެއްބަސްވުމެއްގައި ބައިވެރިނުވާނެކަމަށެވެ.
މާރިޗު މަހުގެ 28ވަނަ ދުވަހު ސޫދާނުގެ ސަރުކާރުންވަނީ އެ ޤައުމުގައި ދީނީ މިނިވަންކަން ޤާއިމުކުރުމަށް އެއްބަސްވާކަމަށް ބުނާ ލިޔުމެއްގައި ސޮއިކޮށްފައެވެ. އެއްވެސް ހުރަހެއް ނެތި އެކި ދީންތަކުގެ މީހުންނަށް އަޅުކަންކުރުމުގެ ފުރުޞަތު ދިނުމަށާއި އެއްވެސް ދީނަކަށް އުޅުމަށް ސޫދާންގެ ރައްޔިތުންނަށް މަޖުބޫރު ނުކުރުމަށާއި ޤައުމުގެ ރަސްމީ ދީނެއް ކަނޑަނޭޅުމަށް ދެ ފަރާތުންވަނީ އެއްބަސްވެފައެވެ.
އެއާއެކު ސޫދާންގައި 1983ވަނަ އަހަރުން ފެށިގެން ތަންފީޒު ކުރަމުންދާ އިސްލާމީ ޝަރީޢަތަށް އަމަލުކުރުން ހުއްޓާލައި އެއްބަސްވުމުގައި ބުނާ ކަންކަން ތަންފީޒުކުރުމަށް އެއްބަސްވުމެއް ޤާއިމުކުރުމަށް މަގުފަހިވެގެން ދާނެއެވެ. ތަފާސްހިސާބުތަކުން ދައްކާގޮތުގައި ސޫދާނުގެ އާބާދީގެ 97 އިންސައްތަ މީހުންނަކީ މުސްލިމުންނެވެ. ދެން އެ ޤައުމުގައި އެންމެ ގިނައީ ނަޞާރާއިންނެވެ.