2022 ވަނަ އަަހަރު ޤަތަރުގައި ބޭއްވުމަށް ހަމަޖެހިފައިވާ ފީފާ ވާރލްޑް ކަޕަށް ކޮލިފައިވުމަށް ޔޫރަޕް ސަރަހައްދުގެ ކޮލިފައިންގ ގްރޫޕް އީގައި ޗެކް ރިޕަބްލިކާއި ބެލްޖިއަމް ބައްދަލުކުރިމެޗް އެއްވަރުވެއްޖެއެވެ. ޗެކް ރިޕަބްލިކްގެ ޕްރާގްގައި ކުޅުނު މިމެޗް އެއްވަރުވީ އެއްލަނޑު އެއްލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނަ ހަމަލާ އުފައްދާފައިވަނީ ޗެކްރިޕަބްލިކުންނެވެ. މިމެޗްގައި ދުނިޔޭގައި އެއްވަނައަށް ރޭންކް ކުރެވިފައިވާ ބެލްޖިއަމަށް އެޓީމްގެ މޮޅު ކުޅުން ދައްކާލެވޭގޮތެއް ނުވިއެވެ. މިމެޗްގެ ފުރަތަމަ ހާފްގައި ޗެކް ރިޕަބްލިކާއި ބެލްޖިއަމަށް ވެސް ލަނޑު ޖަހާނެ ރަނގަޅު ފުރުސަތު ލިބިގެންދިޔައެވެ. ނަމަވެސް އޭގެތެރެއިން އެއްވެސް ހަމަލާއެއް ކާމިޔާބު ވާގޮތެއް ނުވިއެވެ. މިމެޗްގެ ފުރަތަމަ ލަނޑު މެޗްގެ 50 ވަނަ މިނެޓްގައި ކާމިޔާބުކޮށްދިނީ ޗެކް ރިޕަބްލިކްގެ ލޫކަސް ޕްރޮވާޑްއެވެ. ނަމަވެސް މިލަނޑު ޖެހިތާ 10 މިނެޓް ފަހުން ބެލްޖިއަމްއިންވަނީ ލަނޑެއް ކާމިޔާބުކޮށް މެޗްގެ ނަތީޖާ ހަމަހަމަކޮށްފައެވެ. މިލަނޑު ބެލްޖިއަމަށް ޖަހައިދިނީ ހުނަރުވެރި ފޯވަޑް ރޮމެލޫ ލުކާކޫއެވެ. މިއީ އޭނާ ޤައުމީ ޓީމަށް ކުޅުނު 91 ވަނަ މެޗްގައި ޖަހާދިން 59 ވަނަ ލަނޑެވެ. ލުކާކޫވަނީ އޭނާ އެންމެފަހުން ޤައުމީ ޓީމަށް ކުޅުނު 31 މެޗްގައި 36 ލަނޑު ކާމިޔާބުކޮށްދީފައެވެ. މިމެޗްގައި މީގެއިތުރުންވެސް ލަނޑު ޖަހާނެ ރަނގަޅު ފުރުސަތު ދެޓީމަށްވެސް ލިބިގެންދިޔައެވެ. އަދި ގޯލް ދަނޑިއަށްވެސް ބައެއް ހަމަލާތައް އަމާޒުވެފައިވެއެވެ.
މިމެޗް އެއްވަރުވުމުން ގްރޫޕް އީ ގެ އެއްވަނައިގާ ހަތަރު ޕޮއިންޓާއި ފައިދާ ހަތަރު ގޯލާއި އެކު އުޅެނީ ޗެކް ރިޕަބްލިކެވެ. ބެލްޖިއަމް އުޅެނީ ހަތަރު ޕޮއިންޓާއި ފައިދާ ދެގޯލާއެކު ދެވަނައިގައެވެ. މިގްރޫޕްގައި ބެލަރޫސް އާއި އެސްޓޯނިއާ ބައްދަލުކުރިމެޗް 4 ލަނޑު ދެލަނޑުން ކާމިޔާބުކުރީ ބެލަރޫސްއެވެ.