މިޔަންމާގައި ކުރި އަސްކަރީ ބަޣާވާތާ ދެކޮޅަށް ކުރާ މުޒާހަރާތަކުގައި މަރުވި ގިނަ ޢަދަދެއްގެ މީހުންގެ ޖަނާޒާ ކުރިއަށް ދިޔަ ވަގުތުވެސް އެ ޤައުމުގެ އަސްކަރިއްޔާއިން ޙަމަލާ ދީފިއެވެ.
މިޔަންމާގެ އިސްވެރިޔާ އަން ސަ ން ސޫ ކީގެ ސަރުކާރާ ދެކޮޅަށް އެ ޤައުމުގެ އަސްކަރިއްޔާއިން ބަޣާވާތް ކުރުމަށްފަހު ސޫ ކީއާއި އެނާގެ ސަރުކާރަށް ނިސްބަތްވާ އިސްވެރިން ހައްޔަރު ކުރީ ފެބުރުއަރީ މަހުގެ 1ވަނަ ދުވަހުއެވެ. އެއަށްފަހު އަސްކަރިއްޔާއިންވަނީ އެ ޤައުމުގައި އެއް އަހަރު ދުވަހުގެ މުއްދަތަށް ކުއްލި ޙާލަތު އިޢުލާނުކޮށްފައެވެ. އަސްކަރިއްޔާއިން ކުރި ބަޣާވާތް ނިމުމަކަށް ގެނެސް ސޫ ކީ މިނިވަންކުރުމަށް ގޮވާލައި މިޔަންމާގެ ގިނަ ޢަދަދެއްގެ ރައްޔިތުން ދަނީ މަގުމައްޗަށް ނުކުމެ މުޒާހަރާކުރަމުންނެވެ. މުޒާހަރާތަކުގައި ގިނަ ޢަދަދެއްގެ މީހުންދަނީ މަރުވަމުންނެވެ.
މިޔަންމާގައި މުޒާހަރާ ކުރަން ފެށި ފަހުން މިހާތަނަށް އެންމެ ގިނަ ޢަދަދެއްގެ މީހުން މަރުވެފައިވަނީ މާރިޗު މަހުގެ 27ވަނަ ދުވަހުގައެވެ. އެ ދުވަހު އެކަނިވެސް 114 މީހުންވަނީ މަރުވެފައެވެ. މާރިޗު މަހުގެ 28ވަނަ ދުވަހު އެ މީހުންގެ ޖަނާޒާ ބޭއްވި ވަގުތު މިޔަންމާގެ އަސްކަރިއްޔާއިންވަނީ ޖަނާޒާގައި ބައިވެރިވި މީހުންނަށް ބަޑިން ޙަމަލާ ދީފައެވެ.
މިޔަންމާގައި ހިންގަމުންދާ ޤަތުލުއާންމާ ދެކޮޅަށް ހުޅަނގުން އުފުލަމުންދާ އަޑުވަނީ ފާއިތުވި ދުވަސްތަކުގައި އިތުރުވެފައެވެ. އެގޮތުން އދން މިޔަންމާއަށް ކަނޑައަޅާފައި ހުންނަ މަންދޫބުވަނީ ދުނިޔެއިން މިޔަންމާގެ އަސްކަރީ ސަރުކާރު އެކަހެރިކޮށް އެ ޤައުމުގެ އަސްކަރިއްޔާއަށް ހަތިޔާރު ލިބޭނެ ދޮރުތައް ބަންދުކުރުމަށް ގޮވައިލައިފައެވެ. އދގެ އިތުރުން ވިލާތުގެ އިއްތިޙާދާއި އެމެރިކާއާއި އިނގިރޭސިވިލާތާއި ޖަރުމަންވިލާތުންވަނީ މިޔަންމާގެ އަސްކަރިއްޔާގެ ޢަމަލުތައް ކުށްވެރިކޮށްފައެވެ.
މިޔަންމާގެ ހަމަނުޖެހުންތަކުގައި މިހާތަނަށް 500އެއްހާ މީހުންވަނީ މަރުވެފައެވެ.